Read Nocte Naga Moatlem 5 Bible Online

Moatlem 5 - Nocte Naga bible

Moatlem 5

¹Phumma ate mînpa Anania ngama mihnyan wathe dângwah, atema ate tangnyu Safira demko roamlahma thin chhahkhem wanthe sengwah.

²Roh-komin ate dihiak enii jutthômîn lahma ngun kowah khakapa thinrãng huhtôan lahma khakapa moattat chhoante heh deknâng kohhokwah.

³Phumma Piter ma atenâng ngatwah, “Anania, joak nâng chenrãngma pênrii ekoa, nangma chhahkhem sengtoh ngun kowah khaka huhtoan lohma Asâthôanju nâng chenrãngma diapchhah ekoa?

⁴Nangma nang chhahkhem pa maseng poatko erepa nangrãng dângwah; phumma nangma erepa seng dikomin ere ngunpa nangthiak rãngjô lethien ekoa. Nangma chenrãngma aroh thonghun lohma motoh a? Nangma mihnyan nâng diapchhah dangmoh - Joban nâng diapchhah eko!”

⁵Anania ma erepatat rienrien, ate loangjâ lahma ritwah; ngale erengin tatte heh phangtang chei wah.

⁶Phumma paangmihpho heh khuthe hûlahma ate mangpa doapwah, ngale pechhoan lahma bînchhoanwah.

⁷Koantarem diko, ate dihiak pumma chenni dangtah a erepa lejet thangma humkhen nâng hokwah.

⁸Phumma Piter ma atenâng chhienwah, “Nganâng thôkoh tanhang, nang tangwa nechhema chhahkhem sengtetko ngunpa are tôjô lechohtet a?” Atema, “O,” “Are tôjôba chohtih.” Ngama dânthâng wah.

⁹Ephumma Piter ma atenâng ngatwah, “Nang tangwa nechhe punthômîn letma Teso Ju demnâng chenrãngma loam eken a? Nang tangwa mangbîn katte mihnyan heh athângheh kâsek thongko tonga, ngale thinma nangmin epekat ho!”

¹⁰Lemlienma ate dathongko kôanjâ lahma ritwah. Paangmihpho heh humkhenko wãng lahma riichoan khewângwah, ephumma thinma pechhoan lahma ate tangwa kêko bînkatwah.

¹¹Asâthem heh phangtang ngale ahan henma erengin tatte heh nyahrãng cheiwah.

¹²Moattat chhoante hehma mihnyan heh tânâng melâng patritli ngale bâritli moatwah. Chentô putedâlemte heh Solomon Kânthong ngama ngaeka theko roamchohmîn wah.

¹³Mihnyan hehma chentôjô medongthô akomin, thin demnâng ledangwah heh henjô thin demnâng chinjoh chephûho.

¹⁴Rohkomin mihnyan heh thin demnâng ajahjah johdâng wah - Teso nâng putedâlemte heh dihiak dela anga nga johrû hokwah.

¹⁵Piter dânkhôam poatko ate dâpha pumma komin sahlahma chensen a ngama, mihnyan hehma khunte heh thin jupthinkhoh hehnâng ngale hemkhoh hehnâng pehû lahma lemkông hehnâng chîjupthien hokwah.

¹⁶Ngale Jeroselem kêanâ hah hehwah mihnyan hehma khun atamte le juchhih lupte mihnyan heh sietlahma hokwah; ngale ereheh phangtang sênwah.

¹⁷Ephumma Soam aroakte adongthôan le ate lemru heh, erediko Saduki hehma moattat chhoante hehnâng nyahrãng mitchekwah; ngale thinma moattat chhoante hehnâng sekhamrãng thômîn wah.

¹⁸Thinma moattat chhoante heh lokhhek lahma phâtek nâng sekwah.

¹⁹Rohkomin erejâ rangpenko rangwah Joban ngintatte ma phâtek kâsekpa lângphe kolahma moattat chhoante heh loatchhoan thukwah, ngale thinnâng ngatwah,

²⁰“Rangsoamhum nâng wãngletma, mihnyan chentô nâng are roandông nyan nginpa thôkoh en.”

²¹Moattat chhoante hehma erengin pa keplahma rangkhah rangkhoma Rangsoamhum nâng wãng lahma mihnyan hehnâng hethô wah. Soam aroakte adongthôan le ate lemru heh roamlahma Jews khhepho phannang heh demnâng ngoangthun dong thunrãng roowah; erediko thinma phâtekwah khhektah moattat chhoante heh nitânâng sietwênrên ngama ngin matkat wah.

