Read Nocte Naga 1 Korint 4 Bible Online

1 Korint 4 - Nocte Naga bible

1 Korint 4

¹Nema ninâng Krista haa, ngale Joban toangtang moatlempa molihma ate ngin heh phoangthô kohterãng thieneka ngama thonghunhi.

²Ererãngrãng haa hehma wanthe lem ekapa dangeka, atea, ate tângte pumma putedâlemli dângmin.

³Athângheh, nga a, nema komin, ba mihhan mekomin, nganâng athe menga hangkomin sekmahmek; Ngama ngadede athe ngariimek.

⁴Ngahung ngarin pa sâpoangpoang, rohkomin erejunko nga a linlinjô chenni nângjô themek tangamek. Teso meba nganâng athe ngama tanga hang.

⁵Erohwah nekhu memin sanpoat pa mahûhûko hennâng min athe neknga en. Alinlin athe ngama loatrãng Teso katpa bemlâ mêngmin; rangnyek khennâng huhthientah heh khohko atema wenphiak pumma ephiakthuk a, ngale mihnyan heh hung khennâng huhthem awa tahheh atema eloatsiet a. Ngale erediko anga ngama Joban wah chenroh rô chohthin a erepa echohwak a.

⁶Ngalemruchha heh, nekhu rãngma asen dângrãngma, are chentôpa ngama Apolo cheniimîn thakthô lekma ngaekang, erohkoba ngama arepa chenni junma jab ekanga erepa nema eta jetlo en, “Niemarang pa senthemthem kepen.” Ngale nekhuma wathepa rângthô ngale ahan wathepa chhihthô nekre en.

⁷Henma mihhân noma adong dangthuk ehèn a? Nema chentô cheiken heh Joban ma kohwah ledangne? Sen a, eroh medang ako, nema cheiken heh, hînhô ledang rãngrãng chenroh jienrângthô eken a?

⁸Nema chentô lemeken heh phangtang lâchohtetne? Nea techhu lâdangtet ne? Nijô lelem thangma Lowang rãng dangeken a? Sen a, Ngama nea linlinjô Lowang danglet mele ngama thonghun ekang, erohkoba nimin nekhu demnâng Lowang eta roamdange.

⁹Chenrãngma ngako ngama thonghun ekang, Joban ma nia moattat chhoante hehnâng khedithôan thepa kohehi, ngale rangkhethung wah Joban ngintatte heh erediko hahtokkhoh wah mihnyan nyuchha heh chentô mitsokko ritphe rãng thienwah mihnyan rãngrãng hôanehi.

¹⁰Chenrãngma ngako Krista rãng sênrãngma nia aba rãngrãng dangeki; rohkomin nekhua Krista demnâng roamletma jet ajien dangeken! Nia loboan dangeki, rohkomin nekhua lochaan! Nia thãjõ lembe hôanehi, rohkomin nea dôngsiet re ehèn!

¹¹Are sanpoat tôkomin nia rêmrit, ngale jolân ritma tongeki; Nia khetchien khunaang demnâng tongeki; buh awat re ehi, ngale thethe kowah thethe nâng hum ahah aho thangma phoangkhoam eki;

¹²Ngale Nidede dekma latrii lihma moatchhahwah. Chenthu ninâng têm athoakko, nima thinnâng rangkoh eki; Chenthu ninâng chêmsietko, nima chêmpa tathaeki;

¹³Chenthu ninâng jôjêm dûmmek poatko, nima jabkhab senma ngakdanjab eki. Nia are hahtokkhoh wah nyapsoak ngek atek petphe eka rãngrãng hôanehi; ngale are sanpoat tôko nia hahtokkhoh wah setru kaja rãngrãng dangeki!

¹⁴Ngama arepa nekhu rêsêthuk hun lekma raang dangmek, rohkomin ngachha rãngrãng thonghun lahma nekhu nâng rîn akhah ngale hethô hun lekma raangeka.

¹⁵Chenrãngma ngako nekhu nâng Kristan roandôngko hahjat echhi mihnyan hethôtejô metong hèn komin, nerãngma Wa pa wathelolo jôba etonghèn. Chenrãngma ngako nekhu roandôngpa Jisu Krista demnâng roamletma ngama nekhu nâng Nginkongsen pa kephû kolahma nga nekhu Wa rãngrãng lâdangtek.

¹⁶Erohwah, Ngama nekhu nâng Ngadi junha ngama rosep eka.

¹⁷Erohwah, ngama nekhu tânâng Kristan roandôngko ngachha linlin rãngrãng hôan lekma nyahrãng putedâlem ekang Timothi chienkat erang. Ngama Jisu Krista demnâng roam lekma nga roandông anyan dang lekma chenroh moekanga, ngale chentô thewah Asâthem hehnâng phoang hethô ekang niemarang heh atema nenâng ethôkohhèn.

¹⁸Nga nekhu demnâng bâmchohmîn hutumah hiba edangthem a ngama thonghun letma nekhuwah melâng mihnyan nyahrãng ngamritte lâhongtet.

¹⁹Teso hungsi medang ako, chenroh mekomin, nga netânâng sitsiak ehûrâng, ngale erediko, thinma chenni ngaeka ereheh lolo ledang, thinma ngamrit rãng chenwah chaan choh eka erepa ngadedema elemte ang.

²⁰Chenrãngma ngako Joban Hahsông pa jabkhab junko lolo dangmah Joban chaan junma ba dangeka.

²¹Nema chenroh hun eken a? Nga netânâng hokko thankah demnâng hûrâng ale, nenâng hun achet Ju demnâng numnene danglekma hûrânga?