Read Nocte Naga Galatien 4 Bible Online

Galatien 4 - Nocte Naga bible

Galatien 4

¹Ngama nenâng arepa thôkohhun eka - hen akomin ate wa thin amãn chohtea, erepemin letachha thuko chentô ate wa thin amãn heh chohtejô medang akomin, atea haa rãngrãng jôba thieneka.

²Ate wama atenâng kohrãng sanpoat pa mahûhûko, ngale atea leta thuko, mihhan ma ate sûare lahma thieneka, ngale ate thiak aman hehmin sûare koheka.

³Ererãngrãngjô, nãngmin Joban Ju choh ngenâng phannang rãngrãng dângmako, are hahtokkhoh pênte ju haa danglihma tôngwah.

⁴Rohkomin chenthu sanpoatsen pa hokphumma Joban ma ate Chha chienkat era. Atea dihiaknyu ma chha lahma Jews heh Niemarang khenko sôngtông katwah,

⁵chenrãngma ngako, nãngkhu Joban Chha jiendângrãng ngama atea Niemarang khenwah mihnyan heh pepâng rãngma katwah.

⁶Ngale nekhua ate Chha ngama khesokrãng ma chienkatwah, Joban ma ate Chha Jupa nãnghung khennâng chienkat era, ere Ju pumma, “Wa, Ewa,” ngama raksep eka.

⁷Erohwah nekhua haa dangtumet, Chha lâdangtet. Ngale nekhua ate Chha dâng phumma, Joban ma ate chhuchha hehrãng chentô thienko tahheh phangtang nekhu nâng ekohhèn.

⁸Amako nema Joban lejet dângwah, ngale chenpa Joban ledanga ere haarãng dangletma tôngwah.

⁹Rohkomin ade phumma nema Joban lâjettet - ba, Joban memin ne lâjetthen - phumma aboan ngale sekhota hahtokkhoh pênteju tâko ngakhokrãng chenroh jienhun eken a? Chenni rãngma thinhaa thêngak dânghok hun eken a?

¹⁰Nema rangwo dâjeng, rangkuh sanha, ngale rangkuh rangpâ hehnâng soamtô letma tôngwah.

¹¹Nga nekhu rãngma patrit sekmah re ekang! Ngama nekhu rãngma chentô moekang heh mahto nâng lemo ekanga?

¹²Ngalemruchha heh, Ngama nenâng nga rãngrãng dangen ngama rosep eka. Chenrãngma ngako ngamin nekhu rãngrãng jôba. Nekhuma ngarãngma chenjô chhihmomet.

¹³Ngama nekhu nâng nginkongsen pa chenrãngma khebengrãng thôhûkoh eka erepa thonghuntan en; arepa nga khun dângwah dângjunko.

¹⁴Nga phoangnâng khun junko nekhu nâng mechêmsiettah komin, nekhuma nga phemahtha, ngale chinnya mahtha. Erenoma, nema Joban ngintatte heh tãngroo rãngrãng tãngrootha, ngale nema Jisu krista tãngroo eken rãngrãng tãngrootha.

¹⁵Ne nyahrãng khuhah letma dângwah! phumma athângheh ere khuhah pa chenkoa? Ngama linlin ajet, tâdângli ngako nema ne mitken pa loatletma nganâng chenkohtha.

¹⁶Rohkomin, ade phumma ngama nenâng toangtang nginpa thôko lahma neranrãng ledang ekanga?

¹⁷Mihnyan ahan hehma nyahrãng hun achet khesok lahma nekhu nyoamrãng hun ehèn, rohkomin thinhung khennâng mongthem pa achhih them eka. Thinma nekhua ngademwah phansietrãng lolo huneka, erohkoba, thinma nenâng chenroh hun achhâ ehèn a ererãngrãng nememin thinnâng ehun en.

¹⁸Phumma asenrãng medang ako eroh hungkoh pa asen - arepa roantang toangtang ngin, nga nekhu demnâng dângpoat kololo dangmah, nekhu tâwah ataangnâng dângpoat komin toangtang.

¹⁹Echhu echha heh! Nyong nâng naachhat poatko rângchhâ arãngrãng, Krista hung arin jat apat pa nekhu nâng mahong honghènko, nganângmin nekhu rãngma ademin rekthe chhâ ehang.

²⁰Nga athângheh nekhu demnâng danglek mele ngama nyahrãng hun ekang, erohkoba ngama nekhu demnâng athâng hehwah rãngrãng ledang thangma chenjab mîntah. Nga nekhu rãngma nyahrãng sekmah patrii ekang!

²¹Henhen Niemarang khennâng tônghun eken a ereheh nâng ngama thatthôngpha tan a: Niemarang ma chenni ngaeka erepa nema mãthattat ekenne?

²²Niemarang pumma Abraham nâng chha wanii dângwah ngaeka, wathepa haanyu ma chhatwah, ngale wathepa haa ledangte pumma chhatwah.

²³Haanyu ma chhatah ate chhapa hei angem junma chhatwah, rohkomin haa ledangte ma chhatah ate chhapa Joban ma toamsem tah junma chhatwah.

²⁴Are thakmîn eka hehnâng sûlihma tajet e: Dihiaknyu wanii pa toamsem kahkhet wanii pa. Hagar ma chhatah heh haachhu haachha, ngale atea Sinai hahho khowah toamsêm kahkhet hôantahpa.

²⁵Arab wah Sinai hahkong pa Hagar ngale erepa athâng hehwah Jeroselem hah pa, ngale atea ate mihnyan chentô heh demnâng haarãng dangeka.

²⁶Rohkomin rangkhethung wah Jeroselem pa henkhen nângmin haa dangmah, ngale atea nãng nyong.

²⁷Chenrãngma ngako Joban nyapraangma ngaeka, “Chhuho chhaho dihiaknyu heh khuhah nâhah dangen! Naachhat poatwah chet lethat jette dihiaknyu heh, khuhah nungma raksep en! Chenrãngma ngako, dela aho dihiaknyu heh dela ma chenthumin lethat pâphete dihiaknyu heh nomemin chhujah chhajah edanga.”

²⁸Ngalemruchha heh, ade phumma nea Joban ma toamsem junko Isak dangtah rãngrãng Joban chha lâdangtet.

²⁹Ere sanpoatko mihnyan hei angem junma chhatah pumma Joban Ju junma chhatah ko chêmthuk rewah; ngale athâng hehmin ere sanpoat wah rãngrãng dangeka.

³⁰Rohkomin Joban nyapraangma chenni ngaeka, “Haanyu le ate chhanii chienchhoan re en; chenrãngma ngako haanyu ma chhatah chha pumma haa ledangte dihiaknyu ma chhatah chha demko ate Wa thin amãn, hehwah lejoh chohmin.”

³¹Ngalemruchha heh, erohwah, nãnga haanyu chhuchha dangmih, nãnga haa ledangte dihiaknyu chhuchha.