Read Nocte Naga 2 Korint 6 Bible Online

2 Korint 6 - Nocte Naga bible

2 Korint 6

¹Nima Joban demnâng aroamma molihma nenângmin henhenma Joban mînchenchaan pa chohtet a ereheh nâng Joban mînchenchaan pa mahto nâng nekdangthuk en ngama rosepeka.

²Joban ma chenni ngaeka erepa tattan en: “Chenthu ngama nenâng chohsok sanpoat pa mehû theko; Ngama nenâng ejetat a; Chenthu ngama nekhu pepâng rangwo pa mehû theko, Ngama nenâng echohsûa.” Tattan en! Are sanpoat pa nema Joban wah chohsokchoh sanpoat; ngale thejâ jôba khope rangwopa!

³Nima moeki moatlempa hennâng min achhih ngatrit hunmih, erohwah, nima hen lemkhô nângjô tengbengthin thienkomih.

⁴Erohwah, nima chenjô memo ekomin, rongrup lemma nia Joban haa ngama khesokrãng chêmchei, patrit sekmah, ngale boanrit nâchhâ komin hungmong sietrii lihma thaeki.

⁵Ninâng awatmin watthi, phâtek nângmin sekthi, ngale loangkhu memin koamwatthi; nima ajupmin lejup, ngale phhekchhah lechhah thang memin lâthat chaanmotih.

⁶Rohkomin, nia sâpoangpoang, Joban buthi mongthem, hungmông, ngale mihnâng mînchen junma, nia Joban haa ngama khesok eki - ngale Asâthôanju, erediko niwah linlin hun achet junmemin khesok eki,

⁷ngale nima toangtang ngin thôeki junko, ngale Joban chaan junma khesok eki. Ninâng toangtang pa ranloat chhahkhem rãngrãng tonghi, erepa nima ranlông rãngmin, ngale nidede khope rãngmin kepeki.

⁸Nia achoangpemin rethi, ngale rêsêmin thang ehi; ninâng dûmmek min, ngale rômin re ehi. Ninâng mothô ngamemin ngaehi, rohkomin nima toangtang thôeki;

⁹ngale nia henmejô lejetwah rãngrãng medang ekomin, nia anga ngama jet ehi; ngale nia riichoan rãngrãngjô medang ekomin, nemejô akhe, nia ahîn jôba. Ngale ninâng chêmsietjô merehi komin, ritphe mahhi.

¹⁰Ngale nia chentô hung mechhih ekomin, roantangma khuhah nâhah tongeki; ngale nia tangchhih medang ekomin, nima jahmõang mihnyan techhurãng hôan eki; ninâng chenjô aho rãngrãng medang ekomin, nima linlin rongruppa cheiki.

¹¹Korint wah lemruchha heh! Nima nihung nâng chenmin lehuhsek thangma nenâng laangthô koheka; nihung phangtang nenâng têmlem koheka.

¹²Nihung nenâng lelaangkoh dangmah; nemeba ninâng nehung laangko mahhi.

¹³Ngama athângheh nea nga chhuchha tôko thonghun lekma jabekang: Nima nenâng chenroh thonghun eka ererãngrãng nememin ninâng thonghun letma khesok hi. Nehung phangtang têmlem kohhi!

¹⁴Joban nâng lepute dâlemte heh demnâng manthe dangletma nekroam mo en, chenrãngma ngako eroh chenthumin lejien dangmin. Achhih le asen chenroh jienroam min a? Ngale rangwo le rangnyek chenroh jienroam min a?

¹⁵Krista le joaknii chenroh jienroam min a? Ngale Joban nâng putedâlemte le Joban nang lepute dâlemte nii chenroh jienroam min a?

¹⁶Joban Rangsoamhum pa moangachaang heh demnâng chenroh jienroammin a? Chenrãngma ngako nãnga ahîn Joban Rangsoamhum! Joban ma ate dedema ngatwah, “Nga a nganâng putedâlemte mihnyan heh demnâng eroamsong ang ngale thindemko khoam achi lekma etongang; Nga a thin Joban rãng edangang, ngale thinmin nganâng putedâlemte mihnyan rãng edanga.”

¹⁷Ngale Teso ma aroh ngaeka, “Nea ere mihnyan heh tâwah loatchhoan en ngale thindemwah taangchhoan re en. Ngale chenpa achin angek a ereheh nâng neksahlo en, ngale erohkoba ngama ne ekep a.

¹⁸Nga a ne Wa rãng edangang, ngale nea echha delachha ngale dihiak chha edangen, arepa adongthôan Teso ma jabeka.”