²²Phumma mihnyan heh phâtek nâng katahpa moattat chhoante heh phâtek khennâng chohkheka ho, phumma ngakwãng waklahma ngoang awang hehnâng thôkoh wah,

²³“Chenthu ni phâtek nâng hokkhôamko, kâsek pemin kitkitsek lahma tonglatah ngale abemte hehmin phangtang kâsek tâko bem lahma tongla tah; phumma chenthu nima kâsekpa laang lihma sûtihpa akhennâng henjô chohkheho!”

²⁴Chenthu Soam aroakte adong le Rangsoamhum bemte adong hehma erengin pa tatphumma, moattat chhoante hehnâng chenni dangeka ngama bârit wah.

²⁵Erediko mihnyan wathe hûlahma thinnâng thôkoh wah, “Tattan en! Nema phâtek nâng sektet mihnyan heh Rangsoamhum nâng mihnyan hehnâng hethô lahma tonga!”

²⁶Ephumma sahhab pumma ate sipâhi heh sietlahma loatchhoan lahma moattat chhoante heh ngakloat katwah. Rohkomin thinma lebuh lewat thangma sietwênwah, chenrãngma ngako mihnyan hehma longma moangpet hi ngama chei rewah.

²⁷Thinma moattat chhoante heh siethû lahma ngoang awang heh tâko chepthuk lahma Soam aroakte adongthôan pumma thinnâng ngin chhienwah.

²⁸Atema ngatwah, “Nima nenâng are mihnyan mînpa kepletma mihnyan hehnâng nekphoang hethôtu en ngama jektengtah dangmahne,” “Phumma sûtan en nema chenni moeken a! Nema Jeroselem phangtang nâng lâphoang hethôtet, ngale nema are mihnyan riitahpa nikhonâng phehun ehia!”

²⁹Piter le moattat chhoante ahan wathe pumma dânthâng wah, “Nima mihnyan ngin kepnoma Joban nginba kepmin.

³⁰Nema bãngphakko sema rittektet diko, Nite niwa heh Joban pumma Jisu ritwah ngakhinsiettah.

³¹Joban ma ritwah ngakhinsiet lahma, Isrial mihnyan hehnâng hunglit sanpoat kohlahma thinpap heh map kohrãng ngama ate dekchahko lemsênte ngale Pângte rãng dangthuk lahma tongthuk eka.

³²Nima areheh mitma khelihma thôeki - ngale Joban ma ate nginkepte hehnâng hînhô rãng koheka Asâthôanju memin jeteka.”

³³Chenthu ngoang awang hehma erengin heh tatphumma, thin nyahrãng rinkhah wah, ngale moattat chhoante hehmin ritphe rãng hunwah.

³⁴Farasi wathe ate mînpa Gamaliel, ngale atea Niemarang hethôte, ngale chentô mihnyan hehma atenâng nyahrãng choangpe lahma dângwah, phumma ere mihnyan pa ngoang awang heh chhangko toanchep lahma moattat chhoante heh poatthe rãng rangsâ nâng sietchhoan en ngama chienwah,

³⁵ngale erediko atema ngoang awang hehnâng ngatwah, “Nga lemru, Isrial mihnyan heh, jetletma mo en, nema are mihnyan hehnâng chenni rerãng ngaeken a.

³⁶Nema thonghun ekenle, melâng rangpâ manâng Thiudas pa ngamin wanthe adong ngama hongtah, phumma châbelii mihnyan rãng ate demnâng johdangtah. Phumma chenthu ate ritphe diko, ate dijunte heh phangtang phoangphan chhoan lahma ate ngin pemin mahjâtah.

³⁷Eredikomin, mihnyan heh khoroakweih sanpoatko Galili wah mihnyan wathe Juda ngama erohjô hong lahma mihnyan heh ate demko khôansiet wah; phumma ate ritphe diko ate dijunte heh phangtang phoangmah phanchhoantah.

³⁸Ngale are pemin ngama nenâng thôkoh eka, are mihnyan hehnâng chenjô nekre en. Thienroh re en! Thinma chenni moeka ereheh mihnyan hei angem junma medang ako, are pemin amah jâjô erea,

³⁹Phumma arepa Joban wah medang ako, nema chenthumin tajienmet. Erepa nea Joban demnâng mênmînwah rãngrãng ba edanga!” Phumma ngoang awang hehma Gamaliel nginpa kepwah.

⁴⁰Thinma moattat chhoante heh humkhen nâng ngakroo lahma watlahma Jisu mînko chenthumin nekthe phoangthôtu en ngama ngalahma thînphêwah.

⁴¹Moattat chhoante heh ngoang awang heh tâwah khuhah nâhah chhoan wah, chenrãngma ngako, Joban ma thin a Jisu rãngma rêsê tathangte rãng rêndi khuhah wah.

⁴²Ngale rangwo roakweih thinma Rangsoamhum nângmin ngale mihnyan heh hum hehnângmin Jisu ngale Misaia Nginkongsen pa roantangma phoangthô wah.