Read Nocte Naga Rom 15 Bible Online

Rom 15 - Nocte Naga bible

Rom 15

¹Nãngkhuwah henpa putedâlem nâng rongtêngtêng dangekia, erehehma putedâlem nâng anete hehwah hênlih pa chohhênmin. Nãngma nãngdede lolo rinme lethonghun min.

²Erenoma, thinrãng sênrãngma putedâlemte ahan heh rinba methukmin, erohkoba putedâlem nâng thinmin asen edanga.

³Chenrãngma ngako Krista memin atedede rinme thukriiho. Erenoma, Joban nyapraangma ngaeka, “Mihnyan hehma nenâng dummek then pa ngakhoh nâng chat ehang.”

⁴Joban nyapraang nâng chentô raangthien ekapa nãngnâng hethhô rãng raangthien eka, erohwah Joban nyapraang pumma nãnghung môngsiet junko ngale nãnghung dôngsiet junko nãngma thonghun ekipa etachoh e.

⁵Ngale nãnghung môngsiette erediko nãnghung dôngsiette Joban pumma nekhu dede tungnângmin Jisu Krista dijun letma hungthe rinthe ngale jutjut jaangjaang chendangthuk hèn,

⁶erohkoba nekhu phangtang aroamma thunthe dangletma nãngkhu Teso Jisu Krista Wa Joban nâng etarô en.

⁷Jisu Krista ma nenâng chenroh hun ehèn a ererãngrãng, nekhumin Joban mîndông rãngma, wathema wathe nâng hun achhâmin en.

⁸Chenrãngma ngako, ngama nenâng thôkoh eka, Krista ma ate roandôngpa haa rãngrãng danglahma Jews heh khoakhêmrãng katwah, erepa Joban ma thin te awa heh demnâng toamsem tah pa linlin lâdang katha ngama khesokrãng moatwah,

⁹ngale Jews ledangte hehmemin Joban nâng ate mînchen junko chenrôa ngama moatwah. Joban nyapraangma ngaeka, “Ngale ngama Jews ledangte heh chhangko nangnâng erôe; Ngama nangnâng rôsê ese ang.”

¹⁰Ngale eredikomin aroh ngatwah, “Jews ledangte heh, Joban mihnyan heh demnâng rin johroan en!”

¹¹Ngale eredikomin ngatwah, “Chentô Jews ledangte hehma Teso nâng rô en; ngale chentô mihnyan hehma atenâng rô en!”

¹²Ngale Isaia memin wîenngatwah, “Jesi chhuchha wah ehonga; atema Jews ledangte heh pênrãng ekara, ngale thinma atenâng edâlem a.”

¹³Dâlem kohte Joban pumma khuhah nâhah chendangthuk hen ngale nema atenâng putedâlem junko mêmo chendangthuk hèn, erohkoba nema thonghun letma dâlem ekenpa Asâthôanju chaanma jêngdong dongwãng erea.

¹⁴Ngalemruchha heh: Nga dedema nekhua asen tuta jôba edangthem en ngama thonghun ekang, chenrãngma ngako, nekhuma chentôpa ajet, ngale nekhu dedemin wathema wathe nâng tajien hethômin en.

¹⁵Rohkomin are sitiko ngama lechei thangma chenni ngin akomin raang lekma nekhu nâng ngakthông thôkoh huneka. Arepa Joban ma Nganâng ate mînchenchaan pa kohjunko nenâng lechei thangma thôkohrãng ngaekang

¹⁶erepa Jews ledangte heh demnâng moatrãng nga a Jisu Krista haarãng dangthuk ehang. Ngale ngama soam aroakte rãngrãng danglekma Joban wah Nginkongsen pa phoangthô ekang, erepa Jews ledangte hehmin Joban rinmeli joapsoap wah rãngrãng chendanga, ngale Asâthôanju junma Joban moatlem nâng lolo chenkepwak a ngama moekang.

¹⁷Erohwah, Jisu Krista demnâng roam lekma, Ngama Joban moatlem moekang pa rângthô ekang.

¹⁸Nga junma Jisu Krista ma Jews ledangte hehma Joban ngin jienkeprãng chenni motah a ereheh lolo lechei thangma ethô ang. Arepa atema Jabkhab ngale moatlem junma moatwah,

¹⁹patritli ngale bâritli, erediko Joban Juchaan junma moatwah. Ngale Jeroselem wah Ilirikum nâng lanhuroh khoamka lekma Krista Nginkongsen pa senthemthem phoangthôtek.

²⁰Ngama chenriangko Krista Nginkongsen pa mathat chohtat a, eretheko thôhok kohrãng roantang thonghun lekma tongekang, erepa mihma humhôanrãng cheptah dekchôangko ngama hôan hunmek.

²¹Joban nyapraangma ngaeka, “Ate ngin mathat chohthô kohwah mihnyan hehma ekhea, ngale mathat chohtat wah mihnyan hehma ejetloa.”

²²Ngale Nga a netânâng chohmîn katrâng ngatwah melângdep lâjektek.

²³Rohkomin athângheh arethe kowah nga moatlem heh lâta motek, ngale ajahthem rangpâ mama nga netânâng kalekma nedemnâng chohmînrãng hunwah,

²⁴Erepa ngama athângheh chohmîn katrãng thonghun ekang. Nga Spein diaknâng katpoatko echohmîn hûa, ngale nga nekhu demnâng khuhah nâhah poatthe chohmîn lekma tôngdiko, nekhuma chohsû letma nga Spein nâng ewãngthuk ha ngama thonghun ekang.

²⁵Athângheh nga Jeroselem wah Joban mihnyan hehnâng chohsokrãng wãngekang.

²⁶Chenrãngma ngako Misidonia ngale Akaia wah Asâthem hehma Jeroselem wah Joban mihnyan hehwah tangchhih hehnâng thin hungsima chohsokrãng thonghun eka.

²⁷Erepa thindedema thônghun wah; rohkomin, linlinjô thinma metkep chohsokmin jôba. Chenrãngma ngako, Jews hehma chohthin ju khope pa Jews ledangte hehmemin choh eka, erohwah, Jews ledangte hehmemin thinma Joban wah chhahkhem wanlem ngenâng rangkep eka hehwah Jews hehnângmin chohsokmin.

²⁸Chenthu ngama are moatlempa mera motekko, ngale thinrãng khôansetah ngunheh thinnâng mechohkoh tekko, Nga Spein nâng katmin ngale enâng katlemko netânâng elien chohmîn thienrâng.

²⁹Ngama ajet, chenthu Nga netânâng hokko, Ngama Krista wah ajahthem rangkep lekma ehûrâng.

³⁰Ngalemruchha heh, nãng Teso Jisu Krista ngale Juma kohehi ahun junko, Ngama nenâng rosep eka: Nãngkhu roamlihma ngarãngma Joban nâng chaanhôan lihma rangroamsoam e.

³¹Judia wah Joban nâng lepute dâlemte hehwah chenpe ang ngama soamkohha, ngale ngama Jeroselem wah Joban nâng putedâlemte hehnâng chohsokrãng kephû ekang heh junko thinhung chensen a ngama soamkohha.

³²Ngale Joban hungsi medang ako, eredikoba nga netânâng khuhah nâhah danglekma ehûrâng, ngale nekhu chohmin lekma khuhah nâhah edangang.

³³Nãngnâng mêmo kohte Joban pa nekhu phangtang demnâng chentonghèn. Amen.