Read Nocte Naga 1 Korint 15 Bible Online

1 Korint 15 - Nocte Naga bible

1 Korint 15

¹Ngalemruchha heh, ade dangeka, ngama nenâng Nginkongsen thôko tahpa nema kepletma ere khohko ne putedâlem pa rongtêngtêng dangeken junma chhêmthôkoh huneka.

²Ere ngama nenâng thôkotah nginpa Joban Nginkongsen pa thôkoh wah. Nema Joban Nginkongsen ko rongtêngtêng loletma metong enko erejunma nekho epe en - eroh ledang kenko nema putedâlem eken pemin mahto nâng dângmin.

³Ngama nyahrãng alemli thôan ngin chohtat tekpa nenâng dienthôkoh eka: Joban nyapraang nâng raangeka rãngrãng, Krista nãngkhu paprãngma ritwah;

⁴Joban nyapraang nâng raangeka rãngrãng, atea mangrukko binkat lahma jârem diko ngaksat rewah;

⁵ngale atea Piter demnâng min chohmîntah, erediko moattat chhoante echhi waniilat demnâng min chohmînwah.

⁶Erediko rekthelem ma ate dijunte châbangâ nomemin ajah demnâng chohmînwah, phumma ere hehwah khakajô merii akomin khakapa athângheh ahînthu tonga.

⁷Erediko atea Jems demnâng chohmînwah ngale erediko moattat chhoante heh phangtang demnâng chohmînwah

⁸Khedithôanko nga demnâng min chohmînthang - nga a rangkuh ledangnâng chhatwah rãngrãngjô medang angkomin.

⁹Chenrãngma ngako moattat chhoante khukowah nga a khedithôan - Nganâng moattat chhoante ngama tangat tôjô dangmek, chenrãngma ngako ngama Joban nâng putedâlemte Asâthem heh chêmsietwah.

¹⁰Rohkomin nga a athângheh chenroh dangekanga erepa Joban mînchenchaan junma tadang ekang, ngale atema nganâng mînchenchaan kohthangpa mahto nâng dangmah. Erohwah, ngama moattat chhoante ahanheh noma ajah bâmchaan moekang, rohkomin erepa ngadede chaanma lolomoat dangmek, Joban mînchenchaan pa nganâng tonglahma johmo ehang.

¹¹Erohwah, ngamejô methôkoh akomin, ba thinmejô methôkoh hèn komin, nikhuma mãnthe pa phoangthôkoh eki, ngale nema areko putedâlem eken.

¹²Ade dangeka, nima Krista pa ritwah ngakhintah ngama phoangthô eki, phumma nekhuwah khaka hehma riichoante heh ngakhin tumah ngama chenroh jiennga eken a?

¹³Ere nema ngaeken pa toangtang medang ako, Kristajô ritwah ngakhin mahra dangmahne;

¹⁴ngale Krista pa ritwah lengakhin dângnomeko, nima phoangthô thinmin aho dângmin wah ngale nema putedâlem thinmin aho dângmin wah.

¹⁵Ere nomemin adongpa, nima Joban pa mothô ngama khesokwah rãngrãng edanga, chenrãngma ngako nima Krista ritwah ngaksattah ngama thôeki - rohkomin linlinjô riichoante heh lengakhin medang ako, atema Krista min ngakhinsiet mah.

¹⁶Chenrãngma ngako riichoante heh lengakhin medang ako, Krista min ngakhinho.

¹⁷Ngale Krista lengakhin wah medang ako, nememin mahto nâng putedâlem eken, ngale ne athâng hehmin pap demkojô johmahrii letma tongeken.

¹⁸Ngale arohmin dangeka, Krista nâng putedâlem lahma riitah hehmin mahto nâng riieka.

¹⁹Nãngma Krista nâng dâlem ekipa are roandông rãngma sênrãngma lolo thonghun lihma putedâlem medang eko, nãnga are hahtokkhoh kowah chentô mihnyan heh noma khangraang chhihthôan.

²⁰Rohkomin Krista ritwah ngaksatwâng nginpa linlin, ngale ererãngrãngjô ahan henhen riieka erehehmin ngakhînmin.

