Read Nocte Naga Galatien 1 Bible Online

Galatien 1 - Nocte Naga bible

Galatien 1

¹Arepa moattat chhoante Pol ngewah raangeka, Nga moattat chhoante rãng mihnyan nyuchha ma roowah dangmah, ngale mihnyan nyuchha hung junmemin dangmah, erepa Jisu Krista ngale Joban Wa, Jisu Krista ritwah ngakhînsiette pumma roowah.

²Anângwah chentô putedâlemte hehmemin nga demnâng roamlahma Galatien wah Asâthem hehnâng salem matkat ehèn:

³Nãng Wa Joban ngale Teso Jisu Krista ma nenâng mînchenchaan ngale mêmo chenkohhèn.

⁴Are nãng songeki hahtokkhoh chhih kowah nãngkhu pêpâng rãng, Krista ma nãng Joban ngale nãng Wa ngin keplahma atedede roandôngpa nãngkhu pap rãngma kohwah.

⁵Joban mînpa roantang roangjêng rãng adong chendanga! Amen.

⁶Nga nekhu demnâng patritba re ekang! chenrãngma ngako, chuthe tungko Krista mînchenchaan junko neroote pa thînphethien eken, ngale nema ahan nginkongsen kep eken.

⁷Linlinko, “nginkongsen ahan,” aho, rohkomin are ngama ngaekang pa wanwanthe mihnyan hehma Krista Nginkongsen pa litsiet lahma nehung kesiet ehèn, erejunko ba jabekang.

⁸Rohkomin nimejô medang ekomin, ba rangkhethung wah Joban ngintatte heh mejô medang akomin, nima nenâng thôkotah Nginkongsen noma ahan methôhû kohhènko, ereheh chenthumin lemutthin pap wendô nâng chenkhamrii kawak a!

⁹Arepa amakomin nima thôkotah, ngale ademin thengak depthô koheka: nema ni ngewah chohtat letma keptet Nginkongsen noma ahan nginkongsen methôhu kohhènko, ereheh chenthumin lemutthin pap wendô nâng chenkhamrii kawak a!

¹⁰Arepa nganâng mihnyan hehma dangkoh a ngalahma chensen chohhang ngama jablele ne? Linlin eroh hun dangmek! Ngama Joban ma dangkoh a ngalahma senchoh peba hun ekang! Nga mihnyan heh chentôma chenkhem jet hang ngama lehun ekanga? Athâng hehmin ngama eroh thonghunthu medang angko, Nga Krista haa ledangmin wah.

¹¹Ngalemruchha heh, Ngama nenâng are Nginkongsen thôkoh ekapa mihnyan nyuchha ma hôanwah dangmah.

¹²Ngama arepa mihnyan nyuchha wah chohthâ wah dangmah, erediko arepa nganâng henmemin hethôho. Arepa Jisu Krista ate dedema nganâng khesokwah.

¹³Ngama Jews heh dôrem keplekma tôngpoatko chenroh hungkoh lekma dangtek a, ngale Joban nâng putedâlemte Asâthem hehnâng lemînchen thangma chenroh chêmsiettek a, ngale ngama tata angpa chhihsietrãng moatwah, erengin heh nenâng phangtang thôkotah.

¹⁴Jews dôrem hepoatko ngatôthã ahan Jews heh khuchhang wah nga ajetthôan dângwah, ngale te awa heh belem niemarang ko nyahrãng hungkoh lekma kepte dângwah.

¹⁵Rohkomin Joban ma ate mînchenchaan pumma ngachhat mama rênwah, ngale atenâng soamtô rãng rooehang. Ngale ngama

¹⁶Jews ledangte hehnâng ate Nginkongsen pa phoangthô chhoankoh rãngma ate Chha khesok thangko, Ngama hennângjô thongchhien chhoanho,

¹⁷erediko Jeroselem wah nganoma khemama moattat chhoante dangtah heh tânângmin chohmîn chhoanho. Erenoma, Nga lemlienma Arabia nângba katek, ngale enângwah, Damaskas nâng danwãngtek.

¹⁸Rangpâ pârem dikoba Piter wah ngin chohtat rãng Jeroselem nâng katek, ngale ate demnâng heptanii johtong thientek.

¹⁹Ngama enâng moattat chhoante ahan henjô chohkheho, Teso naa Jems loloba chohmîntek.

²⁰Ngama chenni raang ekanga erepa toangtang. Joban memin ajet, ngama mothô thômek!

²¹Erediko Nga Siria ngale Kilika nâng melâng thenâng chhoantek.

²²Ere sanpoatko Judia wah Asâthem hehma Nga senthemthem majet dângwah.

²³Thinma nga nginpa aroh loloba chohtatwah: “Nãng chêmsiette mihnyan pumma, ade phumma atema poattheko chhihsiet phêrãng ngatah putedâlem nginpa phoangthô eka ngama!”

²⁴Ngale ngajunma thinma Joban nâng rôwah.