Read Nocte Naga Galatien 2 Bible Online

Galatien 2 - Nocte Naga bible

Galatien 2

¹Echhi pâbelii diko, ngademko Titas sietlekma, Barnabas demnâng Jeroselem nâng ngakkatwah.

²Nganâng Joban ma katmin jôba ngama khesok phumma katwah. Khhepho phannang heh demnâng araangraang chohmîn poatko ngama Jews ledangte hehnâng thôkotek nginkongsen nginpa thinnângmin thôkotek. Ngama ngamoatlem pa lientahwah sanpoat komin, ba athâng hehmin mahto nâng dângthuk hunmek.

³Ngalemru Titas pa Griik medang akomin, atenâng khoankhen niem hôanmin jôba ngama metkepkep chienmek,

⁴rohkomin khaka hehma hôanmin jôba ngama ngaeka. Are mihnyan heh putedâlemte rãngrãng diapdang lahma, nikhu Jisu Krista demnâng roamlihma chenroh hungsiko dangekia, ereheh jêjetrãng huhlup hûera. Ngale thinma nia haarãng hôanhun wah,

⁵rohkomin, nginkongsen pa nekhu rãngma toangtangma chentong kohhèn ngama, nima thinnâng sanpoat chhupthejô kohho.

⁶Rohkomin khhepho phannang hehnângmin-ngama are jabekang pa thinnângmin khhepho phannang ngama hôan lekma Joban nginkongpa araangraang thôkomek; chenrãngma ngako, Joban ma thhenphãng sûlahma renmah - ere khhepho phannang hehmemin, are ngama jabekang junko, nganâng ngin anyan chenjô thôkohho.

⁷Erenoma, Joban ma Piter nâng Jews hehnâng nginkongsen pa phoangthôkoh rãng chientah rãngrãng, nganângmin Jews ledangte hehnâng nginkongsen pa phôangthôkoh rãng Joban ma chieneka ngama chohkhetah.

⁸Chenroh Piter Jews hehrãngma moattat chhoante rãng hôantah a, ererãngrãng ngamin Joban chaanma Jews ledangte hehrãngma moattat choante rãng hôan ehang.

⁹Khhepho phannang ngaeka, Jems, Piter, ngale Jon, hehmemin Joban ma nganâng are moatlemdong koh ehangpa jeteka; erohwah thinma Barnabas chenii nâng nãngkhu phangtang lemru tuta ngama jetmînrãng thinma dek sitpekmîn thi. Barnabas chenii a Jews ledangte heh demnâng moatmin, erediko thin a Jews heh demnâng moatmin ngama nikhu pûnthô mînwah.

¹⁰Thinma ninâng roatsep pa thin khuchhang wah tangchhih hehnâng thônghunrãng roatsep wah, phumma ere moatlem pejôba ngama nyahrãng moathun ekang.

¹¹Rohkomin chenthu Piter Antiok wah katko, ngama nok atang mathahko atenâng ritngatwah, chenrãngma ngako atea nyahrãng athe dângwah.

¹²Enâng Jems ma chienkatwah mihnyan heh hokkhoam mako, Jews ledangte heh demnâng Piter aroamma jokphhek chhah lahma dângwah. Rohkomin ere mihnyan heh hokkhoam diphumma, atema Jews ledangte heh demnâng roam jokphhek chhah tuho, chenrãngma ngako, atea khoankhen niem pa hôanmin jôba ngama hunte heh rancheiwah.

¹³Piter demko Jews jatwah putedâlemte rãng litdangtah hehmin johcheiwah; ngale thinchei junko Barnabas tumin thin demnâng johchei sietwah.

¹⁴Ngama chenthu thin a toangtang nginkongsen junko tintin lekhoam khe phumma, Ngama thin phangtang mathahko Piter nâng ngatwah, “Nanga Jews jat, rohkomin nanga Jews rãngrãng ledang, Jews ledangte heh rãngrãng dangeko. Eroh medang ako, nangma Jews ledangte hehnâng Jews heh rãngrãng dangen ngama chenroh jienchien min a?”

¹⁵Linlinjô, nia achhat mejû Jews jat, thinma ngaeka rãngrãng, “Jews ledangte papi jat dangmih.”

¹⁶Nãngma ajet mihnyan pa Jisu Krista nâng putedâlem junko lolo jôba Joban demnâng toangtang tadang eki, Niemarang ma chenni huneka erepa moatjunma toangtang tadangmih. Nimemin Jisu Krista junma Joban demnâng toangtang tâdângrãng Jisu Krista nâng putedâlem eki, ngale Niemarang ma chenni huneka erejunma toangtang dâng dangmih. Chenrãngma ngako Niemarang ma chenni huneka erepa molahma henmin Joban demnâng toangtang tadangmah.

¹⁷Nãngmin Jisu Krista demnâng roamlihma Joban demnâng toangtang medang eko, nãngmin Jews ledangte hehnâng papi ngaeki rãngrãng papi jôba - eroh medang ako nãngmin Krista ma pap ledangthuk ehia? Erohmin dangthuk mahhi!

¹⁸Ngama chhihsiettek Niemarang pa ngamejô methe ngaksensiet angko, nga a athe ngama khesok ekang.

¹⁹Niemarang nâng methakthô eko, nga riichoanthã - Niemarang pummejô ritphe ehang - erohwah nga ade phumma Joban rãngma hintu ekang. Nga Krista demnâng bãngphak khoko lâjoh ritphethang,

²⁰erohwah athâng hehwah hin ekangpa Nga hîn dangtumek, rohkomin, arepa Krista nganâng tong ehang. Athâng hehwah, are nga roandông dong ekangpa, Ngama nganâng hunte, ngale ngarãng ate roandông kohte Joban Chha nâng putedâlem lekma tongekang.

²¹Ngama Joban mînchenchaan pa choh lehun dangmek. Rohkomin Niemarang junma mihnyan pa Joban demnâng toangtang meta dangako, Krista ritpa mahto nâng mahriieka!