Read Nocte Naga 2 Korint 10 Bible Online

2 Korint 10 - Nocte Naga bible

2 Korint 10

¹Nga Pol, ngadede ngewah nenâng rosep eka-chenthu nga nedemnâng dângpoatko numnene, rohkomin chenthu nga netawah metaang chhoantekko lângmõang dangeka ngama ngaeha. Krista mînko numnene ngale amînchen demnâng danglekma

²Ngama nenâng rosep eka, chenthu nga netânâng hokko nedemnâng nekpa thuk ha; chenrãngma ngako, are hahtokkhoh hei angem hung arin junko moat akatte heh demnâng nga metkep epa ang.

³Arepa linlin ngin, nãnga hahtokkhoh ko songtong eki, rohkomin nia hahtokkhoh hei angem hung arin junko mên ahiet mînte heh rãngrãng dangmih.

⁴Nima ranloatmînko kepki chhahkhempa hahtokkhoh wah ranlông chhahkhempa dangmah, erepa Joban ngewah ranlông chhahkhem achaanthôan pa kepki, erepumma ran huhtôngthin thechehthôan pa chhihsiet rãng kepeki. Ngale nima ledangli nâng chhiakmîn heh chhihsiet eki;

⁵Ngale Joban nekchenjet eka ngama ate lelatnâng chentô tengbengthin hongeka heh nima chhihsiet eki; ngale nima chentô mihnyan hungrin heh khôanlo lihma Krista ngin kepthuk eki.

⁶Ngale abengko nima nekhua nginkepkep dângthuk hunmêng eka, erediko ngin lekepte hehnâng nima phhekkhen nâkhen ehôan e.

⁷Nekhuma rongrup nângjô tokkhohnâng lolo sûeken. Nekhuwah hen akomin atea Krista rãng ngama tâchâritte mihnyan tongen a? Sen a, rohkomin ade rekthe thindede chenthe ngakthong hunrii tan a, chenrãngma ngako, thin chenroh Krista rãng dangeka eroh jôba nimin Krista rãng dangeki.

⁸Chenrãngma ngako, Teso ma nãngnâng kohthi chaan rãngma ngama ajahmanjô merâng thôtek komin, nga rêsêmak - ere chaanpa nganâng nekhu sênsietrãng kohwah, nekhu chhihsietrãng kohwah dangmah.

⁹Ngama nenâng are sitiraang ekapa nekhu nâng cheithôrãng raang dangmek.

¹⁰Wawathe ma, “Pol sitipa cheili ngale nyahrãng alat ngama rângnga a, ngale chenthu atea nãng tâko phoangpa mehû theko atea pachhih, ngale ate jabkhab heh sekhota!” ngama engathem en.

¹¹Ererãngrãng mihnyan hehma arepa mamjet en, chenthu nia netawah ataangnâng danglihma sitinâng chenni raangeka ngale chenthu nia nedamko danglihma chenni moatmin a ereheh mãnthe jôba dângmin.

¹²Ngale henma thin dedema nyahrãng adong ngama thonghun riieka ere mihnyan heh demnâng nidedema tathakmîn mih. Thin a chentô bâa! Thinma thindede dongsietrii lahma, Thin dede nâng thakrii eka!

¹³Rohkomin nikhu dangeki, khupliet nâng rângthô riimih; Joban ma moatlempa ninâng chentô mothuk ehia ereto jôba rângthôeki, ngale ere moatlem demko nikhu nedemnâng moeki moatlem pemin weih eki.

¹⁴Ngale nima chentô motih a ere tôjôba rângthôeki, khupliet nâng rângthô riimih, ngale Krista Nginkongsen pa nima netânâng kephûthi poatkomin khupliet nâng dangmahtih.

¹⁵Erohwah Joban ma ninâng chentô mothuk ehia ere lietnâng mihhan hehma moeka heh nima moatwah lele rângthô riimih. Erenoma, nekhu putedâlem pa adong chendangen ngamaba nima thonghun eki, erohkoba nima nekhu tânâng moatlemdong eta moe, ngale roantangma Joban ma chentôko mothuk ehia eretôko emoe.

¹⁶Eroh koba ne lienwah mihdiak hehnângmin Nginkongsen pa nima eta phoangthô chhoankoh e, ngale mihhan ma mochhoan thenâng mihmãnko molihma rângthô riimih.

¹⁷Rohkomin Joban nyapraangma ngaeka, “Henma akomin rângthô mehun ako, Teso ma chenni motah a erepa chenrângthôa.”

¹⁸Chenrãngma ngako, chenthu Teso ma asen ngama menga hiko jôba nãnga linlin asen edange, nãng dedema asen ngatrit rãng dangmah.