Read Nocte Naga Rom 12 Bible Online

Rom 12 - Nocte Naga bible

Rom 12

¹Erohwah, ngalemruchha heh, Joban ma nãngkhu nâng mînchendong tôngjunko Ngama nenâng rosep eka: Ne roandôngpa nededema Joban moatlem nâng ahîn jebjebma koh en, ate moatlem moatrãng lolo chendanga ngale ate rinmeli chendanga. Eroh kohletma soam roak eken pejôba toangtangma soam roak eken.

²Nededema are hahtokkhoh kowah mihnyan heh rãngrãng nekdangen, rohkomin Joban ma nehung nerin phangtang khenwah chenlitsiet hèn. Erediko ba Joban ma hun ekapa nema eta jetlo en - chenrepa asen a ngale chenre pumma Joban rinme thukeka ngale chenrepa apunlia erepa etajetlo en.

³Ngale Joban ma nganâng mînchenchaan kohjunko ngama nekhu anga nganâng thôkoh eka: Ne chentô thenga erekowah nededema ajah nekbâm dong thonghunrii en. Erenoma, sâpoangpoang thonghun en, ngale Joban ma nenâng putedâlem pa chentô koh ehèn a erejunko nedede thonghunrii en.

⁴Nãng phoang wantheko mâmâ jatjat sek asa tonghi, ngale are chentô pumma mâmâ moatlem moeka.

⁵Ererãngrãng, nãngmin ajahjô medang ekomin, Krista junko nãnga phoangthe, ngale phoang wantheko mâmâ jatjat sek asa roam eka rãngrãng nãngmin wathema watheko roam eki.

⁶Erohwah nãngma Joban wah mâmâ jatjat hînhô choheki heh chenroh Joban ma nãngnâng ate mînchenchaan pa kohehia erejunko kepmin. Nãngnâng Joban ma ate Nginkongsen pa phoangthô rãng mekoh hiko, erepa nãngma putedâlem junko phoangthômin;

⁷ngale nãngnâng khoakhêmk rãng mekohhiko, nãngma eroh khoakhêm min; ngale hethô rãng mekohhiko, eroh hethômin;

⁸mihhung dongsiet rãng mekoh hiko, nãngma mihhung dongsietmin. Ngale hen akomin mihnâng kohthin medang ako chhahme dângmin; Hen akomin thôajabte khhepho medang ako, hungkoh lihma chaanmoatmin; hen akomin mihnâng mînchenrãng mekoh ako, hungsi rinme ma moatmin.

⁹Ahun pa linlin hungwah hunmînmin. Chenrepa chhih a ereko chinnya rêmin, ngale chenrepa asen a ereko senthemthem loatmin.

¹⁰Kristan rãngrãng wathema wathe nâng senthemthem hunmînmin, ngale wathema wathe nâng rancheimîn letma khesokmîn en.

¹¹Moatlem pa nyahrãng chaanrii letma mo en, ngale ajõ nekdangen. Nehung nerin phangtang kohletma Teso nâng soamtô en.

¹²Nema dâlem eken pumma khuhah nâhah chendangthuk hèn, chêmpoat komin hungmôngsiet letma tongen, ngale sanpoat roakweih rangsoam letma tongen.

¹³Ne chhahkhem hehmin ne lemru Kristan tangchhih heh demnâng aroam roamma kepen, ngale mihwun hehnângmin ne humpa laangkohjû dangen.

¹⁴Ne chêmchei thukte hehrãngma Joban wah rangroo koh en - têm athoak nekre en, Joban ma rang chenkoh a ngama rosepkoh en.

¹⁵Khuhahte demnâng khu johhah en, ngale asepte demnâng sep re en.

¹⁶Anga nga demnâng asen tuta dangen. Ngam poapoa nekdangen, noapnene dangen. Ngale nedede jet ajien ngama nekthong hunrii en.

¹⁷Henma komin nerãngma mechhih mokoh hènko, aterãng nekngak chhihmokoh en. Anga ngama asen ngama ngatli moatlem tuta mo en.

¹⁸Nema anga nga demnâng mêmoma tuta sôngtông rãngma mo en.

¹⁹Ngalemruchha heh, mihnâng phuh neklit en, erepa Joban ma ate rinkhah poatko moatrãng liet en. Chenrãngma ngako, Joban nyapraang nâng Teso ma aroh ngaeka, “Phuh pa ngama elit ang, Ngama engakkoh ang.”

²⁰Erenoma, Joban nyapraangma ngaeka: “Neran heh rêm meriiako, thinnâng chhahthuk en; thin jolân meriiako, thinnâng jo jokthuk en; chenrãngma ngako nema aroh memo enko thin rêsê lahma wenma khâmwah rãngrãng edangwak a.”

²¹Achhih nâng nekjienrii en; erenoma, chhih pa asenma jien en.