Read Nocte Naga 1 Korint 9 Bible Online

1 Korint 9 - Nocte Naga bible

1 Korint 9

¹Nga a hen haajô dangmek! Nga a moattat chhoante ledangne? Ngama nãng Teso Jisu lekhe wahne? Ngale ngama Teso rãng moatjunko nekhu hong eken ledangne?

²Ahan heh mejô nganâng moattat chhoante ngama lekep hangkomin nekhuma moattat chhoante ngama kepha! Chenrãngma ngako nekhu roandôngpa Teso demnâng aroamma dangletma khe junko linlinjô nga moattat chhoante ngama jet ekang.

³Chenthu mihnyan hehma nganâng chhihthôko, ngama aroh rângdanthang ang:

⁴Ngama moatlem moattha nganâng phhekchhah lekohminne?

⁵Ngamin moattat chhoante ahan heh rãngrãng leta dângminne, ngale Teso naa heh erediko Piter rãngrãng, ngamin ngademko Kristan tangnyu johsiet lekma leta phoangkhoam minne?

⁶Roh akole Barnabas chenii lolone chenii dede rãngma phhekchhah lêmbi tepa?

⁷Hen sipâhi ma atedede sipâhi dângdi thã thatthum riilahma tonga? Ngale hen pitmoatte ma thindede Angurbãng kowah Anguri lechhah rângdanga? Ngale hen saaksokte ma ate saak hehwah nyuhpoti lejok rângdanga?

⁸Ngama arepa jengrewah sôngtông ngin heh demnâng thakmîn dangmek, chenrãngma ngako, Niemarang memin eroh jôba ngaeka.

⁹Nãngma Mosa ma raangwah Niemarang ko lâthat chohweihtih, “Chenthu nema mânpongko chhahnekthuk poatko, ate thunpa nekkhhek en.” Phumma erepa Joban ma mânpong rãnglolo lejab eka?

¹⁰Chenthu Joban ma aroh ngaeka pa nãngkhurãng sekmah kolahma ngat ledangne? Linlinjô erepa nãngkhurãng raangeka. Pitmoatte ngale chhahkhente mihnyan waniiniima chhah kowah chohchhahmin ngama dâlem lahma jôba moeka.

¹¹Nima nekhu chhangko Ju chhah wên eki. Phumma nima newah ngun akem ngale chhahkhem ngema thaeka pa nema khupliet ngama thonghun eken a?

¹²Mihhan metumin newah metha hènko, nima jãtanga ereheh noma ajah lethaminne? Rohkomin nima nekhuwah thamah. Erenoma, nima newah thajunko Krista Nginkongsen nâng nema putedâlem pa tengbeng thuknoma roangrup pa nidedema tadô lihma tongeki.

¹³Nema linlin jet en, Rangsoamhum nâng moatte mihnyan hehma thin phhekchhah pa Rangsoamhum wah choh eka, ngale henma soam aroak re eka hehma thinma soam aroak eka kowah chohmin.

¹⁴Ererãngrãngjô, Teso ma ngaeka, henhenma Nginkongsen pa phoangthô eka erehehma thin phhekchhah pa erekowah chohmin.

¹⁵Rohkomin ngama aroh henwahmin mathattha eka, ngale athâng hehmin ngama nenâng ereheh thârãng raang dangmah. Ngama eroh thânoma ritba ereang! ngale ngama toangtangko jabekang jabkhab pa henmemin sekhota jabkhab rãngrãng nekchen kepeka!

¹⁶Ngama Nginkongsen pa phoangthô rãngma tarângriimek. Chenrãngma ngako, erengin pa ngama metkep thômin jôba. Ngale ngama nginkongsen pa lephoangthô kangko ngarãngma chentô chhih dângmin a!

¹⁷Ngama nga moatlempa ngadede mejô renlekma memo angko, ngama erethã chohmin ngama edâlemthem ang; rohkomin ngama erepa metkaptô moatthin moatlem ngama moekang, chenrãngma ngako, ere moatlempa Joban ma nganâng mothuk ehang.

¹⁸Eroh medang ako, ngama chenthã chohmin a? Nginkongsen pa thãletha thangma phoangthôkoh, ngale ngama ere nginkongsen pa phoangthôkoh poatko henwahmin chenjô letha thangma phoangthôkoh pejôba nga moatlem.

¹⁹Nga hen haajô dangmek; rohkomin mihnyan heh ajah tâsiethok rãngma ngadedema anga nga haarãng dangrii ekang.

²⁰Nga Jews heh demnâng moatpoatko, Jews heh jiensiethok rãngma, nga Jews heh rãngrãng danglekma songtong ekang; ngale nga Mosa Niemarang khenko tongtejô ledang kangkomin, Mosa Niemarang khenko tôngte heh demnâng moatpoatko thin tâsiethok rãngma thinrãngrãng Mosa Niemarang kheko danglekma songtong ekang.

²¹Ererãngrãng, Jews ledangte heh demnâng moatpoatko, ngamin Jews heh Niemarang khenko ledang thangma, Jews ledangte heh tâsiethok rãngma Jews ledangte heh rãngrãngjô songtong ekang. Are junko ngama Joban Niemarang pa kepmek ngama dangmah; Nga linlin Krista Niemarang khenko songtong ekang.

²²Putedâlem nâng arinte heh demnâng moatpoatko, thin tâsiethok rãngma ngamin thin rãngrãngjô johdang ekang. Erohwah, ngama chenni lemkhô mekomin thinkho tâpesiet rãng ngama nga chentô mihnyan heh demnâng thinrãngrãng tutajô johdang ekang.

²³Are chentôpa ngama nginkongsen rãngma moekang, ngale ere nginkongsen demko rang chenjoh kep ang ngama moekang.

²⁴Linlinjô nemajet, toatchhoan mînte heh jahmõang rângtoat chhoanmîn a, rohkomin khekhothôan thãpa wathelolo meba rângchoh a. Erohwah, khekhothôan thãpa tâchoh rãng chhoan en.

²⁵Chentô khien akho lôamte hehma chhihjâli khophok pa tâchoh rãng khienloam niemarang pa senthemthem rângkep a; rohkomin nãnga roantang roanjêngma lechhihjâli khophok pa tâchoh rãng moeki.

²⁶Erohwah nga lejek thangma athôanko mahû hûchhoan tintin chhoanwãng ekang; erohwah ngadekma tepmîn khienloam ko hotanâng letep phete rãngrãng loamekang.

²⁷Ngale mihheh toatloam mînrãng roolekma nga leta toatloam mîntu nekchen dangekang ngama ngaphoangpa tungbuhrii lekma chehsiet ekang.