Read Nocte Naga Ifisien 4 Bible Online

Ifisien 4 - Nocte Naga bible

Ifisien 4

¹Erohwah, Ngama nenâng rosep eka - Ngama Teso nâng soam atôdi Nga phâtek nâng khhekthien ehang: Joban ma nea chenroh sôngtôngrãng rooehèn a eroh songtongen.

²Roantangma num nene, noapnene, ngale hungmông rinmôngma tadôen. Wathema wathe nâng lietmîn letma nekhu hun achet mînpa khesokmîn en.

³Ju junma nekhu mêmo pumma roamkhhek ehèn rãngrãng, roantangma jutjut jaangjaang dangletma tongen.

⁴Phoangmin wanthe ngale Jumin wanthe dangeka rãngrãng, Joban ma nekhumin dâlem wantheko lolo jôba rooehèn.

⁵Teso min wanthe, putedâlem min wanthe, ngale baptijem min wanthe jôba;

⁶ngale Joban min wathe jôba, atea chentô mihnyan nyuchha rãngma Wa, ngale atea chentô rãngma Teso, erediko chentôpa ate junma moeka, ngale atea chentô nâng tongeka.

⁷Nãngkhu chentôma hînhô choheki, erepa Krista ma them athak lahma hennâng chenroh kohhun eka eroh koheka.

⁸Joban nyapraangma ngaeka, “Chenthu atea achoangthôan wah theko wãngtahko, atema ate demko khhekritte heh johsietwên wah; ngale atema mihnyan nyuchha hehnâng hînhô koheka.”

⁹“Atea achoangthôan wah theko wãngtah” ngama ngaeka pa chenni nâng ngaeka? Ere ngaeka pa atea khebengko hahkenlu thôannâng bengkaera.

¹⁰Erohwah hahkenlu thôanko henpa katha ere pejôba choangthôan theko wãngeka, ngale rangkhen phangtang nâng ate jientôngrãng rangkho liennâng wãngeka.

¹¹Ngale “mihnyan nyuchha hehnâng hînhô pa atema koheka”; atema wawathe pa moattat chhoante dangthuk eka, wawathe pa mõng dangthuk eka, wawathe pa Ivangilist dangthuk eka, ngale wawathe pa Pastor erediko ahethôte rãng dangthuk eka.

¹²Atema are moeka pa Joban nâng putedâlemte mihnyan chentô hehma Kristan moatlem molahma Krista phoangpa rôngsietrãng mothuk eka.

¹³Ngale nãngkhu phangtang putedâlem nâng wanthe tuta danglihma Joban Chhapa roamjet e; Nãngkhu hungchit phannang rãngrãng danglihma, chenroh Krista hung asâ dangeka ererãngrãng nãngmin hungsâ dange.

¹⁴Ere diphumma ba nãngmin letachha heh rãngrãng ledangtu edange, ngale jowaak ma phophe katwah rãngrãng, erediko pông ma phoangmet phewah rãngrãng nãngmin mihphôang diapchhahte mihnyan hehnâng lephoang diapchhahrii edange, ere mihnyan hehma thinhungnâng buthi chhih heh keplahma mihnyan han heh lemke nâng senchhoan eka.

¹⁵Erenoma, hun achetmîn nungma toangtang thôlihma, rongrup ngema nãngmin Krista rãngrãng dange, Krista pa nãngrãngma nãng khophang rãngrãng.

¹⁶Ate khenko nãngphoang kowah chentô jat pa roapeka, ngale chentô rokchi rãchî chohmîn eka junko nãngphoang phangtang roapsiet eka. Erohwah chenthu nãngphoang wah hehma mâmâ moatlempa memoako, nãng phoangpa phangtang edonga, ngale erepa hun achetmîn junma edonga.

¹⁷Erohwah Ngama Teso mînko nekhu nâng rîn akhah eka: Joban nâng lepute dâlemte mihnyan heh rãngrãng nekdangen, thinma ledangli heh thonghun eka

¹⁸thinhung pemin rangnyek khennâng. Joban ma koheka roandôngko thin johroam mah, chenrãngma ngako thin a aba ngale hungcheh rincheh.

¹⁹Thinnâng rêsê ahotu; ngale thindede hei angem rinmeli chentô kaamchhih pa ajek lehôan moeka.

²⁰Rohkomin ereheh nema Krista ngewah hewah dangmet!

²¹Linlin nema ate ngin chohtattet, ngale ate dijunte dângjunko nenâng Jisu ngewah toangtang nginpa hethô tah.

²²Erohwah ne amako chenroh dangtet a ererãngrãng nekdangtu en, amako nang chenroh sôngtông hun eko eroh songtong lohma dângwah - amakowah apãpa hungngek rinngek pumma lâchhihsiet tah.

²³Nehung nerin heh phangtang anyan ngaklit en,

²⁴Ngale nea roandông nyan dangen, Joban rãngrãng toangtang, chenni nângmin achhih aho, erediko Asâthôan roandông hôantah pa nema kepen.

²⁵Erediko mothô nekthôtu en! Nekhu chentôma putedâlemte mihnyan ahan hehnâng toangtang thôkoh en, chenrãngma ngako, nãngkhu phangtang Krista phoangko tuta roap eki.

²⁶Nerin mekhah enkomin, rinkhah pumma pap nekchen dangthuk hèn, ngale ngihjang rinkhah letma nektongen.

²⁷Juchhih nâng ne chhihsietrãng sanpoat nekkoh en.

²⁸Nema ahuh chîrewah medang enko, ahuh nekretu en, moaka letma toangtangko biphhekchhah letma toangtangma songtongen, ngale tangchhih hehnângmin chohsû en.

²⁹Jabkhabchhih heh nekjaben, mihrãngma senli jabkhab heh lolo jaben. Ne jabkhab junma mihrãngma asenli chendanga, erohkoba nema jabeken jabkhab pa henma tateka ereheh rãngma asen edanga.

³⁰Ngale Joban Asâthôanju hung nekke thuk en; chenrãngma ngako Joban Jupa ne Tângte ngama jetrãng nenâng koh ehèn, ngale sanpoat pa methang tahko Joban ma nekhu pêsietmin ngama khesokrãng ere Jupa koh ehèn.

³¹Jatrup chhih akhah hehwah, hei angem junma chhihmoat hehwah, ngale rinkhah hehwah ajekre en. Ngale phoangrak akak, phoang dûmmek, mihnâng phoang mitchek, ngale jatrup achhih hehwah ajekre en.

³²Erenoma, Krista junma Joban ma nenâng map kohthen rãngrãng wathema wathe nâng mînchenmîn, hunmîn, ngale map kohmîn en.