Read Nocte Naga Rom 2 Bible Online

Rom 2 - Nocte Naga bible

Rom 2

¹Ngalemruchha, nema mihnâng athe ngaeken a? henjô medang enkomin, mihnâng eroh ngatte nangmin pemoh. Chenrãngma ngako mihnâng athe ngama ngaletma nememin thinrãngrãng memo enko, nedede nângba athe ngarii eken.

²Nãngma ajet chenthu Joban ma eroh moatte hehnâng athe ngaeka pa, toangtangko ngaeka.

³Rohkomin ngalemruchha heh nema mihnâng athe ngama ngaeken moatlem heh nema moeken! Nema eroh moletma Joban wah chêm lechoh edange ngama thonghun eken a?

⁴Ba nema atewah adongthôan mînchen, atâdô, ngale hungmông heh lekep dangthem eken. Linlinko nema Joban mînchenchhan pa jetmin, chenrãngma ngako atema nehung litthuk hun ehèn.

⁵Rohkomin nehung pa nyahrãng hungcheh, erohwah nema Joban rinkhah ngale toangtangma ren Rangwo hongkat jâko nema chohmin nechêm pa jêngjah jahsiet reken.

⁶Chenrãngma Joban ma anga nganâng henma chenroh motah a erejunko ekoh a.

⁷Wawathe hehma asenli heh molahma, mîndông, choangpe, ngale leriili roandông pa lemeka; erehehnâng Joban ma roantang roanjêng lethôan roandông ekoh a.

⁸Khaka mihnyan hehma moatlem chhih dijunrãng chhahnyoak dangeka ngale toangtangpa kepmah; ereheh khohnâng Joban ma ate nyahrãng rinkhah chaanpa elên a.

⁹Henhenma kaamchhihli moeka ereheh phangtangma chêm echoh a, khebengko Jews hehma ngale Jews ledangte hehma echoh a.

¹⁰Rohkomin henhenma asenli moeka erehehnâng Joban ma mîndông, choangpe, ngale mêmo ekoh a, khebengko Jews heh erediko Jews ledangte hehnâng ekoh a.

¹¹Chenrãngma ngako Joban ma anga nganâng mãnthema ren eka.

¹²Jews ledangte hehnâng Mosa Niemarang pa aho; thinma pap molahma Niemarang junko ledangma mahrii eka. Rohkomin Jews hehnâng Mosa Niemarang win; thinma pap molahma Niemarang junko athe loeka.

¹³Chenrãngma ngako Niemarang pa atatlolo tatrãngma mihnyan pa Joban demnâng toangtang jiendangmah, Niemarang pumma chenroh ngaeka ererãngrãng moatte peba toangtang tâdângmin.

¹⁴Jews ledangte hehnâng Niemarang pa aho; phumma Niemarang ahojô medang akomin, thin hungsima Niemarang ma chieneka ere moatlem heh moeka pejôba thin niemarang rãng dangeka.

¹⁵Thin moatlem junma Niemarang ma chien ekapa thinhung nâng raanglahma khesok eka. Ngale thinhung memin erepa toangtang ngama khesok eka, chenrãngma ngako poatpoat theko thinhungma achhih moeken ngama ngaeka, ngale poatpoat theko asen ngama ngaeka.

¹⁶Ngale, Ngama thôekãng Nginkongsen junko, chenthu Jisu Krista junma Joban ma mihnyan hungkhen nâng huhthonghun eka heh rênjâ Rangwo ko eroh dângmin.

¹⁷Nea chenroh dângmin a? Nedede Jews ngarii eken; Nema Niemarang ko tok anaa letma Joban nâng soamte ngama ngamrii eken;

¹⁸Joban ma chenni moatrãng hun ehèn a erepa nemajet, ngale asenli pa rênrãngma nema Niemarang kowah chohjettet;

¹⁹Nema nia mitdoak heh lemsênte, ngale rangnyek khenwah hehrãngma wenphiak ngama ngarii eken,

²⁰ngale aba hehnâng hethôte, ngale chenjô lejette heh chhinthôte ngama ngarii eken. Ngale nema Niemarang pa phangtangma lâjettih erediko nima thôekipa toangtang ngama ngaeken.

²¹Nema mihhan nâng hethô eken - phumma nedede chenrãngma lehethôrii reken a? Nema, “Ahuh leremin,” ngama phoangthô eken - phumma nededema ahuh reken a?

²²Nema ngaeken, “Mihdihiak dela kaamchhih lemomin” - rohkomin nema chhihmo eken a? Nema moangachaang nâng chinnya eken - rohkomin nema rangsoamhum kowah huh eken a?

²³Nema ninâng Joban Niemarang win ngama rângthô eken - rohkomin nema Joban Niemarang heh chhihsiet letma ate rêsêthuk eken a?

²⁴Joban nyapraangma ngaeka, “Jews heh nekhu junwah, Jews ledangte hehma Joban nâng chhih ngaeka.”

²⁵Nema Niemarang pa mekep enko, khoankhen niem hôan ekenpa mahto ledangmin; rohkomin nema Niemarang pa lekep medang enko, nea chenthujô khoankhen niem mathat hôanwah rãngrãng jôba edangen.

²⁶Phumma Jews ledangte, khoankhen niem lehôante jat, pumma Niemarang pa mekep ako, Joban ma atenâng khoankhen niem hôanchhoante rãngrãng lekep minne?

²⁷Ngale ne Jews hehnâng Jews ledangte hehma achhih engahèn, chenrãngma ngako, Niemarang pa nema raangthien wahjô medang enkomin, ngale nea khoankhen niem hôantejô medang enkomin, nema Niemarang pa kepmet; Rohkomin thin a phoangko khoankhen niem lehôanjô medang akomin, thinma Niemarang pa kep eka.

²⁸Eroh medang ako, alinlin khoankhen niemhôante Jews linlinpa hen a? rangkhohkhoan phoangko lolo khoankhen niem hôante pa Jews tadangmah.

²⁹Erenoma, rinken khennâng Jews dângte peba Jews linlin, erehehma, hungkhen nâng khoankhen niem linlinpa hôan eka, ngale erepa Joban Juma hôan eka, dekma raang wah Niemarang junko hôan dangmah. Ererãngrãng hôante hehma mihnyan wah ledangma Joban wah rô choh eka.