Read Nocte Naga 1 Korint 14 Bible Online

1 Korint 14 - Nocte Naga bible

1 Korint 14

¹Erohwah Hun achetmîn rãngma nekhu anga ngama moatmin. Ngale nehungma Juwah Hînhô chohrãngma thonghun en, ajahthôan pa Joban ngin phoangthô Hînhô chohrãng thonghun en.

²Henhenma ajatjat jabma jienjab eka erepumma mihrãng jab dangmah, Joban demnâng ba jabmîn eka, chenrãngma ngako, erepa mihma henmemin jetmah. Erepa thinma Juchaan junma Joban toangtang nginpa thôeka.

³Rohkomin henma Joban ngin phoangthô eka erehehma mihnyan hehnâng thôkoh eka ngale thinnâng chohsû eka, hung arin dongthuk eka ngale hung arinpa senthuk re eka.

⁴Henhenma ajatjat jabma patritli jienjab eka erehehma thindede chohsû re eka, rohkomin henhenma Joban nginpa phoangthô eka erehehma Asâthem heh phangtang nâng chohsû eka.

⁵Ngama nekhu phangtang ajatjat jabma jienjab letmele ngama thonghun eka; rohkomin ere nomemin nekhuma Joban ngin phoangthô Hînhô chohlet mele ngamaba thonghun ekang. Chenrãngma ngako, Joban ngin jienphoang thôte mihnyan pa ajatjat jabma jienjab eka nomemin ajahthem alemli, chenrãngma ngako ajatjat jab jianjabte pumma chenni jabeka erepa jienlitthôte metong akoba ere jabkhab pumma Asâthem phangtang asen edanga.

⁶Erohwah ngalemruchha heh, chenthu nga netânâng hokko, ngama ajatjat jabkhab jablekma mehû rângko nema chenni echoh ena? Nganâng Joban ma khesokwah ngin, jet ajien ngin, erediko nehung litli Joban ngin, ba nenâng chenni akomin hethô lere kako, nema asenli chhupthemin chohmet.

⁷Ahîntejat ledang sêsêko temthin nong, pupe, ngale bõngbe hehnâng thatsu tan en - thin a sêroat junko ledang phoangrah temroh mereako erepa henma jienjetmin a?

⁸Ngale rancheprãng pupe rahmette mihnyan pumma phenjaangjaang lerahmet medang ako, ranloatmîn rãng hen jienhông chepmin a?

⁹Ererãngrãng, nema ajatjat jabkhab jabletma Joban ngin thôkoh ekenpa phenjaangjaang ledang kako erepa henma jienjetmin a? ne jabkhab pa pongwutnâng emahjâa!

¹⁰Rangkhenko ajahthem mâmâ jatjat jabkhab tonga, eroh akomin chenre jabkhab pejô sekho nâng phoagro phoangwa mah.

¹¹Rohkomin thinma jabeka jabkhab pa ngama lejet medang angko, henhenma ere jabkhab jabeka erepa ngarãngma mihdiak mihnyan, ngale ngamin thinrãngma mihdiak mihnyan.

¹²Phumma nema Ju wah Hînhô chohhun dâng phumma, nema abengthôanko chenre pumma Asâthem hehrãng ajahthôan asen dângmin a erepa chohrãngma mo en.

¹³Erohwah, henma ajatjat jabma jabeka erepumma atema chenrãngma jabeka erepa tâjien litthô rãng Hînhô chohrãng rangsoam min.

¹⁴Chenrãngma ngako ngama ererãngrãng jabma rangmesoam angko, ngaju memin rangsoam eka, rohkomin ngahung ngarin pumma ere jabkhab pa jetmah.

¹⁵Eroh medang ako ngama chennire anga? Ngama ngaju demkomin rangjohsoam ang, erediko ngahung ngarin demkomin rang johsoam ang; Ngaju demkomin sêwah johse ang, ngale ngahung ngarin demkomin ejohse ang.

¹⁶Chenthu nema Joban nâng Juma lanlan rangmesoam enko, nekhu demwah jujabkhab lejette johkhôan hûera hehma nema Joban nâng dangkoh a ngat rangsoam soam ko “Amen” ngama chenroh jienjoh ngatmin a? Chenrãngma ngako nema chenni jabeken a erepa thinma jetmah.

¹⁷Nema Joban nâng dangkoh a ngaeken rangsoam pa nyahrãng asenjô medang akomin, epa mihhan hehrãngma chenjô asen dangmah.

¹⁸Ngama Joban nâng dangkoh a ngaekang, chenrãngma ngako, Ngama nekhu noma ajatjat jabma ajah jienjab ekang.

¹⁹Rohkomin ere ajatjat jabkhab heh hahjat jatma jabnoma Asâthem heh rangsoam sanpoatko thinnâng hethhô rãng thinma jetli jabkhab khab bangâ tôba ejab ang.

