Read Nocte Naga Moatlem 9 Bible Online

Moatlem 9 - Nocte Naga bible

Moatlem 9

¹Ere sanpoatko Sol ma Teso nâng putedâlemte heh phoangritphe lahma dângwah. Ngale Soam aroakte adongthôan tânâng wângwah

²ngale atema soam aroakte adong hehnâng Damaskas wah Sanagog hehnâng nyapraang wah raangkohha ngama thâwângwah, erepa atema Teso lemko khoam lahma atenâng putedâlemte heh mechoh ako lokhhek lahma dihiak dela phangtang Jeroselem nâng ngaksiet katrãng thãwah.

³Sol Damaskas hah kêko hokkhoam rienrienko, lemlienma rangkho wah wenma ate tumlit hôngphiak katwah.

⁴Sol hahko loangjâ lahma atenâng ngalahma jabkhab tatwah, “Sol, Sol! nangma nga chenrãngma chêmsiet ehanga?”

⁵Atema, “Nanga hen a Teso?” ngama chhienwah. “Nga a Jisu, nangma chêmsiet ehangpa,” ngama jabkhab pumma dânthâng wah.

⁶“Rohkomin toanchep lohma ire hahdaangko wãngo, enâng nangma chenni moatmin a erepa ngama ethôkoh e.”

⁷Sol demwah johkatah mihnyan heh chenjô lejab thangma chepwah; thinmemin jabkhab hongjab tahpa tatwah rohkomin thinma henjô chohkheho.

⁸Sol hahkowah toanchep lahma ate mitkan tahpa, chenjô lejien khetû dângwah. Ephumma ate lemru hehma dekko sietlahma Damaskas nâng sietwênwah.

⁹Jârem atema chenjô lejienkhe dângwah, ngale erepoatko atema chenjô lejok phhekchhah tôngwah.

¹⁰Damaskas nâng putedâlemte wathe ate mînpa Anania dângwah. Joban ma atenâng thôko lahma atema thânkhewah, “Anania!” Atema, “Teso, nga ako tongang,” ngama dânthâng wah.

¹¹Teso ma atenâng ngatwah, “Cheplohma lemtinla kao, ngale Tarsus wah mihnyan wathe ate mînpa Sol ngama tonga, erepa lemsûkao. Atema rangsoam lahma tonga,

¹²ngale atema mihnyan wathe ate mînpa Anania ngama hûlahma ate khohko dekma sahloat hokkoh diko atema jienkhe lahma thânkhewah.”

¹³Ananias ma dânthâng wah, “Teso, ajahthem mihnyan ma are mihnyan junma nganâng thôkoh thang, ngale atema Jeroselem wah nang mihnyan hehnâng chenroh cheili chêmsiet eka erehehmin thôkohthang.

¹⁴Ngale atema Soam aroakte adong hehwah chaan keplahma Damaskas wah nangnâng soam atôte heh phangtang loatkhhek rãng kaera.”

¹⁵Teso ma atenâng ngatwah, “Kao, chenrãngma ngako, atema nganâng soamtô rãng ngama lârentek, ngale Jews ledangte jat le lowang hehnâng erediko Isrial mihnyan hehnâng ngamîn jetthuk rãng lârentek.

¹⁶Ngale atema ngarãng chêmchohmin heh ngadedema atenâng ekhesok ang.”

¹⁷Ephumma Anania kalahma Sol tongeka humko luphokwah, ngale dekma atenâng sahloatwah. Atema ngatwah, “Enaa, Sol,” “Teso ma nga chienkat ehang - erepa Jisu ate dedema chienkat ehang, nang anâng katko lemko nangdemnâng ate chohmîntho. Nangmit pumma ngakjienkhe ngale nangma Asâthôanju chohrãng nga chienkat ehang.”

¹⁸Lemlienma ngahra rãngrãng Sol mitkowah jâritwah, ngale ephumma atema ngakjienkhe wah. Ephumma ate toanchep lahma baptijem kepwah;

¹⁹ngale atema phhekchhah chhah diko, chaan ngakchohwah. Damaskas wah putedâlemte heh demnâng Sol jâthe jânii rãng johtông thienwah.

²⁰Atema Sanagog nâng tintin wãng lahma Jisu pa Joban Chha dângwah ngama thôkoh wah.

²¹Ate ngintatte heh phangtang barii lahma chhienwah, “Are mihnyan pa Jeroselem wah Jisu nâng soam atôte mihnyan heh phoang ritphetepa ledangne? Ngale anâng wah putedâlemte heh lokhhek lahma Soam aroakte adong heh tânâng ngaksietwên rãng katwah ledangne?”

²²Phumma Sol ma Joban nginpa nyahrãng chaan demnâng thôwah, ngale atema Jisu pa Misaia ngama thôkoh eka nginko Damaskas wah Jews heh ate demnâng henjô tachhiakmîn ho.

