Read Nocte Naga Rom 3 Bible Online

Rom 3 - Nocte Naga bible

Rom 3

¹Eroh medang ako, Jews hehma Jews ledangte hehwah chenni bâmchoh letma tonga? roh akole khoankhen niemhôan ko bâmsen eken a?

²Linlin ajahthem lemkhonâng Jews hehma bâmchoh letma tonga! Khebengthôan pejô Joban ma ate nginkongpa Jews hehnâng bengkohwah.

³Rohkomin khakama toangtangma leputedâlem rãngma chenni dângmin a? Erejunko Joban ma toamhoan tahpa toangtang ledangmin ne?

⁴Eroh chenthumin dangmah! mihnyan heh phangtangjô mothô medang akomin, Joban pa toangtang. Joban nyapraangma aroh ngaeka, “Nangma jab eko jabkhab pumma nanga toangtang ngama chenkhesok a; ngale chenthu nangnâng metlo lahma mesekham hoko, erepa nangma jien o.”

⁵Phumma nãngma kaamchhih molihma Joban ma kaamsen moeka pa senthemthem mekhesok eko chenroh dângmin a? Joban ma nãngnâng kaamchhih moatthã mechêmthuk hiko, Joban ma kaamchhih moeka ngama tanga ea? (Khaka mihnyan hehma aroh eta thôngpha them a.)

⁶Eroh jiendangmah! Joban pa toangtang ledang kako, atema hahtokkhoh pa chenroh jienrênmin a?

⁷Phumma nga mothô khôanglep junko Joban mîn dongthuk lekma ate toangtangpa senthemthem mekhesok angko, nganâng chenrãngma papi ngama thamlek chhihngat min a?

⁸Eroh medang ako, “Asenli chenhonga ngama kaamchhih moea”? Ngama aroh jabdi, linlinjô mihnyan khuthema nganâng dûmmek thang! Joban ma thinnâng achhih enga a.

⁹Eroh medang ako, nãng Jews heh Jews ledangte heh noma asenne? Chenni nângjô bâmsenmih! Ngama nenâng Jews le Jews ledangte heh phangtang papchaan khenko khoakthe tuta ngama khesoktah.

¹⁰Joban nyapraangma aroh ngaeka: “Wathejô toangtangho,

¹¹Wathemin chhin achhiak aho ngale Joban nâng soam atôte min aho.

¹²Anga nga Joban tâwah ngakchhoan tah; ngale thin phangtang chhihjâ tah; henjô moatlemsen moatte aho, wathelolo minho.

¹³Thin jabkhab hehmin achhih tuta; ngale thin theli wahmin mothô khoanglep lolo hongeka, ngale thin thunwah pûbi rãngrãng achhih heh hôngjabwên era;

¹⁴ngale thin jabkhab hehmin mihnâng têm athoak jabkhab lolo.

¹⁵Thin a sitsiak buhawat ngale ritphe phûngphûngjû;

¹⁶Thin chenkojô mechhoan akomin erethepa chhihsietthien eka.

¹⁷Thinma mêmoma sông lemkhô pa jetmah,

¹⁸ngale thinma Joban ranchei pemin jetmah.”

¹⁹Nãngma ajet, Niemarang kowah chentôpa Niemarang khenko sôngte hehrãngma raangeka, ngale Niemarang pumma mihnyan heh phangtang kihtong thuk eka ngale hahtokkhoh mihnyan phangtang Joban ma eren a.

²⁰Chenrãng-ma ngako Niemarang pumma chenni ngaeka ereheh molihma henmin Joban mitsokko toangtang tadangmih; Niemarang pumma nãngma papkaam lâmotih ngama khesok rãngba moeka.

²¹Rohkomin ade phumma Joban ma mihnyan heh atedede demnâng toangtang dângthuk lemkhô pa lâhõngtah. Are lemkhô pa Mosa Niemarang ngale Mõng heh mejô thôkoh wah medang hikomin, Niemarang pa kep junma dangmah.

²²Mihnyan hehma Jisu Krista nâng putedâlem junko Joban ma ate demnâng toangtang dangthuk eka. Joban ma arepa henhenma Krista nâng putedâlem eka ereheh toangtang dangthuk eka, chenrãngma ngako chentô mihnyan nyuchha pa khoakthe tuta:

²³anga nga papi tuta, ngale erohwah hennâng min Joban wah khope chaanpa aho.

²⁴Rohkomin Joban ma atewah mînchenchaan pa nãng pesiette Krista Jisu junma thahoma kohlahma nãng ate demnâng phangtang toangtang dangthuk ehi.

²⁵Joban ma Jisu Krista ritphe thukwah, erohwah ate hei junko ngale mihnyan hehma atenâng putedâlem junko mihnyan heh pap map choh eka. Joban ma aroh moeka pa atea toangtang ngama khesok rãng moeka. Amako atema hungmông sietrii lahma mihnyan hehnâng thinpap junko lechêmthuk dângwah; phumma athângheh sanpoat komin Joban ma ate toangtangpa jienkhesok rãngma thinpap heh mapkoh eka. Aroh Joban ma ate toangtang pa khesok eka, rohkomin henhenma Jisu nâng putedâlem eka heh loloba toangtang dangthuk eka.

²⁷Eroh medang ako nãng dedema chenni rângthôrit thin etonga? Chenni rângthôrit thinjô aho! Ngale erepa chenni junma dangeka? Erepa nangma Niemarang pa kep junko dangeka? Erejunko dangmah, nãngma putedâlem junko dangeka.

²⁸Chenrãngma ngako putedâlem junma lolo jôba mihnyan pa Joban demnâng toangtang dangeka, Niemarang ma chenni ngaeka erepa moatjunko dangmah.

²⁹Roh akole Joban pa Jews heh Joban lolone? Atea Jews ledangte heh Joban ledangne? Jews ledangte heh Joban min danga.

³⁰Joban pa wathe jôba, ngale Joban ma Jews heh thin putedâlem junko ate demnâng toangtang edangthuk a, ngale Jews ledangte hehmin thin putedâlem junko jôba Joban ma ate demnâng toangtang edangthuk a.

³¹Phumma nãngma putedâlem junko Niemarang heh chhihsiet lere ekia? Chenthumin nãngma chhihsietmih; erenoma, putedâlem junko nãngma Niemarang pa dongsiet eki.