Read Nocte Naga Galatien 5 Bible Online

Galatien 5 - Nocte Naga bible

Galatien 5

¹Nãnga mihhaa dângwah jek ekipa - Krista ma loatsiet ehi! Erohwah, mihhu mihaa ledangte rãngrãng dangen, ngale nededema mihhaa rãng nekhôanrii en.

²Tattan en! Nga Pol, Ngama nenâng thôkoh eka, nededema niemarang junko khoankhen niem mehôanthuk enko, Krista pa nerãngma sekhota thã.

³Ademin ngama chentô nâng thôkoh eka, henhenma atedede khoankhen niem hôanthuk eka, atema Niemarang pa phangtang metkep kepmin.

⁴Nekhuwah henhenma Niemarang pa kepletma Joban demnâng toangtang tâdâng hun eken a, ereheh Krista demwah taangmin eka. Ngale nekhua Joban mînchenchaan khennâng dangmet.

⁵Nãngkhuma, Joban ma ate demnâng toangtang edangthuk hi ngama khaeki; ngale nãngkhu putedâlem junma Joban Juchaan ma moat pa bemeki.

⁶Chenrãngma ngako chenthu nãnga Jisu Krista demnâng meroam tihko, khoankhen niem mehôan ekomin, ba lehôanjô medang ekomin erepa chenjô mâmâ dangmah; hun achet demko putedâlem peba lemeka.

⁷Nema sênmõang moatwah! Henma toangtangko putedâlem ekenpa jeksiet ehèn a? Atema chenroh jiennyoam ehèn a?

⁸Erepa neroote Joban ma moat dangmah.

⁹Thinma ngaeka rãngrãng, “Pheban pa phangtang bietjârãng wichhi amãnchha ba lemeka.”

¹⁰Rohkomin ngama nenâng athâng hehmin dâlem eka. Nãngkhu roandôngpa Teso demnâng roamlihma dângjunko ngama dâlem ekang, mihhan mejô nenâng lihân ngin methôhû kohhèn komin nema thin nginko putedâlem met, ngale henjô medang akomin nekhu moksiette heh Joban ma echêmthuk a.

¹¹Ngalemruchha heh, Ngarãng ma dangeka, Ngama khoankhen niem pa hôanmin jôba ngama mephoangthô angko, Nganâng athâng hehmin chenrãngma thamchêmsiet eha? Ere nginpa toangtang medang ako, Ngama Krista bãngphak junma phoangthô ekang ngin pumma chenjô chêmsiet mahhi.

¹²Ngama thonghun ekang nemoksiette mihnyan heh khoankhen niemhôan lolo ledang lengmin chentên riiwak a!

¹³Ngalemruchha heh, nekhu rãngma dangeka, nekhua Joban ma hungsiko tongrãng rooehèn. Rohkomin, nehungsiko dangeken junma, ne hei angem phoangma chenni huneka erejunko nekdangen. Erenoma, hun achhâmin letma wathema wathe nâng chohsûmîn en.

¹⁴Chenrãngma ngako Niemarang pa phangtang wanthe hôkum khenko tongeka: “Nang kêanâ wah mihnyan hehnâng nangdede hunriieko rãngrãng hun o.”

¹⁵Phumma nea wunwah ngem rãngrãng dangletma, wathema wathe nâng mitchek chhihchohmîn, erediko buh awatmin reletma medang enko, thatsûtan en, wanwanthe ma phangtang etathôan ritphemîn en.

¹⁶Ngama jabekang pa dangeka: Ne roandôngpa Ju junko dongen, ngale erohkoba nema mihnyan nyuchha hei angem ma hun ekapa lemo etadangen.

¹⁷Chenrãngma ngako nãng mihnyan nyuchha hei angem jat apat pumma chenni huneka erepa, Juma hunmah, ngale chenpa Juma huneka erepa, nãng mihnyan nyuchha hei angem jat apat pumma hunmah. Are wannii pa ran, ngale erejunko nema chenni hun eken a erepa nehungsima tamomet.

¹⁸Phumma nea Juma mesen hènko, Niemarang khennâng dangmet.

¹⁹Mihnyan hei angem ma chenni moeka erepa anga ngama ajet. Erepa dihiak dela kaamchhih moat, moatlem chin, ngale lapien.

²⁰Ngale moangachaang nâng soam, erediko mõngama chhihrãng phoangdang lahma ekhe e. Mihnyan heh ranrãng danglahma loatmîn; phetwânmîn, rinkhah, ngale mâmâ dede rãnglolo hun edanga. Thin dedema mâmâ khukhu phoang phakjâ rewak eka;

²¹chhahnyoak, khemmok chempa, kuhhoan lahma jokphhek chhah, ngale arerãngrãng lihân hehmin ephoang mowak a. Amawah rãngrãng ngama nenâng athâng hehmin thôkoh eka: henhenma arerãngrãng moatlem heh moeka erehehma Joban Hahsông pa leta chohmin.

²²Rohkomin Joban Juma hun achetmîn, khuhah nâhah, mêmo, hungmôngma tadô, mînchen, asenli, ngale putedâlem,

²³numnene, mâmâ dede hung tâmôngsiet peba koheka. Arerãngrãng heh lelatnâng chenni Niemrangjô aho.

²⁴Ngale henhen Jisu Krista demnâng johdang eka erehehma mihnyan nyuchha hei angem jat apat, ngale atema huneka chentô heh ritphe rêmin.

²⁵Ju pumma nãngnâng roandông kohehi; erohwah atema jôba nãng roangdông pa pênmin.

²⁶Nãnga ngam poapoa ledangmin, ngale wathema wathe rin lekhahsiet mînmin, erediko wathema wathe nâng lephatwân mînmin.