Read Nocte Naga 2 Korint 1 Bible Online

2 Korint 1 - Nocte Naga bible

2 Korint 1

¹Joban hungsi junko Jisu Krista moattat chhoante Pol, ngale nãngnaa Timothi ma ngewah- Joban nâng putedâlemte Korint wah Asâthem, ngale Akaia diakwah chentô Joban nâng putedâlemte mihnyan hehnâng raangeka:

²Nãng Wa Joban ngale nãng Teso Jisu Krista ma nekhu nâng mînchenchaan ngale mêmo chenkohhèn.

³Nãng Teso Jisu Krista Wa Joban nâng dangkoh a ngae, nãngnâng nyahrãng mînchênte Wa, ngale nãngnâng chentô nâng chohsokte Joban nâng dangkoh a ngae!

⁴Atema nãng chentô chêmchei nângmin chohsûehi, erohwah, nãngnâng Joban ma chenroh chohsûthia, ererãngrãnjô nãngmemin rongrup nâng chêmcheite mihnyan hehnâng chohsokmin.

⁵Chenroh nãngma Krista chêmchei ko johchêm ekia ererãngrãngjô, Krista junko Joban ma nãngnâng echohsûkat hi.

⁶Nima chêmchei mechoh eko, erepa nenâng chohsokrãng chêm eki, ngale nekhu khope rãngma chêm eki; phumma nia lechêm medang eko, nemin lechêm thangmejô edangen, ngale nima tadôtih chêmchei pa jôba nememin mamtâdô rãng chaankoh ehèn.

⁷Erohwah nima nenâng nyahrãng dâlem eka; ngale nima ajet nekhu nidemnâng chenroh johchêm ehia ererãngrãng, nikhu lechêm thangma tôngko nekhumin ejohtonghi.

⁸Lemruchha heh, nima Asia diaknâng chêmtih heh nenâng jetthuk huneka. Nima chêmchohtih pa atôdông ngale atôlih dângwah nia ahînma edangtue ngamejô lekhatu wah.

⁹Nia ritphe eretu thêmhi ngama thonghun lihma dângwah. Rohkomin arepa nidede nâng dâlemrii lihma dângrãng ledang, riichoante mihnyan heh tângak hînsiette Joban nâng lolo tok anaa lihma tôngrãngma dângwah.

¹⁰Arerãngrãng cheili ritthin kowah atema pepâng ehi, ngale epepânghi; ngale ademin atema jôba epepanghi ngama nima atenâng khalihma tok anaa eki,

¹¹chenroh nekhu memin rangsoam junma ninâng chohsûthi rãngrãng. Erohjô, melâng mihnyan hehma nirãngma rangsoam kohehi pa Joban ma edânthanga, ngale Joban ma ninâng rang ekohkat hi; ngale melâng mihnyan hehma nirãngma atenâng dangkoh a ngama enga a.

¹²Nima are nginpa rângthôeki, are hahtokkhoh ko nihung nirin pa sâpoangpoang tongeki, ngale ajahthem pejô Joban ma chohsok junko nekhu demnâng khuhah nâhah ngale hungsâ rinsâ danglihma tongeki, erepa mihnyan nyuchha buthi mongthem junko ledang Joban mînchenchaan junko tongeki.

¹³Nema chenni pa weih letma tâjetthin a erepa jôba nima nenâng raangkat eka. Rohkomin athângheh nekhuma nijunma chhupthechha lolo mejet hikomin, lele nema phangtang ejet hi ngama thonghun ekang, erohkoba nãngkhu Teso Jisu ngakkatjâ rangwo ko nekhuma ni erângthôhi, ngale nimemin nekhu erângthôa.

¹⁵Nekhuma rang raknii chenkep en ngama thonghun lekma khebengko nekhu tânâng chohmîn hûrâng ngama nyahrãng themawa wah.

¹⁶Nga Mesidonia nâng katpoat ko nekhu demnâng echohmîn thien a, ngale enângwah ngakwângpoat komin echohmîn a ngama themawa ekang, erepa nga Judia nâng katko nema chohsû letma chensen wênha ngama thonghun ekang.

¹⁷Ngama aroh themawa ekangpa senthemthem lethonghun thangma lemo ekanga? Chenthu ngama aroh themawa ko, nga chhahnyoak hungma lemo ekanga, sanpoat theko “danga, danga” ngale “dangmah, dangmah” ngama tuta lenga ekanga?

¹⁸Joban ma toangtang jabeka rãngrãng, ngama nedemnâng toamsem eka pemin “Danga” le “Dangmah a” ngama dangmah.

¹⁹Chenrãngma ngako Silas, Timothi, ngale ngadedema nenâng thôkohtah Jisu Krista Joban Chhapa “Danga” ngale “Dangmah” ngama ngatte dangmah. Erenoma atea, “Danga” ngama ngatte Joban;

²⁰Chenrãngma Joban ma chentô toamsem eka ereheh nâng atema “Danga” ngama tuta ngaeka. Erohwah Jisu Krista junma Joban mîndôngrãng nãngma “Amen” ngaeki.

²¹Ngale Joban ma nãngkhu roandôngpa Jisu Krista demnâng roamsiet lahma rongtêngtêng dangthuk ehi; ngale Joban dedema nãngkhu nâng renlahma rangkoh ehi,

²²Ngale nãngkhua aterãng ngama jetrãngma nãngkhu nâng atemãn hôanlahma thien ehi, ngale ate thiak chentôpa nãngrãng thienkoh ehi ngama jetrãng atema nãngnâng Asâthôanju kohehi.

²³Nga hâkhi pa Joban tonga, atema ngahung ngarin pa ajet! ngale ngama nenâng ritngat pa lehun dângjun koba Korint nâng leka dângwah.

²⁴Nima nenâng metkepkep putedâlem min jôba ngama khetlomah; Nima ajet nea putedâlem nâng rongtêngtêng dangletma tongeken. Rohkomin nekhu dede khuhah nâhah dângrãngma jôba nekhu demnâng johroam moeka.