Read Nocte Naga Filipien 1 Bible Online

Filipien 1 - Nocte Naga bible

Filipien 1

¹Pol ngale Timothi Jisu Krista haa ngewah — Filipien wah Jisu Krista demnâng roamlahma chentô Joban nâng putedâlemte mihnyan heh, ngale Asâthem heh khhepho phannang erediko Asâthem hehnâng chohsokte hehnâng raangeka:

²Nãng Wa Joban ngale nãng Teso Jisu Krista ma nenâng mînchenchaan ngale mêmo chenkohhèn.

³Ngama nekhu thônghun roakweih Nga Joban nâng dangkoh a rângnga ang;

⁴ngale Ngama nekhurãng rangsoam koh roakweih, khuhah nâhah danglekma soamkoh eka

⁵chenrãngma ngako, nekhuma khebeng rangwo jâma chohsutha wah athâng hehmin ngama nginkongsen pa phoangthô kohko nema chohsû eha.

⁶Ngale Joban ma are moatlemsen nekhu demnâng bengmo ekapa Jisu Krista ngakkatjâ rangwo tôkotuk emothuk hèn ngama putedâlem ekang.

⁷Ngama roantangma nekhu ngahung nâng thônghunjû! ngale Ngama nekhu aroh thonghun ekapa thônghunli lemnâng jôba thonghun eka. Chenrãngma ngako nga athângheh phâtek khennâng tôngpoat komin, ngale nginkongsen pa rôngsietrãng phoangthô poat komin Joban ma nganâng kohthang mînchenchaan ko nekhu johroam eha.

⁸Ngarãng hâkhi Joban tonga, ngale Ngama toangtang thôekang, Ngama nekhu khe nyahrãng huneka, ngale Jisu Krista ma hun rãngrãng jôba Ngama nekhu nâng huneka.

⁹Nga rangsoam pa nekhu hun achet mînpa ajahjah chendangen, ngale ere hunmîn nginpa linlin jetletma rongtêngtêng chenhunmîn en ngama soam ekang.

¹⁰Erohkoba nekhuma chenpa asen a erepa ejienren en. Eroh koba chentô angek atek hehwah sâletma Krista ngakkat jâko chhih ngatthin aho edangen.

¹¹Ngale nekhu roandôngko Jisu Krista ngewah asenli moatlem heh echoh en, ngale nema eroh moletma Joban mînpa sensiet letma edongthuk en.

¹²Ngalemruchha heh, Ngama nekhu nâng jetthuk huneka, nganâng chenni dangthanga erepumma linlinjô nginkongsen pa jahsiet eka.

¹³Ere junkowah, humbemte sipâhi heh phangtang ngale ahan hehmemin chentôma Nga a Krista haa dângjunko phâtek nâng khhekthien ehang ngama lâjettah.

¹⁴Ngale Nga phâtek nâng tongekang junko ajâhthem putedâlemte mihnyan hehma Teso nâng senthemthem lâputedâlem waktah, ererohwah sanpoat roakweih thinhung dongsiet lahma Joban nginkongpa lechei thangma phoangthô wakeka.

¹⁵Khaka hehma thin a mihphet mihwan danglahma Krista nginkongpa phoangthô tadangthem a, rohkomin khaka hehma linlin hungsen rinsen ma phoangthô eka.

¹⁶Ere mihnyan hehma thinma hunlahma phoangthô eka, chenrãngma ngako, Joban ma Nganâng nginkongsen pepâng moatlem mothuk ehang ngama thinma ajet.

¹⁷Khaka hehma Krista nginkongsen ko senthemthem hungkoh lahma phoangthô dangmah, thinmînsên pa lolo thonghun lahma phoangthô eka; thinma Nga phâtek nâng tôngpoatko ajah chêmthuk e ngama thonghun eka.

¹⁸Eroh akomin chenjô dangmah! Ere rãngmemin Nga khuhah ekang - achhih ngema dangkolah asen ngema dangkolah rongrup ngema Krista nginpa phoangthô peba hun ekang. Ngale Nga roantangma khuhah nâhahjû edangang,

¹⁹chenrãngma ngako, Ngama jet ekang, nekhu rangsoam junma, erediko Jisu Krista Juma chohsok junko Nga eta pechhoan ang.

²⁰Ngama hungkhen wah thonghun lekma putedâlem ekang, ngama chenthumin Krista nginpa lephoangthô ledangmin, sanpoat roakweih, ngale ajahthem pejô athângheh sanpoatko, Nga chenni ranjô lechei edangang, erohkoba Nga ahînma medang angkomin ba ritjô mere angkomin Nga roandông dôngtangko Krista mîn edongsiet ang.

²¹Roandông pa chennia? Ngarãngma dangeka, ahîn medang angko Krista rãng hinekang, ngale rit mere angkomin erenoma ajah asen.

²²Rohkomin ahîn medang angko Ngama Krista rãng ajah kaamsen etamo ang, phumma ngama are wannii kowah chenpa ren anga erepa jetmek.

²³Nga ronghu rongkama tesiet ehang. Ngama are roandôngpa phethien lekma Krista demnâng johtong wângpa nyahrãng hun ekang, ere pejôba ajahthem asenthôan;

²⁴rohkomin nekhu rãngma Nga ahînma tôngpa nyahrãng alemthôan dangeka.

²⁵Ngama ajet nekhuma nga nyahrãng lemeha, ngale Ngama ajet nga ahînma elektong ang. Ngama nekhu putedâlem pa dongsiet lahma khuhah nâhah dângthukrãng nekhu chentô demnâng ejohtonga,

²⁶erohwah chenthu Nga netânâng mengak hûthangko, Nga junma nekhu Jisu Krista demnâng nyahrãng khuhah nâhah edangen.

²⁷Ngale ade dangeka, chentô noma alemli thôan pa, nekhu roandôngpa Krista nginkongsen ma chenroh huneka ererãngrãng dangen, erohkoba Nga nekhu tânâng lehûrâng komin, ba mehûrâng komin, ngama nekhu hung jutletma mãntheko rongtêngtêng putedâlem eken, erediko aroamma nginkongsen rãngma roamlatrii eken ngama etat ang.

²⁸Neran hehran nekchei en; roantangma hungdong rindong dangen, erohkoba thin a nenâng jienrii lahma ekhe e, chenrãngma ngako, nenâng Joban ma jienthuk ehèn.

²⁹Chenrãngma ngako, nekhu nâng Krista nâng soamtô thuk ehènpa, Krista nâng putedâlem lolo dangmah, ate rãngma chêmchei min chohmin.

³⁰Athângheh nekhumin Nga demnâng ran tajohchep ha. Arepa khemako nema Nga ranloatmîn lekma khetha rãngrãng jôba, ngale athâng hehmin Nga ranloatmîn ekangpa nema tat eken.