Read Nocte Naga Ifisien 6 Bible Online

Ifisien 6 - Nocte Naga bible

Ifisien 6

¹Chha heh ne nyong ne wa nginkepkep dângpa ne Kristan heh moatlem , chenrãngma ngako, aroh moatpa moatlem pun.

²“Ne nyong ne wa heh nginkepkep dangen” chenrãngma ngako, arepa Joban ma toamsem lahma khebeng thôan hôkum koh ehèn:

³“eroh medang enkoba nedemnâng chentôpa asen tuta edanga, ngale nemin are hahtokkhoh ko roandônglo ehin en.”

⁴Nyong awa heh nememin nechhu nechha heh rin nekkhah thuk en. Erenoma, Kristan niemarang junko rîn akhah nungma hethô letma khêmwak en.

⁵Haaheh ne tângtewa ran tiichei letma ate nginkepkep dangen; ngale erepa nema Krista nâng soamtô eki ngama thonghun letma hungsâ rinsâma mo en.

⁶Erepa thinma chensen chohhi ngama thonghun letma, thinma nenâng sokpoatko lolo nekmo en; phumma, Krista haa rãngrãng dangletma nehung nerin phangtang kohletma Joban ma chenroh huneka eroh mo en.

⁷Mihnyan nyuchha nâng khoakhem dangmih, Teso nângba khoakhem eki ngama thonghun letma, ne moatlempa haa rãngrãng dangletma khuhah nâhah mo en.

⁸Thonghun en, haa medang ekomin, ba haa ledang kikomin, nãngma moatlemsen moatthã Teso ma chentô nâng ekohhi.

⁹Tângtewa hehmemin ne haa hehnâng erohjô khoakhem en ngale thin nekchêmsiet en. Thonghun en, nemin ngale ne haa hehmin rangkhethung nâng Tângtewa wathe khennâng tuta, ngale ere Tângtewa pumma chentô nâng khoaktheko thieneka.

¹⁰Athôanko, Teso demnâng roamletma ate ngewah achaanthôan chaan junma ne chaan hehmin dongsiet en.

¹¹Joban ma koh ehèn ranloat chhahkhem heh phangtang nesekko kepen, eroh kepletma medang enkoba juchhihma buthi chhih themawa eka heh lelatnâng etachepen.

¹²Chenrãngma ngako nãnga mihnyan nyuchha demnâng loatmîn dangmih, rohkomin, are rangnyek hahtokkhoh kowah pênte, thôte jabte, hang achaan heh, erediko rangkhethung wah juchhih heh demnâng loatmîn eki.

¹³Erohwah athângheh Joban ngewah ranloatmîn chhahkhem heh phangtang nesekko kepen! Eroh medang enkoba chenthu rangwo chhih mehû theko, ngale ran hehma lônghok poatko nema eta loatmîn en; ngale athôan kotuk loatmîn dikomin nea rongtêngtêng eta dangen.

¹⁴Erohwah chep achã letma tongen, toangtang pa ne roamko roamdit rãngrãng dit en, ngale ne thenkhuhko jankha rãngrãng khiapen,

¹⁵Ngale nema dapheng pheng eken rãngrãng mêmo Nginkongsen heh phengen.

¹⁶Sanpoat roakweih putedâlem pa lakkha rãngrãng kepen; chenrãngma ngako, erepumma ba juchhih hehma nenâng wendô rãngrãng latchhãn ma hap ehènpa tâtâng watphemin.

¹⁷Ngale Khope pa jankhophok rãngrãng phok en, ngale Juma koh ehèn Joban Jabkhab pa deng rãngrãng kepen.

¹⁸Are chentôpa rangsoam nungma mo en, ngale Joban wah chohsokrãng tha en. Juma chenroh chien ehèn a eroh sanpoat roakweih rangsoam en. Erejunko jetlet mejû dangen ngale rangsoam letmejû tongen; roantangma chentô Joban nâng putedâlemte mihnyan hehrãng rangsoam koh en.

¹⁹Ngama nginthôrãng chepko Joban ma Nganâng chenchoh thôkat kohhang ma ngarãngmin rangsoam kohha, erohkoba Ngama lechei thangma nginkongsen kowah patritli nginpa eta jetthukwak ang.

²⁰Athângheh Nga phâtek khennângjô medang angkomin, Nga a nginkongsen phoangthô chhoan moatlem moatte. Erohwah Ngama nginkongsen pa lechei thangma chenta thôchhoan ang ngama rangsoam kohha.

²¹Nãngma nyahrãng huneki nãngnaa ngale Teso moatlem nâng nyahrãng hungkoh lahma haa rãngrãng danglahma moatte Tikikas ma ngangin heh phangtang nenâng ethôkoh hèn, erohkoba ngama chenni moaka ekanga ereheh nema ejet en.

²²Erohwah Ngama netânâng ate chienkat erâng-nikhuma chenni moekia ereheh atema nenâng thôko lahma nekhu hung chendongsiet hen ngama chienkat erâng.

²³Nãng Wa Joban ngale Teso Jisu Krista ma chentô Kristan hehnâng mêmo, hun achetmîn, ngale putedâlem chaan chenkohhèn.

²⁴Joban wah mînchenchaan pa henhenma nãng Teso Jisu Krista nâng leta mahli hunma huneka ereheh nâng chentonga.