Read Nocte Naga Ifisien 3 Bible Online

Ifisien 3 - Nocte Naga bible

Ifisien 3

¹Nga Pol, Jews ledangte heh nekhurãng Jisu Krista mînko phâtek nâng khhekritte rãngrãng danglekma Joban nâng rangsoam ekang.

²Joban ma ate mînchenchaan junma are moatlempa nekhurãng sênrãngma nganâng mothuk ehang, ngama nekhuma linlin lâchoh tattet.

³Joban ma ate hungkhen wah huhtham awa ekapa nganâng khesok lahma jetthuk ehang. (Ere junkowah ngama amãnchha raang ekang,

⁴ngale ngama chenni raang ekanga erepa nema meweih enko, ngama Krista junma chenni jet ekanga erepa nema ejet en.)

⁵Amako are patritli nginpa mihnyan nyuchha hehnâng lethôkoh thangma thienwah, rohkomin erengin pa ade phumma Joban Ju junma ate moattat chhoante Asâ ngale mõng Asâ hehnâng khesok eka.

⁶Apatritli nginpa dangeka, nginkongsen junma Jews ledangte hehmin Jews heh demnâng roamlahma Joban wah rang johkepmin; thinmin phoangthe kowah tuta jôba, ngale Jisu Krista junma Joban ma toamsem tahko thinmin johroam eka.

⁷Joban ma nganâng nyahrãng mînchen junko nga a nginkongsen haarãng Joban ma hôanwah, erepa Joban ma ate chaan junma kohwah.

⁸Chentô Joban mihnyan khuchhang wah rinthôan nomemin nga jôba rinthôan; rohkomin Jews ledangte hehnâng leta thôanli Krista Nginkongsen pa thôchhoan kohrãng nganâng koh ehang,

⁹ngale Joban ma patritli themawa ekapa chenroh dângmin a ngama chentô mihnyan nyuchha hehnâng khesokrãng mothuk ehang. Chentô têm atiakte Joban pumma atema patritli themawa ekapa amawah lienchhoantah roan hehnâng lekhesok thangma huhthienwah,

¹⁰Joban ma thonghun ekapa rangkhethung wah chentô pênte ngale chaan ahang kepte hehma athâng hehwah Asâthem heh junma ate ngewah jatrup buthi mongthem pa chenhea ngama thonghun eka.

¹¹Joban ma arepa ate buthi mongthem junko roantang roanjêng rãng themawa lahma moeka, ngale erepa nãng Teso Jisu Krista junma tamoeka.

¹²Krista demnâng roamlihma, ngale nãngma atenâng putedâlem junko Joban tânâng lechei thangma ngale hungdongdong danglihma eta wãnge.

¹³Erohwah ngama nenâng rosep eka, nekpatrii en, chenrãngma ngako, nga nekhurãng chêmrii ekang; arepa nekhurãng lolo asenli dângrãngma chêmrii ekang.

¹⁴Are rãngma Ngama Wa mathahko nga dakuhtho lekma kunjup ekang,

¹⁵ate ngewah jôba rangkhethung wah ngale hahtokkhoh wah chentô humkâ hehma toangtang mînpa choh eka.

¹⁶Ngama Joban ngewah thaekang, ate ngewah leta thôanli mîndong eka Juchaan junma ne Ju nângmin chaan chenkohhèn,

¹⁷ngale putedâlem junma nehung khennâng Krista chentonghèn ngama rangsoam ekang. Erediko ne roandôngko hun achet mînpa rongtêngtêng chenhun chenchhâmîn en ngama soam ekang,

¹⁸erohkoba, Joban nâng putedâlemte mihnyan heh phangtang demnâng roamletma, nememin Krista ma hun achet pa chentô dônga, ngale chentô loat a, erediko chentô choanga, ngale chentô lûa, erepa tâjetrãng chaan echoh en.

¹⁹Linlinjô, nema Krista ma hun achet pa phangtangjô leta thôanjet kenkomin - nema Krista ma hun achet pa etajet en - ngale erohkoba ne roandông komin Joban rãngrãng etadangen.

²⁰Joban chaanpa nãngnâng moatjunko, nãngma thaeki, ba thonghun eki nomemin bâmbâm jah moeka:

²¹Asâthem ngale Jisu Krista junma Joban mîn sanpoat roakweih ngale roantang roangjêng rãng adong chendanga! Amen.