²³Melâng rangwo lienchhoan diko, Jews heh roam chohmîn lahma Sol ritphe rãng thômîn wah,

²⁴rohkomin thinma themawa ekapa Sol ma jetwah. Rangwo rangnyek thinma erehah wah loatchhoan pankâsek thongko ate ritphe rãng bemtông wakwah.

²⁵Phumma jâthe rangpen nâng Sol demwah mihnyan hehma phânâng seklahma panpolo pumma waangphe katlahma chhoanthuk wah.

²⁶Sol Jeroselem nâng kalahma dijunte heh demnâng johdângrãng thônghun wah. Rohkomin thinma atea dijunte edangthem a ngama puteho, ngale phangtang ate rancheiwah.

²⁷Phumma Barabas ma atenâng chohsok wah, ngale atema moattat chhoante heh tânâng siethokwah. Sol ma lemko Teso chenroh danglahma khetah a, ngale Teso ma atenâng chenroh ngatah a ereheh Barabas ma thôkoh wah. Ngale Sol ma Jisu mînko Damaskas nâng chenroh lechei thangma thôkotah a erehehmin thôkoh wah.

²⁸Ephumma Sol thin demnâng johtong lahma Jeroselem phangtang nâng lechei thangma Teso mînko phoangthôwah.

²⁹Griik jabma jabte Jews heh demnâng min Sol roantangma phoangchiakmîn wah, phumma thinma ate ritphe rãng themawa wah.

³⁰Chenthu putedâlemte hehma Sol junma jetphumma, thinma Sol thin demnâng dangthuk lahma Kasaria nâng sietkatwah, ngale enângwah Tarsus nâng chienkatwah.

³¹Ngale ere sanpoatko Judia, Galili ngale Samaria wah Asâthem heh mêmoma dângwah. Ngale Asâthôan Juma chohsû lahma thin a putedâlem nâng rongtêngtêng dângwah, ngale Joban ranchei nungma sôngtôngdi putedâlemte heh jêngjah jêngjah rewah.

³²Piter chentô thenâng phoangkhoam wah, phumma jâthenâng Lida wah Joban mihnyan heh demnâng chohmînrãng katwah.

³³Enâng atema mihnyan wathe ate mînpa Ainia ngama chohmînwah. Ere mihnyan pa kôasô junko ate jupthinko pâesat lejien toanchep dângwah.

³⁴Piter ma ngatwah, “Ainia,” “Jisu Krista ma nang lâsen siettho. Toanchep lohma nang jupthin pa toanpe lohma khoakhem o.” Lemlienma Ainia tôanchep wah.

³⁵Lida le Saron wah sôngte mihnyan hehma Ainia khelahma thinmin Joban tânâng hokwah.

³⁶Jopa nâng dihiaknyu wathe ate mînpa Tabitha ngama dângwah, ngale atemin putedâlemte dângwah. (Griik jabma ate mînpa Dorkas dângwah, are ngaeka pa “khehhe ngaeka.”) Atema roantangma moatlemsen moatwah ngale tangchhih hehnâng chîchohsok wah.

³⁷Phumma ere sanpoatko khunlahma ate ritwah. Ate mangpa soanphe lahma atok dângwah humko thienwah.

³⁸Jopa hahpa Lida hah kowah chentô letaang dângwah, phumma chenthu Jopa wah putedâlemte hehma Piter Lida hahnâng tonga ngama tatphumma, thinma ate tânâng wanii mihnyan chienwênwah. Thinma, “Sitsiak nitânâng kamêngro,” ngama roowângwah.

³⁹Ephumma Piter thin demnâng johkatwah. Chenthu ate enâng hokkhoam phumma atok dângwah humko sietwênwah, ngale eko chentô janthoinyu heh ate tumlit khôanhok wah, ngale asep nungma Dorkas ma hînpoatko tektah khet heh phangtang atenâng khesokwah.

⁴⁰Piter ma phangtang erehum kowah chhoanthuk lahma atema dakuhtho lahma rangsoam wah; erediko mang tâko wãng lahma atema ngatwah, “Tabitha, toansat o!” Ephumma ate mitkanwah, ngale chenthu atema Piter chohkhe phumma, sattôngwah.

⁴¹Piter ma ate tânâng hehka lahma chohsatsiet wah. Erediko atema putedâlemte phangtang roowah, ereko janthoinyu hehmin johdângwah. Ephumma atema thinnâng Tabitha ahin khesokwah.

⁴²Are nginpa Jopa hah phangtang nâng khemtatwah, ephumma ajahthem mihnyan ma Teso nâng putedâlem wah.

⁴³Jopa hahwah ngemkhoanwah tembu hum hôante, ate mînpa Simon, ate demnâng melâng rangwo johtông thienwah.