²¹Chenroh mihnyan wathe junma ritpa hûera rãngrãng, ritwah ngakhîn pemin wathe mihnyan junma jôba hûera.

²²Chenroh Adam demnâng johroamdi chentô mihnyan pa riieki rãngrãng, Krista demnâng johroamdi chentô mihnyan hehmin ngakhînmin.

²³Rohkomin chentôpa mâmâ khô alemko ngakhînmin: Chentô noma khebeng thôan ko Krista ngakhînmin; erediko ate ngakkat sanpoatko henhen aterãng dangeka ereheh ngakhînmin.

²⁴Ere diphumma ba athôan sanpoat pa ehûra; Krista ma chentô junâng pênte heh, thôte jabte heh, chaan ahang heh ejien a, ngale atema Hahsông pa Joban Wa dekkoh nâng ekoh a.

²⁵Chenrãngma ngako, Joban ma ran heh phangtang tajien lahma Krista dakhenko mathien thienkoh Krista ma epên a.

²⁶Khedithôan wah jienmin ran pa ritpa dângmin.

²⁷Chenrãngma ngako Joban nyapraangma ngaeka, “Joban ma chentôpa ate daphâ khenko thieneka.” Rohkomin arepa nãngma jetmin Joban ma “chentôpa” ngama jabeka jabkhab ko chentôpa Krista khenko thienkohte Joban atedede johngarii mah.

²⁸Rohkomin chenthu chentôpa Krista khennâng methien kotahko, erediko Krista ate dedema, Chhama, chentôpa ate khennâng thienkohte Joban khenko ethienriia; ngale Joban ma chentô khohko epen a.

²⁹Ade dangeka, riichoante hehrãngma baptijem kepkohte mihnyan heh chenroh dângmin a? Thinma riichoante hehrãngma chenni tamokoh e ngama dâlem eka? Arepa linlin medang ako, Khuka hehma ngaeka rãngrãng, riichoante heh lengakhin min medang ako, ere mihnyan hehma chenrãngma riichoante hehrãng baptijem kepkoh eka?

³⁰Ngale nãngkhumin - sanpoat roakweih cheili nâng tuta chenrãngma edangea?

³¹Ngalemruchha heh, nga rangwo roakweih riilekma tongekang! Nãng roandôngpa nãng Teso Jisu Krista demnâng roamlihma dângjunko nga nekhu khohnâng khuhah lekma arepa loatjab ekang.

³²Mihnyan nyuchha hung arin junma lolo ngama Ifisus wah “Wunngem” demnâng meloatmîn angko, ngama chenni chohmin a? Rohkomin ritte heh lengakhin medang ako, are nginthakthô pumma ngaeka rãngrãng, “Jokphhek chhah e, chenrãngma ngako nènep nãng rit retumin.”

³³Nekba en. “Lemruchha chhih pumma nãng jat apatsen heh chhihsiet eka.”

³⁴Hungpun rinpun ngakdang en ngale papmoat pa jek en. Ngama nekhu chenrêsê en ngama nekhuwah khaka hehma Joban jetmet ngama loatjab ekang.

³⁵Henma komin echhien a, “Riichoan mihnyan pa chenroh jienngak hinmin a? Thin phoangpa chenrãngrãng dângmin a?”

³⁶Nea aba jôba! Chenthu nema hahko bãngken khiet ko, akhiet reken bãngken pa lebeng riimêng kako bãngken pa lehong phoakmin.

³⁷Ngale nema chenpa khiet eken a erepa aken loloba khiet eken, erepa chhahmin tadanga ngale lihân riichit phanthoi kenmin tadanga, khedinâng bãngdongrãng hôngdâng wângthin bãngphopa khiet dangmet.

³⁸Joban ma ere bãngkenko atema chenrãngrãng bãngpho hôngdângthuk huneka eroh koheka; ngale Joban ma chentô bãngken nâng mâmâ rãngrãngjô bãngpho koheka.

³⁹Ngale ahînte jat heh ngem pemin chentôpa jatthe ngem tuta dangmah; mihnyan nyuchha ngem ajatjat, ahan ngem angah heh ngem pa ajatjat, wo heh ngem pa ajatjat, ngale ngah ajatjat.

