Read Nocte Naga Rom 16 Bible Online

Rom 16 - Nocte Naga bible

Rom 16

¹Kenkria wah Asâthem hehnâng chohsok moatlem moatte nãngkhu nya Fobi pa ngama nenâng jetthuk eka.

²Joban nâng putedâlemte mihnyan rãngrãng dangletma, Teso mînko nema ate asenma tãngroo en, ngale atema ne ngewah chenjô mehun akomin atenâng chohsû en; chenrãngma ngako atea chentô mihnyan heh demnâng lemruchha sen, ngale ngademnâng min lemruchha sen jôba.

³Nga demnâng Jisu Krista moatlem johmoatte Prisila ngale Akuila nii nângmin ngama salem matkat erâng;

⁴thinma ngarãng memin roandông kohlahma moeka. Ngama thinnâng dangkoh a ngaekang - ngale ngama lolo ngat dangmek, rohkomin Jews ledangte Asâthem hehmemin ngaeka.

⁵Thin hum kowah khôante Asâthem hehnângmin salem matkat erâng. Ngalemruchha Ipanitus nângmin salem matkat erâng, atea Asia diakko Jisu Krista nâng khebeng thôan putedâlemte.

⁶Nekhu rãngma nyahrãng latrii lahma chaanrit moatte Mariam nângmin matkat erang.

⁷Andronika ngale Junia nii nângmin matkat erang, ngale ngademko phâtek nâng johtongte ngalemru Jews hehnângmin matkat erang; thin a moattat chhoante hehma senthemthem jet a, ngale thin a nganoma Kristan khema kepwah.

⁸Teso nâng soamtô ko nga demnâng johdângte ngalemruchha Ampliata nângmin salem matkat erang.

⁹Nãng demnâng Krista moatlem johmoatte Urbanas nângmin salem matkat erang, ngale ngalemruchha Steka nângmin matkat erang.

¹⁰Apele nângmin salem matkat erang, ngale atema Krista nginkepkep danglahma senthemthem soamtô ekapa jeteka. Ngale Aristobulu hehtang humte heh phangtang nângmin matkat erang.

¹¹Ngalemru Jews Hirodion nângmin salem matkat erang, ngale Narsisus heh hum wah Kristan hehnângmin salem matkat erang.

¹²Teso moatlem moatte Trifenna ngale Trifosa nii nângmin salem matkat erang, ngale Teso rãngma ajahthem moatlem moatte ngama nyahrãng ahun lemruchha Parsis nângmin matkat erang.

¹³Teso rãngma nyahrãng kaamsen moatte Rufus nângmin ngama salem matkat erang, ngale nganângmin ate chha rãngrãng hunte Rufus nyong nângmin salem matkat erang.

¹⁴Ngale ngama Asinkritus, Phegon, Hermes, Patroba, Hermas, ngale thin demwah Kristan mihnyan heh phangtang nâng salem matkat erang.

¹⁵Filologus ngale Julia, Nereus ngale ate nya, erediko Olimpas ngale chentô thin demwah Joban nâng putedâlemte hehnângmin salem matkat erâng.

¹⁶Wathema wathe nâng dek chohpekmîn letma salem hôanmin en. Krista nâng Putedâlemte Asâthem heh chentôma nenâng salem matkat ehèn.

¹⁷Ngalemruchha heh, ngama nenâng rosep eka: Mihnyan heh phansiette ngale nema niwah chohtattet ngin heh lelatnâng danglahma mihnyan heh putedâlem chhihsiette mihnyan hehwah jetletma dangen. Ngale thin tâwah ataang re en!

¹⁸Chenrãngma ngako arerãngrãng moatte hehma nãng Teso Krista nâng soamtô dangmah, thinwok phoatrãng loloba moeka. Thinma jabkhabsen jab le thuntu pumma nokba toangtang heh diapchhah eka.

¹⁹Anga ngama nema nginkongsen pa senthemthem kep eken ngama lâtattah, ngale erejunko nga nekhu demnâng nyahrãng khuhah ekang. Ngale, nema asenli pa senthemthem chenmam jet en, erediko achhihli kowah ataang chenmam re en, ngama thonghun ekang.

²⁰Ngale nãngnâng mêmo kohte Joban pumma joak ajo pa ne daphâ khenko sitsiak ekhihnek a. Nãng Teso Jisu mînchenchaan pa nekhu demnâng chentonghèn.

²¹Nga demnâng moatlem johmoatte Timothi memin ate salem matkat ehèn; ngale ngalemru Jews Lukius, Jason, ngale Sosipater hehmemin thin salem matkat ehèn.

²²Are siti raangte pa nga Tertius memin nekhu nâng Kristan salem matkat eka.

²³Nga humjek Gaius, ngale ate humko Asâthem heh rângkhôan e, ate memin salem matkat ehèn; ngale ere hahdaang kowah ngun thiente Irastas erediko nãngpho Kuartas memin nenâng thin salem matkat ehèn.

²⁵Joban mîn dongthuk e! Ngama nenâng Jisu Krista junma Nginkongsen thôkotah junko, ngale ama thuma ajahthem rangpâ rãng toangtang ngin huhriem tahpa loatkhesok junko, atema ne putedâlem pa rongtêngtêng eta dangthuk hèn.

²⁶Athângheh ere toangtang pa mõng hehma raangwah junko loat eka; ngale roantang roanjêng Joban ma chien junko chentô diak akan hehnâng jetthuk eka, erohwah anga ngama putedâlem eka.

²⁷Wanthe lolo Joban, ngale atelolo jôba chentôpa tajette Joban pa Jisu Krista junma roantang roangjêng rãng mîndong thuk e! Amen.