Read Nocte Naga Ifisien 2 Bible Online

Ifisien 2 - Nocte Naga bible

Ifisien 2

¹Amako nema nginlekep dâng junma ngale pap junko nea Ju nâng riiletma dângwah.

²Ere sanpoatko nema are hahtokkhoh kowah achhih heh lemkhôko junkhoam letma dângwah; ngale nema hahtokkhoh pênte ju ngin kepletma dângwah, ereju pumma athângheh Joban ngin lekepte mihnyan heh pêneka.

³Linlinko nãngkhumin phangtang thin rãngrãngjô nãng mihnyan nyuchha hei angem hung arinma chenni huneka erejunko songtong lihma dângwah, nãngphoang ngale hung arinma chenni huneka erejunko molihma dângwah. Nãngmin, hei angem junko aphoak mejô mihhan heh rãngrãng Joban rinkhah khenko chêmchohte dângwah.

⁴Rohkomin Joban mînchen pa ajah, ngale ate hun achet pa adong,

⁵nãngma nginlekep dângjunma junâng riilihma dângthuko, atema Krista demko nãngnâng roandông kephû kohehi. Erepa Joban mînchenchaan junma nekhu khope eken.

⁶Nãnga Jisu Krista demnâng aroamma dângjunko Joban ma Krista demnâng rangkhethung nâng aroamma pênrãng johngak hinsiet ehi.

⁷Atema are moeka pa, ahokmin sanpoat roakweih Jisu Krista junma atema nãngnâng ate mînchenchaan ngale hun achet pa atâthakli ledang dông tonga, ngama khesokrãng moeka.

⁸Chenrãngma ngako, Joban mînchenchaan ngale nema putedâlem junma ne khope eken. Erepa nedede chaanma moatjunma dangmah, Joban ma hînhô koh ehèn, erohwah ererãngma henmin tarângthôrii met.

¹⁰Nãng chenroh dangekia erepa Joban ma hôanehi, ngale atema nãngmin Jisu Krista demko moatlemsen heh moatrãng hôanehi, ere moatlem heh nãngma moatrãng atema lâkhoakhem kohthi.

¹¹Nea nyong chhachhat mejû Jews ledangte-ngale Jews hehma “khoankhen niem lehôante jat” ngama ngaehèn, phumma thindede nâng khoankhen niem hôante jat ngama ngariieka (erepa mihnyan hehma thinphoang ko niemhôan ekako ngaeka) - thatthong hun tan en, amako nea chenroh dângwah a.

¹²Ere sanpoatko nea Krista demnâng ledangwah. Nea mihdiak mihnyan rãngrãng dângwah, ngale Joban ma ren eka mihnyan heh demnâng ledang dângwah. Joban ma ate mihnyan hehnâng toamsem lahma kahkhetmin tahko nea lejohroam dângwah, ngale nea are hahtokkhoh ko dâlem thinmin aho ngale Joban min aho songtong letma dângwah.

¹³Rohkomin, ade phumma, Jisu Krista demnâng aroamma dangletma amako Joban demwah ataangnâng dangtet pa, ade phumma Krista hei junma Joban tâko lânamsiet hûthen.

¹⁴Chenrãngma ngako, Krista dedema Jews le Jews ledangte heh mihnyan watherãng hôanlahma nãngkhu nâng mêmo kephû kohehi. Thin phansiet lahma ranrãng dangthuktah tukthhen pa Krista phoang pumma chhihsiet phekoh eka.

¹⁵Mihnyan jatnii kowah ate demko mihnyan anyan watherãng hôanrãng atema Jews heh Niemarang ngale hôkum heh rephe koheka, atema eroh molahma mêmo dangthuk eka.

¹⁶Krista ma bãngphak khoko ritjunma thintungko ran dangtah heh rephe koheka; Atema bãngphak junma mihnyan jatnii dangtah heh phoangtherãng roapsiet lahma Joban tânâng ngaksiet hûeka.

¹⁷Erohwah Krista kalahma mêmo Nginkongsen pa chentô mihnyan nâng phoangthô kakoh era - Jews ledangte jat ngale Joban tâwah ataangnâng dângwah hehnângmin thôkoh ehèn, ngale Joban tâko tôngte Jews hehnângmin thôkoh ehèn.

¹⁸Arepa Krista junma lolo jôba Jews ngale Jews ledangte jat heh Ju wanthe danglihma Wa tânâng tawãng eki.

¹⁹Erohwah, ne Jews ledangte hehmin ade phumma mihdiak mihnyan ngale mihwun dangtumet; nemin ade phumma Joban mihnyan heh demnâng lâdangtet, ngale Joban humkâwah mihnyan tuta lâdangtet.

²⁰Nemin moattat chhoante ngale mõng hehma hôanrang phungtah humthinko hôanwah hum rãngrãng lâdangtet, ngale Jisu Krista pa ere humthin kowah alemthôan long.

²¹Ngale Krista ma jôba ere Hum pa aroamma rõnglo lahma thieneka, ngale atema ere humpa Teso rãngma Rangsoamhum Asâ dangthuk eka.

²²Nemin ate demnâng roamletma mihhan heh demnâng ate Ju junma Joban sôngthin therãng hôan ehèn.