Read Nocte Naga 2 Korint 5 Bible Online

2 Korint 5 - Nocte Naga bible

2 Korint 5

¹Chenrãngma ngako nãngma jet are nãng song eki hum - are nãng phoangpa - mechhihjâ akomin, nãng sôngrãng rangkhethung nâng Joban ngenâng hum tonga, ere humpa ate dedema hôanwah, ngale erepa chenthumin lechhihjâ min.

²Ngale athângheh, ere rangkhethung wah kaera humpa nãngkhoh nâng pohkat kolahmele ngama nyahrãng huneki;

³ere rangkhethung wah kaera humpa nãngkhoh nâng mepohkoh thiko nãnga bôangloangma ledangtumin.

⁴Nãng are hahtokkhoh wah humko sông poatko, nãngma chêmchei chohjunko joang alin reki; rohkomin nima erepa are hei angem phoangpa chianga ngat dangmih, rohkomin rangkhethung wah humpa nikhohko chenpoh kohhi ngama huneki, erohkoba are aritte phoangpa leriite roandông pumma elitsiet a.

⁵Joban ma nãnga aroh litjârãng hôanehi, ngale ate thiak chentôpa nãngrãng khôanthienkoh ehi ngama jetrãng ate Ju nãngnâng kohehi.

⁶Erohwah nia roantangma lechei thangma tongeki. Nima ajet chenthu nia are hei angem phoang demko dangekia, ere tôko nia Teso tâwah ataangnâng tongeki.

⁷Chenrãngma ngako, nãng roandôngpa putedâlem junma hin ajoeki, mitma kheki junma dangmah.

⁸Nia hungdong rindong dangeki, ngale are hei angem phoangpa thînphe lihma Teso demnâng tôngba huneki.

⁹Are hahtokkhoh ko sôngpoatko medang akomin ba rangkhethung nâng ate demnâng songlihmejô medang akomin nãngma ate hungsênthuk ba huneki.

¹⁰Chenrãngma ngako nãngkhu phangtang Krista mathahko atema rênrãngma chepmin. Nãng hei angem roandông poatko henma chenroh motih a erejunko chohmin, asen medang akomin, achhih medang akomin, erejunko anga ngama chohmin.

¹¹Teso ran chenrãngma chei ekia erepa nima jet e, erohwah nima mihhan hehnângmin Teso tânâng hokrãngma rosep eki. Ngale Joban ma nia senthemthem jet hi, ngale nehung memin nga ejetthêmha ngama thonghun ekang.

¹²Nima nidede nenâng chenjet hi ngama rângthôrit dangmih; rohkomin, nijunma nenâng nginlinlin thôkoh eka, erohkoba hungwah ledang thangma khoankhoh phoang aroang junko rângthôritte hehnâng nema nimîn rângthô letma eta danthangen.

¹³Nia linlin apa lele dangekia? Erohjô medang ekomin Joban rãngba. Roh akole nia apa dangmihne? Erohjô medang ekomin erepa nekhurãng.

¹⁴Nia Krista wah hun achet pumma pên ehi, chenrãngma ngako, nima athângheh jeteki mihnyan wathepa chentô mihnyan hehrãngma ritwah, ere junkowah anga nga ate ritko johroam riieki.

¹⁵Atea anga nga rãngma ritwah, erohwah ahînte hehmin henjô mâmâ dede rãngma lehinmin, rohkomin thinrãngma hen riilahma ngakhintah a ere rãng loloba hînmin.

¹⁶Erohwah, nima hahtokkhoh wah mihnyan nyuchha hehma thonghun eka rãngrãng hennâng min thonghun tumih.

¹⁷Hen akomin Krista demnâng dangeka atea anyan lâdangtah; apã pa chhoantah, anyan pa lâhûtha.

¹⁸Are chentôpa Joban ma moeka, nãngkhua ate ran dangtihpa Krista junma ate lemruchha rãng lâlitsietthi, ngale mihhan hehmin ate lemruchha rãng hôanrãng moatlem pa nãngnâng kohehi.

¹⁹Nima thôki nginkongpa dangeka, Joban ma chentô mihnyan nyuchha heh Krista junma ate lemruchha rãng hôanehi. Joban ma mihnyan hehnâng thin papthã sekham tumah, ngale atema thin a ate lemruchha rãng chenroh hôanehia ere nginkong peba thôkoh ehi.

²⁰Erohwah nima Krista rãngma jabeki, ngale Joban ma ate dedema roatsep wah rãngrãng nikhu junma rosep ehèn. Nima Krista mînko rosep eki: Joban ma ate ran dangtet pa ate lemruchha rãng chenlitsiet hèn!

²¹Krista nâng pap aho dângwah, rohkomin Joban ma atea nãng pap demko johroam thukeka, erepa nãngmin ate demnâng johroam lihma Joban toangtang pa tachoh eki.