Read Nocte Naga Rom 8 Bible Online

Rom 8 - Nocte Naga bible

Rom 8

¹Erohwah, ade phumma hen Jisu Krista demnâng dangeka ereheh nâng achhih lenga tumin.

²Chenrãngma ngako Jisu Krista demnâng roamlahma nãngnâng roandông kephok kohte Ju niemarang, pumma nga pap ngale rit niemarang kowah lâpesiet thang.

³Mihnyan hei angem pumma Niemarang pa boansiet lahma Niemarang pumma letamo dâng phumma, Joban ma moeka. Joban ma ate Chhapa mihnyan hei angem phoang rãngrãng litdangthuk lahma, hahtokkhoh wah pap heh repherãng chienkat era.

⁴Joban ma are moeka pa mihnyan hei angem junko ledang Ju junko songtong lihma Niemarang junko toangtang tâdângrãng moeka.

⁵Henhen thinhei angem pumma chenroh thôkoh eka erejunko songtong eka, ereheh thinhung arinma chenroh huneka eroh edanga. Ngale henhen chenroh Juma thôkoh eka eroh songtong eka ereheh hung arinpa Juma chenroh huneka eroh edanga.

⁶Mihnyan hei angem hung arinma mepên ako rit rêmin; rohkomin Juma mepên ako roandông ngale mêmo chohmin.

⁷Ngale chenthu mihnyan heh thin hei angem hung arinma mepên ako Joban demnâng ranrãngrãng dângmin; chenrãngma ngako thinma Joban Niemarang pa kepmah, ngale linlinjô thinma ere Niemarang pa takepmah.

⁸Henhenma thin hei angem hung arin ngin kep eka erehehma chenthumin Joban hung tasen thukmah.

⁹Rohkomin nea ne hei angem hung arinma thôkoh ehèn junko nekdangen; erenoma, Juma chenroh thôkoh ehèn a eroh dangen - eroh medang enko Joban Ju nehung khennâng linlin etonghèn. Henhen nâng Jisu Krista Ju aho dangeka ereheh Krista rãng tadangmah.

¹⁰Phumma Krista nehung khennâng metong hènko, Jupa nerãngma roandông edanga chenrãngma ngako pap junma ne phoang pejô rit mere akomin nea Joban demnâng toangtang dangthuk ehèn.

¹¹Jisu Krista ritwah ngakhînsiette Joban Jupa nehung khennâng metong hènko, ere Jisu Krista ritwah ngakhînsiette pumma ate Ju nedemnâng johtong lahma ne hei angem phoang komin roandông ekoh a.

¹²Erohwah ngalemruchha heh, nãngma moatlem moatthin tonga, rohkomin erepa nãng hei angem hung arinma chenroh huneka eroh lemomin.

¹³Ne hei angem hung arinma chenroh huneka eroh medang enko, nea rit rêmin; rohkomin Ju junma ne phoangwah pap moatlempa meritphe enko, ne ehin en.

¹⁴Ngale henhen Joban Juma seneka ereheh Joban chha.

¹⁵Chenrãngma ngako Joban ma nenâng koh ehèn Juma ne haarãng kepmahhèn ngale cheisiet mahhèn; erenoma Ju pumma nea Joban Chharãng dangthuk ehèn, ngale Ju chaanko nãngma Joban nâng, “Wa! Ewa!” ngama taroo eki.

¹⁶Joban Jupa ate dedema Ju demnâng roaplahma nãnga Joban Chha ngama loatjab eka.

¹⁷Nãnga ate Chha dâng phumma, Joban ma ate Chha hehrãng thienkotah rangpa nãngma kepmin, ngale Joban ma aterãng chenni thienkotah a ereheh nãngma Krista demnâng ejohchoh e; chenrãngma ngako nãng Krista demnâng mejohchêm eko, ate mîndông komin ejohroam e.

¹⁸Ngama jet ekang, athâng hehwah nãng chêm ekipa khediwah nãngma mîndông chohthin demko tâthakmîn thin dangmah.

¹⁹Hahtokkhoh wah chentô hînjebjeb pumma Joban ma ate chha heh chenthu khesokkatmin a ngama nyahrãng ngiaklahma bemeka.

²⁰Chenrãngma ngako Joban ma chentô tem atiek tahheh chhihjâ erea, rohkomin erepa ate dedema hunlahma chhihjâ dangmah, Joban ma jôba eroh chendanga ngama huneka. Erohjô medang akomin dâlem pa tonga

²¹Joban ma chentô tem atiektah hehmin jâthe rangwo chhihjâli khenko haa rãngrãng danglahma tongtah kowah epe chhoanwak a, ngale Joban Chha heh demnâng chenthumin lechhihjâli mîndôngko ejohroam a.