²⁰Ngalemruchha heh, nema letachha heh hung arin rãngrãng nekphoang thonghun en; chhihli nângba letachha heh rãngrãng dangen, rohkomin mihlin phannang heh hung arin rãngrãng dangen.

²¹Joban nyapraang nâng aroh raangeka, “Teso ma ngaeka, Ajatjat jabma jabte mihnyan heh junma ngama nganâng putedâlemte mihnyan heh demnâng ejabmîn ang, Ngama mihdiak wah mihnyan heh thunkhab junma ejabmîn ang, erohjô medang akomin nga mihnyan hehma nganâng lejetat edang hang.”

²²Erohwah, ajatjat jabma jabpa lepute dâlemte mihnyan hehma linlin ngama jetrãng jabeka, erepa putedâlemte mihnyan hehrãng jab dangmah, phumma Joban ngin phôangthô Hînhô pa putedâlemte mihnyan hehrãng, lepute dâlemte mihnyan hehrãng dangmah.

²³Erohwah, Asâthem heh phangtang roamkhôan letma chentôma ajatjat jab matuta mehongjab enko-ngale ereko ajatjat jabpa lejette mihnyan ba lepute dâlemte mihnyan heh mejoh khôanhû rako, thinma nekhu phangtang apâ reken ngama lenga minne?

²⁴Rohkomin Joban nâng lepute dâlemte mihnyan ba Joban ngin lejienthôte mihnyan heh johkhôan poatko chentôma Joban nginpa methô enko, ere mihnyan hehma ne nginpa tatlahma thinma papkaam moeka hehrãngma sekmah erea. Ngale thinma tateka junko thindede nâng achhih engariia,

²⁵thinma huhthonghun eka hehmin eloatthôa, ngale thinma Joban nâng, “Linlinjô Joban pa areko nãngmongko tonga!” ngama ngalahma, thinpap hehrãngma map thalahma khupjup nungma Joban nâng esoamwak a.

²⁶Ngalemruchha heh, Ngama are junma jabekang. Chenthu nekhu rangsoam rãng khôanko, wathema rangsoamsê pese, ahan wathema hethô, ngale ahan wathe pumma Joban ma khesokwah nginpa thôkoh, ngale ahan ma ajatjat jabma jab, ngale ahan wathema erejabpa litthô. Chentô pejô Asâthem hehrãngma asenli tuta chendanga.

²⁷Henma akomin ajatjat jabma mejab ako, ajahthôan pa wanii ba warem tôma chenjab a, ngale thinma chenni jabeka erepa ahan wathema chenlitthôa.

²⁸Rohkomin ere jabkhab pa henmemin letajien litthô medang ako, ere mihnyan pumma nok chhangko jabpa jeklahma Joban ngale atenii tungko lanlan chenjabmîn a.

²⁹Wanii ba warem tôma Joban nginpa chenthôa, ngale ahan hehma thinma chenni thôeka erepa chenjetat a.

³⁰Rohkomin nekhu khôan eken chhangko henma akomin Joban wah ngin mechohtat ako, nginthôte pa jek chenre mênga.

³¹Nekhu phangtangma Joban nginpa tâthô en, rohkomin wathe diko wathema thô en, eroh medang akoba chentôma jienhemin ngale hung arin dôngmin.

³²Joban ngin jienthôte pumma ate dedema them athak lahma jekmin,

³³chenrãngma ngako Joban ma hahjâm pa hunmahhi, jutjut jaangjaang ngale mêmoma dângba hun ehi. Erepa chentô Joban mihnyan Asâthem heh tungko chendanga nganma huneka,

³⁴erekowah dihiaknyu heh kihchepchep tôngmin. Thinnâng lejabthuk min; Jews heh Niemarang nâng ngaeka, thin a thôte jabte heh ngin khennâng chentonga.

³⁵Dihiak hehma chenni komin jethun medang ako, thinma thin tangwa ko humnâng chenthongpha a. Dihiaknyu hehma Asâthem heh chhangnâng nginthôpa thinrãngma rêsêli.

³⁶Roh akole Joban jabkhab pa newah lehong eka? roh akole ere Joban jabkhab pa nekhu nâng lanlan kaera?

³⁷Henma komin atea Joban ngintat chhoante, ba atenâng Ju wah chaanchohte ngama methonghun ako, ngama nenâng chenni raangeka erepa Teso ma chienlahma raangeka ngama atema chenjet a.

³⁸Rohkomin atema are raang ekangpa lekep medang ako, ate nginmin nekkepen.

³⁹Erohwah ngalemruchha heh, nehung nerin pa Joban ngin phoangthô rãng koh en, rohkomin ajatjat jabma hongjab pemin nekjek tãngen.

⁴⁰Chentô pejô senthemthem ngale punriri moat akatmin.