⁴⁰Ngale rangkhethung phoangmin ajatjat tonga, erediko hahtokkhoh phoangmin ajatjat tonga; rangkhethung wah phoang phengsên pa are hahtokkhoh wah phoang phengsên nomemin ajatjat.

⁴¹San phengsên ajatjat, Dâ phengsên ajatjat, ngale merit heh phengsên ajatjat; ngale merit hehnângmin mâmâ jatjat senlahma tonga.

⁴²Phumma chenthu ritte heh mengakhin tahko aroh dângmin. Chenthu phoangpa hahkenko binkat ekia, ere phoangpa amah sânjâ phoang binkat eki; phumma chenthu mengakhin tahko ere phoangpa lemah chhihjâ tuli phoang ngakhin eka.

⁴³Chenthu hahnâng bînko, erepa phangchhih ngale aboan bineki; phumma chenthu mengak sattahko, erepa phangsen ngale chaanwin ngaksat eka.

⁴⁴Chenthu bînkat rekia, erepa hei angem phoang peba binkat eki; phumma chenthu mengakhin tahko, erepa Ju phoangrãng litlahma ngakhin eka. Chenroh hei angem phoang tongeka, ererãngrãngjô Ju phoangmin tonga.

⁴⁵Chenrãngma ngako Joban nyapraangma ngaeka, “Khebengthôan mihnyan, Adam, pa ahînte mihnyan rãng hôanwah”; rohkomin khediwah Adam pa roandông kohte Jurãng hôaneka.

⁴⁶Khebeng-thôan wah kathapa Ju katwah dangmah, rohkomin erepa hei angem phoang dângwah, eredikoba Jupa katwah.

⁴⁷Khe-bengwah Adam pa hah kowah bum aboak wah hôanwah; rohkomin khediwah Adam pa rangkhethung wah katwah.

⁴⁸Henhen hahrãng dângtea ereheh hah wah hôantah mihnyan rãngrãng; ngale henhen pa rangkhethung rãng dângtea, ereheh rangkhethung wah katte mihnyan rãngrãng.

⁴⁹Ngale chenroh nangkhua hah wah hôanwah mihnyan lele hoangchha ehia, ererãngrãng jôba nãngmin rangkhethung wah mihnyan rãngrãng dangeki.

⁵⁰Ngalemruchha heh, ngama ngaekang pa dangeka, hei angem junma Joban Hahsông pa leta chohmin, ngale amahritthin phoang pumma lemah riithin phoangpa tachohmah.

⁵¹Are patritli toangtang nginpa jetat tan en: Nãngkhu phangtang leriimin, rohkomin chenthu athôan kowah poakpopo pa merah mettahko, mitthupjep tungko nãngkhu phangtang lemlienma elitjâe. Chenrãngma ngako chenthu poakpopo pa merahmet tahko, riichoante heh chenthumin lengakrii turãng engakhin a, ngale nãngkhumin phangtang litjâ ere e.

⁵²

⁵³Chenrãngma ngako chenni pa chhihjâli phoang dangtah a erepa lechhihjâli phoangrãng elitjâa; ngale chenpa ritli phoang dangtah a erepa letariili phoangrãng elitjâa.

⁵⁴Erohwah chenthu eroh medang tahko, ngale ritli phoangpa letariili phoangrãng melitjâ tahko, Joban nyapraangpa toangtang edangkara: “Aritpa lâta chhihsiettah; ngale roantang roangjêng rãng lâjientah!”

⁵⁵“Arit, nangma chenni pa tajien eko? Arit, nangbii pa chenkoa?”

⁵⁶Arit pumma mihnyan ritphe chaanpa papwah choh eka, ngale pap pumma ate chaanpa Niemarang wah choh eka.

⁵⁷Rohkomin nãng Teso Jisu Krista junma nãngnâng ajienchaan kohte Joban nâng dangkoh a ngama ngae!

⁵⁸Erohwah, ngalemruchha heh, rongtêngtêng dangen, ngale nehung pa chenni mejô nekchen phongsiet ehèn. Roantangma Teso moatlem nâng hungkoh letma mo en, chenrãngma ngako nemajet, nema Teso moatlem moeken pa chenthumin mahto nâng dangmah.