Read Nocte Naga Rom 9 Bible Online

Rom 9 - Nocte Naga bible

Rom 9

¹Ngama toangtang jabekang; Nga a Krista rãng ngale ngama mothô thômek. Ngahung ngarinmin Asâthôanju ma pêneka, ngale ereheh junma nga ma mothô thômek ngama jetrii ekang

²Ngawah hungchhih pa chentô dônga, ngale ngahung khennâng leta jekli chhâ ehang

³ere chêmpa nga mihnyan ngale ngadede hei angem hehrãngma choh ekang! Thinrãng mejô mesen ako nganâng Joban memin chentem athoak hang ngale Krista tâwahmin chenphansiet hang ngama hun ekang.

⁴Thin a Joban mihnyan; ngale Joban ma ate Chharãng hôan eka, erediko ate mîndông pa thinnâng khesok eka; Joban ma thin demnâng kahkhetmin lahma thinnâng Niemarang pa koheka; erediko toangtangma soam aroak thuk eka; ngale Joban ma toamsem tahpa thinma choh eka;

⁵thin a nãngte nãngwa Hibru linlin heh chhuchha; ngale mihnyan nyuchha junko Krista min thin pôali. Chentô khohko adong danglahma pênte Joban mînpa roantang roanjêngma rôlihma thien e! Amen.

⁶Joban ma toamsem tahpa thetah ngat dangmek; chenrãngma ngako chentô Isrial mihnyan heh phangtang Joban mihnyan dangmah.

⁷Ngale chentô Adam chhuchha hehmin Joban Chha tuta dangmah. Joban ma Abraham nâng ngatwah, “Ngama nangnâng toamsemtih pa Isak junma nangchhu achha echoh o.”

⁸Are ngaeka pa mihnyan hei angem junma chhaeka heh Joban Chha ngat dangmah; erenoma, Joban ma toamsêm wah junko chhatah heh ba linlin Abraham chha.

⁹Chenrãngma ngako Joban toamsem pa aroh sêmwah: “Sanpoat methâng tahko nga engak hûrâng, ngale Sara ma dela Chha echha a.”

¹⁰Ngale arepa lolo dangmah. Ribika Chhamin dela wanii dângwah, phumma erenii Wa pemin nãngte nãngwa Isak dângwah.

¹¹Rohkomin chha wanii kowah wathepa Joban dedema them athak lahma reneka ngama jetrãng, Joban ma Ribika nâng ngatwah, “Khhepho pumma naadi pa toak asânmin”. Joban ma arepa thinchhat mama ngatwah, ngale thinma chenjô chhihmin ngale asenmin mamoma ngatwah; erohwah Joban ma reneka pa jôba rooeka, ngale erepa thinma chenni komin moatjunko rên dangmah.

¹³Joban nyapraangma aroh ngaeka, “Ngama Jakob nâng hun ekang, rohkomin Ngama Isau nâng chhihchoh rekãng.”

¹⁴Eroh medang ako nãngma Joban nãng thhensokte ngama lengaea? Eroh chenthumin jienngamih.

¹⁵Chenrãngma ngako atema Mosa nâng ngatwah, “Ngama hennâng hun ekanga ereko ehun ang; ngale ngama hennâng mînchen hun ekanga ereko emînchen ang.”

¹⁶Erohwah, chentôpa mihnyan ma chenroh huneka ngale atema chenroh moeka erejunko dangmah, Joban ma mînchen eka junkoba dângmin.

¹⁷Chenrãngma ngako Joban nyapraang ma Igip lowang nâng ngatwah, “Ngama nanga Nga chaanpa khesok rãng ngale Ngamîn hahtokkhoh phangtang nâng jetthuk rãng lowang rãng hôanwah.”

¹⁸Erohwah, Joban ma hennâng huneka ereko mînchen eka, ngale atema henhung chehsiet huneka ere hungpa chehsiet koheka.

¹⁹Rohkomin nekhuwah wathema nganâng engaha, “Eroh medang ako, Joban ma nãngnâng achhih ngama chenroh jienngat min a? ngale atema hun ekapa henma tâjektâng min a?”

²⁰Rohkomin, ngalemruchha heh, nema Joban nâng aroh ngakdânthang rãng nea hen a? Hahtit pumma ate hôante ko, “Nangma nga chenrãngma aroh hôan ehanga ngama chenthumin ngamah?”

²¹Chenrãngma ngako, hahtit hôante mihnyan pumma atema chenroh hôan huneka eroh ate hungsiko tahôan a, ngale boakngek kemthe kowah tit phangnii rãngmin tahôan a, phangthe pa kuhsen kansen nâng keprãng hôaneka ngale phangthe pa jengreko kaprãng hôaneka.

²²Ngale ererãngrãng jôba Joban memin moeka. Atema ate rinkhah pa khesokmin huneka, ngale ate chaan pemin jetthuk huneka. Rohkomin ate rinkhah hongeka mihnyan, ngale amahritte mihnyan heh demnâng ate hung nyahrãng mônglorii lahma tongeka.

²³Ngale Joban ma ate mîndong pa khesok huneka, ere mîndong pa Joban ma ate ngewah mînchen chohte heh khohnâng koheka. Ngale Joban ma ere mîndong pa chohrãngma nãngkhu khoakhem ehi.

²⁴Chenrãngma ngako nãnga atema roowah mihnyan, phumma arepa Jews hehwah lolo roo dangmahhi, Jews ledangte heh wahmin rooeka.

²⁵Erohwah atema Hosia titab ko aroh ngaeka: “Ngarãng ledangte mihnyan heh Ngama ‘Nga mihnyan’ ngama eroo ang. Ngama lehun diak akan hehnâng Ngama ‘nyahrãng ahun’ diak akan ngama enga ang.

²⁶Ngale ‘Nea nga mihnyan dangmet’ ngama ngatah thekojô, thinnâng ahîn Joban Chha ngama ngatmin.”

²⁷Ngale Isaia ma Isrial hehrãngma ngatwah: “Isrial mihnyan heh josi kahwah sejahtô medang enkomin, khopete pa mãnchha dângmin;

²⁸chenrãngma ngako Teso ma hahtokkhoh wah mihnyan heh chhih asen pa sitsiak eren a.”

²⁹Arepa Isaia ma khema ko ngatah rãngrãng, “Adongthôan Teso ma nãngrãngma nãngte nãngwa heh roanche pepâng lahma lethienkoh nomako, nãnga Sodom rãngrãng dângmin wah, ngale Gomora rãngrãng chenriitih.”

³⁰Erohwah nima arepa ngaeki, Joban demnâng toangtang dâng lehunte Jews ledangte heh, putedâlem junma Joban demnâng toangtang dangeka;

³¹Ngale Joban mihnyan hehma Joban demnâng toangtang chendangthuk hi ngama Niemarang lemwak eka, rohkomin thinma chohlemmah.

³²Ngale chenrãngma lechoh rewak eka? Chenrãngma ngako thinma putedâlem junko ledangma thinma chenni moeka ekololo tok anaa lahma lemwak eka. Ngale erohwah dakho thutthin longko thin “Dakho thutrii eka”

³³ngale erejunma Joban nyapraangma ngaeka: “Sû en, Ngama Zion nâng longthien ekang, ere longko mihnyan heh dakho ethutrii a, ngale ere longjan pumma thin kôanritthuk erea. Rohkomin henhenma atenâng putedâlem eka erehehma rêsê lechohmin.”