Read Nocte Naga 1 Korint 6 Bible Online

1 Korint 6 - Nocte Naga bible

1 Korint 6

¹Nekhu chhangwah hen akomin Kristan dede tungko mênmîn mere enko, Joban nâng putedâlemte mihnyan hehnâng lephenthôthuk thangma, Joban lejette ngoang awang heh tânâng erengin heh phenthômîn rãng chenroh jienhokmin a?

²Nema jetmetne Joban nâng putedâlemte mihnyan hehma are hahtokkhoh wah achhih asen pa rênmin ngama? Eroh medang ako, nema are hahtokkhoh ko achhih asen ngama metaren enko, are arinchha nginpa chenrãngma leta phensiet dangeken a?

³Nãngma Joban ngintatte hehnângmin athe loatmin ngama jetmetne? Eroh medang ako hahtokkhoh roandông kowah athe pejã chenrãngma letalomin a!

⁴Arerãngrãng ngin ariet mehong ako, nema Asâthem heh demnâng lejoh dangte hehnâng phênthôthuk minne?

⁵Rêsê metne! Linlin nekhu chhangko Kristan dede tungwah ngin ariet heh tâphensiette jet ajien mihnyan wathe komin etonga.

⁶Eroh ledang thangma, Kristan wathepa ahan Kristan wathe lelatnâng chenmîn letma Joban nâng lepute dâlemte mihnyan hehnâng phenthôthuk eken!

⁷Nekhu dede tungko bengmênmîn junko nea linlinjô achhih nâng lâjien riitet ngama khesok eka. Eroh chênmîn chhoan noma nanga atherãng dângpeba asen ledangne? Ngale nang chhahkhem heh nyenkeprit peba asen ledangne?

⁸Erenoma, nekhu dederãng chhihmo mînkoh eken, ngale diepchhahmîn eken, ngale nelemru putedâlemte hehnângmin eroh hôan eken!

⁹Linlin nemajet, Mihnyan chhih hehma chenthumin Joban Hahsông pa leta chohmin. Nedede nekbasietrii en; lapien, moangachaang nâng soam, mihdihiak dela kaamchhih moatte, ngale dela dede kaamchhih moatte

¹⁰ngale ahuhte, chhahnyoak, khemmok chempa, mihphoang chhihthô, ahuh heh - arerãngrãng mihnyan hehma henmemin Joban Hahsông pa leta chohmin.

¹¹Nekhumin ereheh rãngrãng dângwah. Rohkomin nea ererãngrãng pap kowah lâsâsietthen; nea Joban rãnglolo lâdangtet; Nãng Teso Jisu Krista ngale Joban Ju junma nea Joban demnâng toangtang lâdang thukthen.

¹²Khakama enga a, “Ngama rongruppa tamo ang.” Edangthem a; rohkomin rongruppa nerãng asenli tuta dangmah. Ngama rongruppa tamo ang, ngama tajab ang, rohkomin nga a chenni nângmin ate haarãng lekepriimin.

¹³Ahan hehmemin, “Phhekchhah pa wokrãng, ngale wokpa phhekchhah rãng” ngama engathem a. Edangthem a; rohkomin Joban ma wanniinii ethôansiet a. Nãng phoangpa mihdihiak dela kaamchhih moatrãng dangmah, Teso nâng soamtô hôan rãngba; ngale phoang komin Teso ma chohkohmin.

¹⁴Joban ma Teso ritwah ngakhînsiet wah, ngale ate chaan pumma nãngmin ritwah engakhinsiet hi.

¹⁵Nema ajet ne phoang pemin Krista phoang demko jôba johroap eka. Phumma ngama Krista phoangpa dihiaknyu phoang sengte phoang demko ejoh roapsiet anga? Eroh chenthumin leta roapsietmin!

¹⁶Ngale nema lejet dangthem eken, delawa henma ate phoangpa dihiaknyu phoang sengte demko roap eka erewa phoangpa dihiaknyu demko phoangthe lâdangtah ngama? Joban nyapraangma senthemthem ngaeka, “Wanii pa phoangtherãng dângmin.”

¹⁷Phumma henhen Teso demnâng johroap eka, erepa ju nângmin Teso demnâng phoangthe lâdangtah.

¹⁸Mihdihiak dela kaamchhih nekmo en. Lihân papkaam mihnyan ma memo ako erepumma ate phoangpa chhihsietmah; rohkomin henma mihdihiak dela kaamchhih molahma pap dangeka erepumma atedede phoangrãngma chhihmo eka.

¹⁹Nema ne phoangpa Asâthôanju rangsoamhum ngama jetmetne, ere Asâthôanju pa nesekkhen ko tongeka, ngale erepa Joban ma nenâng kohwah? Ne phoangpa nedede rãng dangmah, erepa Joban rãng;

²⁰atema nea thãma riakwah. Erohwah ne phoangpa Joban mîndôngrãng kepen.