Read Nocte Naga Rom 13 Bible Online

Rom 13 - Nocte Naga bible

Rom 13

¹Anga ngama nok atang thôte jabte heh ngin kepmin, chenrãngma ngako Joban ma ledangthuk medang ako henmin thôte jabterãng leta dângmin, ngale athâng hehwah thôte jabte dangeka hehmin Joban ma jôba dangthuk eka.

²Henhen athâng hehwah thôte jabte heh lelatnâng dangeka, ereheh Joban moatlem lelatnâng dangeka; ngale henma akomin eroh memo ako ereheh thindedema chêmsietrii eka.

³Chenrãngma ngako henhenma kaamsen moeka ereheh thôte jabte heh ran cheithin aho, rohkomin henhenma kaamchhih moeka erehehba cheimin. Nemin thôte jabte heh ran lechei danghun eken a? Eroh medang enko chenpa asenli a ereheh mo en, ngale erohkoba thinma erôhèn,

⁴chenrãngma ngako thinmin Joban haa ngale nerãng sênrãngma moeka. Rohkomin nema kaamchhih memo enko, thinran chei ere en, chenrãngma ngako thinnâng nenâng chêmthuk rãng linlin chaantonga. Thin a Joban haa ngale kaamchhih moatte hehnâng Joban junko chêmthukmin.

⁵Erohwah, nema metkeptô thôte jabte heh nginkepkep dângmin - nginkepkep ledang kiko Joban ngewah chêm môangchoh e ngama ledang, erepa cheithin khôko cheieki.

⁶Erohwah jôba nema thãkho koh eken, chenrãngma ngako thôte jabte hehma thin moatlem moatpoat ko Joban rãng moeka.

⁷Erohwah, nema thinnâng kohthinpa koh en; nedede thãmin, ngale chhahkhem thãmin koh en, ngale thin chentô ran cheiletma khesok en.

⁸Henwahjô thãpê nekpê en - ahunmîn pa lolo jôba wathema wathe nâng thãpê pêmînwah rãngrãng dangen. Henhenma aroh moeka ereheh meba Niemarang pa kep eka.

⁹Niemarang pumma aroh ngaeka, “Dihiak dela kaamchhih nekmo en; mih nekritphe en; ahuh nekre en; mihthiak nâng nekphetwân en” - areheh phangtang, ngale ereheh leko ahan hehmin, chentôpa niem wanthe khenko tongeka, ere niem pa, “Nangtok nangkhung wah mihnyan hehnâng, nangdede ko hunriieko rãngrãng hun o.”

¹⁰Nema mihhan nâng hun mere enko, chenthumin thinrãng achhih mokomet; erohwah, nema hun mere tetko, Niemarang pa phangtang lâkeptet.

¹¹Nema arepa metkeptô moatmin, chenrãngma ngako nemajet nea jupwah sat sanpoat pa hûera. Chenrãngma ngako, ne khope sanpoat pa nema khebeng chohtattet nomemin anam lâhûtha.

¹²Rangnyek pa lâlien eka, ngale rangwopa lânam hûtha. Erohwah rangnyek nâng moatthin moatlem moatpa jekre e, ngale rangwo nâng loatmînko kepthin ranlông chhahkhem heh kep e.

¹³Rangwo sanphiak nâng sôngte mihnyan heh rãngrãng senthemthem dange - kuhhôan lihma bôang aloam, khemjok lihma mok alek, dihiak dela kaamchhih mo, achhihli heh, mên ahiet, ngale chhahnyoak, ngale phetwanmîn heh jekre e.

¹⁴Rohkomin Teso Jisu Krista ranlông chhahkhem heh kep e, ngale ne hei angem rinme thukrãng nehung pumma kaamchhih moat huneka hehwah jekre en.