Read Nocte Naga 1 Korint 11 Bible Online

1 Korint 11 - Nocte Naga bible

1 Korint 11

¹Ngama Krista ngin hekang rãngrãng nememin ngangin heha.

²Ngama nenâng rôeka, chenrãngma ngako nema nga roantangma thonghun eha, ngale ngama nenâng hethô tahpa senthemthem kepdi rôeka.

³Rohkomin ngama nenâng arepa jetthuk huneka, dela pa ate dihiak khoko adong dangeka rãngrãng, Krista pa chentô mihnyan nyuchha khoko adong, ngale Joban pa Krista khoko adong.

⁴Erohwah delawa ma nok atang heh chhangnâng ate kho buklahma rangmesoam ako, ngale nok atang rangsoam thintheko Joban ngin khobuk lahma methôako, atema Krista rêsêthuk eka.

⁵Ngale dihiaknyu henma komin, ate kho lebukma nok atang chhangko rangmesoam ako ngale nok atang chhang rangsoam thintheko kho lebukma Joban ngin methôako atema ate tangwa nâng rêsêthuk eka; ererãngrãng kho lebukte dihiaknyu ngale kho lokchhunte dihiaknyu nii mãnthe.

⁶Dihiaknyu pumma ate kho lebuk medang ako, ate khopa khenphe chenrea. Ngale dihiaknyu rãngma ate kho lokchhun, ba khenphe pa rêsêli dâng phumma, atema khobuk chenrea.

⁷Delawa ma ate kho lebukmin, chenrãngma ngako, atea Joban rãngrãng hôaneka ngale Joban mîndongthuk eka. Rohkomin, dihiak pumma tangwamîn dongthuk eka;

⁸chenrãngma ngako dela pa dihiak wah hôanwah dangmah, rohkomin dihiak pa dela wah hôanwah.

⁹Ngale dela pa dihiak rãng hôanwah dangmah, rohkomin, dihiak peba dela rãngma hôanwah.

¹⁰Rangwah Joban ngintatte heh junko dangeka, dihiak pumma atea ate dela khenko songtong eka ngama khesok rãngma atema khobuk lahma tôngmin.

¹¹Nãng roandôngko Teso jetlihma sôngtôngko, dihiak pemin dela rãngma alem, ngale dela pemin dihiak rãngma alem.

¹²Chenrãngma ngako dihiak pa dela wah hôanwah, ererãngrãngjô dela pa dihiak wah chhaeka; ngale Joban ma jôba chentôpa hin ajo thukeka.

¹³Nedede rãngma thatthong hun tan en, dihiaknyu pa nok atang rangsoam thinko ate khoko chenjô lebukma rangsoam pa sen ale senmah a.

¹⁴Chengrãngma ngako, belem junkomin nãngma jet dela ma kholo pânpa ate rãngma rêsêli,

¹⁵rohkomin dihiak rãngma kholo pânpa ate phangsên thukli. Dihiak nâng kholo koheka pa ate khobuk rãngma koheka.

¹⁶Rohkomin are ngin khohko henma komin chhiakmîn mehun enko, ngama thôkoh eka, ninângmin ngale Joban nâng putedâlemte Asâthem hehnângmin are lêko lihân rangsoam niemarang ahotu.

¹⁷Ngama nenâng are jabkhab rîn akhah eka junko nenâng rômah, chenrãngma ngako, nekhu rangsoam rãng chohmîn ko asenli lemo thangma ajahthem ba chhihmo eken.

¹⁸Abengthôanko ngama tattek nekhu rangsoam rãng chohmîn ko nekhuchhang nâng hung lejut dangeken; ngale arepa nginlinlin ngama pute ekang.

¹⁹(Nekhu tungnâng hung lejut dangeken pemin chenjô dangmah, eroh medang enkoba, henhen pa roantangma toangtang dangeka erepa senthemthem ekhe e.)

²⁰Chenthu nekhu aroamma khôanpoatko phhekchhah ekenpa Teso phhekchhah chhah dangmet.

²¹Nekhu phhekchhah roamchhah poatko, khukama mihhânheh lebem thangma mâmâ dede thiakpa sitsiak chhah eka, erohwah khukapa rêmritma tong ngale khukapa lanmokroh jokphhek chhah eken.

²²Nekhuma jokphhek chhahrãng mâmâ dede hum ahone? Roh akole, nema Joban nâng putedâlemte Asâthem hehnâng chhihchoh ken ale, roh akole tangchhih hehnâng rêsêthuk hun eken a? Are ngin junko ngama nenâng chenni nga a? Ngama nekhu nâng rôrea? rômah!

²³Chenrãngma ngako ngama nenâng hethô tahpa Ngama Teso wah chohtatwah: Teso Jisu ate chênsâng rangpen ko, atema bankên chhupthe toansemwah,

²⁴ngale atema Joban nâng dangkoh a ngalahma bankên pa chhupsietwah, erediko atema ngatwah, “Are nga phoangpa nekhurãng. Arepa nganâng thonghun rãng nekhuma mo en.”

²⁵Ererãngrãngjô, thinma rangjâ phhekchhah tâchhah diko, atema bâti toansem lahma ngatwah, “Are bâti kowah hei demko Joban ma toamnyan sem eka. Chenthu nema arepa jokko, nganâng thonghun letma jok en.”

²⁶Are ngaeka pa nema are bankên pa phhek roakweih ngale are bâti kowah jokroakweih Teso mangak ngakka nema Teso rit nginpa phoangthômin.

²⁷Erediko henma komin Teso bankên kowah phhek ngale Teso bâti kowah joklahma Teso mîn mechhihsiet ako, atema Teso phoang ngale Teso hei lelatnâng pap moeka.

²⁸Erohwah, abengthôanko mâmâ dede bengjetrii mêngen, eredikoba bankên kowah phhek en ngale bâti kowah jok en.

²⁹Chenrãngma ngako chenthu nema bankên kowah phhek, ngale bâti kowah jok reletma, nema Teso phoang junko chenjô lejet medang enko, nema nedede nâng achhih ngarii letma phhek eken ngale jok eken.

³⁰Erohwah nekhuwah ajahthem heh khun atam reken ngale boan anaa dangjâ eken, ngale melâng ritmin riitah.

³¹Nãngkhu dedema abengko mebeng jetriimeng eko, nãngnâng Joban ma chhih ngatthin aho dângmin.

³²Rohkomin Teso ma nãngnâng rensû lahma phhekkhên nâkhên hôanehi, erohwah nãnga are hahtokkhoh wah mihnyan chhih heh demnâng lejohroam mahriimin.

³³Erohwah ngalemruchha heh, Chenthu nekhuma Teso phhekchhah pa phhekrãng meroamkhôan enko, anga nga bemmîn re en.

³⁴Ngale hen akomin rêmrit medang enko, humnâng chenchhah a, erohkoba nekhu aroamma khôanpoatko Joban ma nenâng achhih lenga edanghèn. Ngin ahan heh dangeka chenthu Nga netânâng hokko ephenthômîn e.