Read Nocte Naga 2 Korint 13 Bible Online

2 Korint 13 - Nocte Naga bible

2 Korint 13

¹Are pumma nga netânâng depremrãng chohmîn kaerâng. “Phumma chenni akomin lepchiak mînthin metong hènko, erepa wanii ba warem hâkhi demnâng lepchiak mînmin” - erepa Joban nyapraangma ngaeka.

²Ngama ama wah henhenma pap motah a ereheh nâng thôkoh ekang, ngale ahan hehnângmin phangtang nâng thôkoh eka; Arepa ngama amako netânâng depniirãng chohmîn katah komin thôkotah, rohkomin nga netâwah ataangnâng dâng phumma ademin thengak thôkoh eka: Chenthu nga netânâng thengak katko henjô phhekkhên nâkhên lehôan thangma lepemin.

³Nga junma Krista ma jabeka ngama nemajet hun ekenpa phangtang echohjet en. Chenthu atea nedemnâng dângko, atea pachhih dangmah; erenoma, ate chaan ba nekhu nâng khesok ehèn.

⁴Linlinjô atea aboan dângjunko bãngphak khoko rittek rewah, rohkomin, Joban chaanjunko atea athângheh ahin. Erohwah ate demnâng johroam lihma nãngkhumin boan jôba; rohkomin nimin nekhu demnâng johroam lihma nãngkhu memin ate roandông kohwah Joban chaanko ejohroam e.

⁵Nedede thaksûrii tan en, ngale thatjetrii tan en, ngale nea putedâlem junko songtong eken le songtong met a ngamemin thatsûrii tan en. Nema linlinjô Krista pa nikhen nâng tonghi ngama jetrii ekenle? phumma linlinjô Krista nekhen nâng aho medang hènko nea mahto lâdangtet.

⁶Rohkomin ngama dâlem ekang nema ninâng Krista tonghi ngama jetrii eken.

⁷Nema chenni kaamchhihjô nekchen moeken ngama nima Joban nâng rangsoam koh eka - rohkomin erepa nãnghung thattôanko nãngma tajien eki ngama khesokrãng dangmah, rohkomin nima letajô medang ekomin, nema chenpa toangtanga erepa moletma chenkhesok en ngama huneka.

⁸Chenrãngma ngako nãngma toangtang lelatnâng chenjô tamomih, toangtang rãngma asenli pa loloba moatmin.

⁹Nekhujô achaan medang tetko, nia boan anaajô medang ekomin khuhah nâhah dangeki. Ngale nea senthemthemjô chendangen ngama rangsoam koheka.

¹⁰Erohwah ngama arepa nekhu tâwah ataangnâng dângpoatko raangeka; erohkoba, chenthu nga netânâng mehû thangko Teso ma nganâng kohthang chaanpa keplekma nekhu nâng phhekkhên nâkhen lehôan edangang - nganâng nekhu sênsiet rãngmaba chaankoh ehang, nekhu chhihsiet rãng chaankoh dangmah hang.

¹¹Ngale ngalemruchha heh, ade dangeka, atô kojô jekmêng ekang! senthemthemjô dângrãngma latrii en; Ngama rosep eka komin mamjetat ha; wathema wathe demko jutjut jaangjaang dangletma tongen; mêmoma songtongen. Eroh koba Ahunte ngale mêmo Joban pa nekhu demnâng etonghèn.

¹²Mêmoma wathema wathe nâng deksit pekmîn letma salem kohmîn en. Chentô Joban nâng putedâlemte mihnyan hehma nenâng salem matkat ehèn.

¹³Nãng Teso Jisu Krista mînchenchaan, Joban wah ahun, ngale Asâthôanju nekhu chentô demnâng chenjoh tonghèn.