²²Chenrãngma ngako nãngma ajet, athâng hehmin Joban ma chentô tem atiektah a erehehma naachhat wokkakko rângchhâ arãngrãng chhâlahma bemwak eka.

²³Phumma are chêm nungma bemla ekapa Joban ma tem atiektah hehma lolo bemla dangmah; nãngkhumin Joban ma ate Jupa nãngnâng khebeng thôan hînhô rãng kohehi ereheh memin nãngdede hungkhen ko chêmlihma nãngmin Joban ma ate Chharãng hôanpa bemlaeki, ngale nãngphoang phangtang pesiet pa bemeki.

²⁴Chenrãngma ngako dâlem junko jôba khope eki; rohkomin nãngma chenni nâng dâlem ekia erepa nãngmitma mekhe eko, erepa dâlem linlin dangmah. Chenrãngma ngako henma khelahma that dâlemtah a?

²⁵Rohkomin nãngma lekhe thangma medâlem eko, erepa nãngma hungmông sietlihma ebem e.

²⁶Ererãngrãng nãngma leta thangma dângpoatko Ju kalahma nãngnâng chohsû kaehi. Chenrãngma ngako nãngma chenroh rangsoam min a erepa jetmih; erohwah Juma nyahrãng chêmchoh lahma ate dedema Joban nâng nãngrãngma leta chhemhunli heh hongjab lahma rosep kohehi.

²⁷Ngale nãnghung lienkhete Joban pumma Juma chenni thonghun eka erepemin jeteka; chenrãngma ngako Ju pumma Joban nâng ate mihnyan hehrãngma rosepkoh eka ngale ate hung junko rosepkoh eka.

²⁸Nãngma ajet Joban ma atenâng hunte hehrãngma chentôpa asenrãng moeka, ngale ere mihnyan heh atema themawa lahma ma rooeka.

²⁹Henhen pa Joban ma renlahma thieneka ere mihnyan heh ate Chha rãngrãng dângrãngma araangraang reethien eka, erohwah ate Chhapa humkâdong kowah khhepho chha dangeka.

³⁰Ngale henhen pa Joban ma araangraang reethientah a, ereheh atema rooeka; ngale henhen pa atema rooeka, ereheh ate demnâng toangtang dangthuk eka, ngale erehehnâng Joban ma ate mîndôngko johroamthuk eka.

³¹Ephumma areheh junma nãngma chenni ngatmin a? Joban pa nãngrãng medang ako, nãng lelatnâng hen tâdângmin a?

³²Linlin Joban ma atedede Chhapa tumin lebâ thangma nãngkhu anga ngarãng kohwah! Atema nãngnâng ate Chhapa koh ehi - lihân heh jãtanga atema nãngnâng phangtang lekoh minne?

³³Joban ma reneka mihnyan hehnâng henma tâsêkhâm min a? Joban ate dedema ere mihnyan hehnâng themah ngaeka!

³⁴Eroh medang ako ereheh nâng henma athe ngama tângatmin a? Riilahma ngakhintah Jisu Krista pumma Joban dekchahko tonglahma nãngrãngma Joban nâng rosep kohehi!

³⁵Eroh medang ako Jisu Krista hunwah henma nãng tâphansiet min a? Chêmchei ma ale, mihma chêmthuk junko ale, rêm achhongma ale, tangchhih, cheili, ba rit amah ma tâphansiet min a?

³⁶Joban nyapraangma aroh ngaeka, “Nerãngma nia roantang riiamah nemnemjû tongeki; ngale nia ajoatrãng ngaeka saak rãngrãng hôanehi.”

³⁷Eroh dangmah, nãngnâng hun achette junma chentô nâng nãngma phangtang tajien eki!

³⁸Chenrãngma ngako ngama linlin ajet, Joban hun kowah nãng chenni mejô taphansiet mahhi: rit mere komin ba ahîn medang ekomin taphansiet mahhi, Joban ngintatte, ba rangkhethung wah ahan pênte ngale chaan kepte hehmemin, athâng hehmin ngale khedi komin leta phansietmin,

³⁹rangkho ngewah memin, ngale hahkhenwah memin - Joban ma tem atiektah hehmemin chenni mejô nãng Teso Jisu Krista junma Joban ma nãngnâng hun ehi kowah taphansiet mahhi.