Read Nocte Naga 1 Korint 3 Bible Online

1 Korint 3 - Nocte Naga bible

1 Korint 3

¹Ngalemruchha heh, linlinko, Ngama Joban Ju chohte mihnyan heh demnâng jabmîn ekang rãngrãng nekhu demnâng jienjabmîn mahrâng; Nga nedemnâng jabmîn poatko, ngama nea are hahtokkhoh wah hei angem mihnyan heh rãngrãng, erediko Kristan putedâlem nâng letachha rãngrãng thonghun lahma jabmîn eka.

²Ngama nenâng phhekchhah cheh ledangma nyuhpoti kungeka, chenrãngma ngako nema cheh pa tachhahmet. Ngale athâng hehmin nema arepa jienchhahmet.

³Chenrãng-ma ngako, nea athâng hehmin are hahtokkhoh wah mihnyan heh rãngrãng tong eken. Chenthu nekhu tungko phetwânmîn, mere enko, ngale wathema wathe tungko mênmîn mere enko, erejunko nea are hahtokkhoh wah hei angem mihnyan ngale hahtokkhoh hung arin junko songtong eken ngama khesok eka.

⁴Chenthu nekhuwah wathema, “Ngama Pol dijun ekang,” ngale ahan wathema, “Ngama Apolo dijun ekang” ngama menga enko erepa nea hahtokkhoh mihnyan rãngrãng ledangne?

⁵Linlin medang ako, Apolo pa hen a? ngale Pol min hen a? Nikhua Joban haa ba, ngale nekhu Joban nâng putedâlem thukte. Nikhuma Teso ma hennâng chenni mothuk ehia ere peba moeki:

⁶Ngama bãngpa khiet ekang, phumma Apolo ma ere bãngko jo koheka, rohkomin ere bãngpa Joban ma hinthuk eka.

⁷Bãngkhiette ngale bãngko jo kohtenii chenjô dangmah. Joban ba adongthôan, chenrãngma ngako, atema bãngpa hin thukeka.

⁸Bãngkhiette ngale bãngko jo kohte nii mãnthe; Joban ma henma chenroh motah a eroh waniinii nâng ekoh ehi.

⁹Chengrãngma ngako nima Joban rãng roammoeki, ngale nekhua Joban khethah. Ngale nekhua Joban hummin edangen.

¹⁰Joban ma nganâng humhôan thakwa dângthuk junko, nga a thakwa rãngrãng danglekma humhôan bângchep ekang, ngale ere mãnko mihhanma hôaneka. Rohkomin nekhu chentôma erepa chenroh hôanmin a ngama senthemthem thonghun letma hôanmin.

¹¹Chenrãngma ngako, Joban ma Jisu Krista pa lolo jôba chentô rãngma wanthe humhôanthin the rãngrãng hôaneka, ngale ere leko humhôanthin the ahan ahotu.

¹²Khaka hehma kem, ba thãchaanjat jan aman, thãchaanjat longchek longhin heh keplahma humpa ebânghôan a; khaka hehma pen awah, ngale lengchha erediko chhahko heh keplahma min ehoan a.

¹³Ngale moatlempa henma chenroh moeka erepa chenthu Krista ma loatkhesokjâ rangwo pa mehû theko ekhe e. Chenrãngma ngako, erejâ rangwo ko anga nga moatlempa wenma thatkham lahma eloatsiet katra; phumma erewen pumma thatkhâm junko alinlin ale amõanga erepa ekhesok a.

¹⁴Humhôanrãng khoakhemtah theko hôaneka humpa wenma thatkhâmko lechhihkham medang ako, humhôante pumma thã echoh a.

¹⁵Roh-komin atema hôanwah humpa wenma jemkhâm mereako, nema thã lechohmin; rohkomin atedede lolo wenkhâm wah pechhoanwah rãngrãng epea.

¹⁶Linlin nemajet, nea Joban rangsoamhum ngale Joban Jupa nekhen nâng tongeka!

¹⁷Henhenma Joban hum chhihsiet eka, ereheh Joban ma echhihsiet a. Chenrãngma ngako, Joban rangsoam humpa Asâ, ngale nedede min Joban rangsoamhum.

¹⁸Nema nedede nekbasietrii en. Nekhuwah henma komin atea are hahtokkhoh junko jet ajien ngama methong hunrii ako, atea are hahtokkhoh ko aba rãngrãng dângmêngmin, erohkoba linlin jet ajien eta danga.

¹⁹Chenrãngma ngako, are hahtokkhoh pumma chenpa buthi mongthem ngama thonghun eka erepa Joban rãngma aba ata rãngrãng dangeka. Joban nyapraangma ngaeka, “Joban ma jet ajien heh thin buthi mongthem junko benâng mânritwah rãngrãng manrii thuk eka”;

²⁰ngale Joban nyapraang han nângmin ngaeka, “Teso ma jet ajien hehma thonghun ekapa sekhota ngama jeteka.”

²¹Erohwah mihnyan nyuchha ma chenni tamoekia erepa henmemin lerângthômin. Linlinjô chentôpa ne thiak:

²²Pol, Apolo, ngale Piter; are hahtokkhoh pa, rit ahin, athângheh ngale khedi wah hehmin - are chentôpa phangtang nerãng tuta,

²³ngale nekhua Krista rãng, ngale Krista pa Joban rãng.