Read Nocte Naga 1 Korint 2 Bible Online

1 Korint 2 - Nocte Naga bible

1 Korint 2

¹Ngalemruchha heh, chenthu nga netânâng Joban toangtang nginpa thôkohrãng hokko, Ngama jabkhab dong ngale ngama jet ajien ekang heh chenjet hang ngama khesok lekma thôkohho.

²Chenrãngma ngako nga nekhu demnâng dângpoatko, Ngama chentôpa lekphe lekma Jisu Krista bãngphak khoko ritpa, ngale ajahthem pejô ate rittek bãngphak pelolo ngahung kojû thonghun lekma tôngrãng thônghun wah.

³Erohwah, chenthu Nga netânâng kathangko, Nga a pachhih ngale nyahrãng tiichei lekma dângwah,

⁴ngale Ngama hethôtah le thôkotah nginkong heh mihnyan nyuchha buthi mongthem junma hethô wah dangmah, rohkomin, Joban Ju chaanma erepa ngama nenâng thôkoh wah.

⁵Erohwah, ne putedâlem pa mihnyan nyuchha buthi mongthem junko dangmah, Joban chaan koba putedâlem eki.

⁶Rohkomin Junâng hungchit phannang hehnâng ngama buthi mongthem ngin heh thôkoh ekang. Rohkomin erepa are hahtokkhoh buthi mongthem pa dangmah, ngale are hahtokkhoh pên eka chaan pemin dangmah - ere chaanpa mahjâli chaan.

⁷Ngama phoangthô ekang buthi mongthem pa Joban buthi mongthem, erepa mihnyan nyuchha ma lejet dângwah, rohkomin are hahtokkhoh hôan mama Joban ma erepa nãngkhu mîndông thukrãng rênwah.

⁸Are hahtokkhoh pênte heh henmemin ere buthi mongthem pa jetmah. Thinma erepa jetnomako, nãng Teso adongthôan pa lerittek minwah.

⁹Rohkomin, Joban nyapraangma ngaeka, “Chenpa henmemin mathat chohkhe ngale chohtat a, ngale chenpa henmemin mathat thonghunli pa edanga, erepa Joban ma atenâng hunte hehrãngma khoakhem eka.”

¹⁰Rohkomin erepa nãngnâng Joban ma ate Ju junma ate hungkhen wah heh loatjetthuk ehi. Juma chentôpa lemsû eka, Joban hungkhen nâng huhthong huneka moatlem heh tumin jeteka.

¹¹Nãng hungkhen wah ju pumma loloba nãngdede hungkhen wah chentôpa jeteka; ererãngrãng, Joban Ju pumma lolo jôba chentô Joban ngin heh jeteka.

¹²Nãngma are hahtokkhoh ju pa choh dangmih; erenoma, nãngma Joban ma chienkatwah Jupa choheki, erohwah, Joban ma nãngnâng chentô kohehi a ereheh phangtang jeteka.

¹³Erohwah, nima mihnyan buthi mongthêmma hethô wah jabkhab junko jab dangmih, rohkomin Juma hethô wah jabkhab junko jabeki, ngale henhen nâng Joban Ju tongeka erehehnâng nima Ju ngale toangtang nginpa hethôeki.

¹⁴Henhen nâng Ju ahoa, erehehma Joban Ju ngewah kaera hînhô pa leta chohmin. Ererãngrãng mihnyan hehma areheh leta jetmin, ngale thinrãngma sekhota ngin rãngrãng ethonghun a, chenrãngma ngako, ere Ju chohte hehma lolo jôba tâjetmin.

¹⁵Henhen nâng Ju tongeka, erehehma jôba chentô chhih asen pa etajet a, rohkomin mihhân henmemin atenâng chhih asen pa leta renmin.

¹⁶Joban nyapraangma ngaeka, “Teso hung arinpa henma tajetlo lahma tonga? Henma atenâng târîn tâkhah min a?” Rohkomin nãngkhu nâng Krista hung etonghi.