Read Nocte Naga Filipien 2 Bible Online

Filipien 2 - Nocte Naga bible

Filipien 2

¹Ne roandôngpa Krista demnâng dângjunko nekhu rong eken, ngale atema hun achet pumma nekhu asen dangeken. Nekhua Joban Ju demnâng roam eken, ngale nekhu wathema wathe nâng mînchen hunmîn eken.

²Erohwah Ngama nekhu nâng rosep eka, nekhuma mãnthethin ko tuta thonghun en, ngale mãnthe dangletma hunmîn, ngale hungthe rinthe tuta dangletma Ngakhu hahthuk ha.

³Chenni min mâmâ dede mînsênrãng ngama thonghun letma nekmo en, wathema wathe demnâng numnene dangen, ngale roantangma nedede noma mihhan ba asen ngama thonghun en.

⁴Ngale nedede rãng lolo ledang, wathema watherãng sekmah mînkoh en.

⁵Ngale ne jat apat pa Jisu Krista jat apat rãngrãng dangen:

⁶Atea roantangma Joban rãngrãng dângwah, rohkomin atema metkep Joban demnâng tôde jôba dângmin ngama thonghunho.

⁷Erenoma, atedede hungsima ate ngewah chentôpa kohwah, ngale atea haa rãngrãng dângwah. Atea mihnyan nyuchha rãngrãng dângwah ngale mihnyan khoakhoak dângwah.

⁸Atea numnene danglahma rit kotuk nginkepkep ritwah-atea bãngphak khoko rittekwah.

⁹Erohwah Joban ma ngakhinsiet lahma rangkho choangthôanko tongwãng thukka, ngale atenâng mînhân heh noma mîndongthôan koheka.

¹⁰Ngale erohwah Jisu mînko rangkhethung wah chentôma, ngale hahtokkhoh wahmin chentôma, erediko hahkhen wah chentôma thin dakuh tholahma soamtômin,

¹¹ngale chentôma Jisu Krista pa Teso ngama eloatjab a, eko Joban Wa mînpa dongsiet erewak a.

¹²Lemruchha heh, erohwah, Nga nekhu demnâng dângpoatko roantangma nema Nga nginkepkep dangeken rãngrãng, Nga nekhu demwah ataangnâng dângpoat komin nema Nga nginkepkep dângpa alemli thôan. Ne khope moatlempa Joban ran tiichei letma mo en,

¹³chenrãngma ngako, nekhennâng Joban ma roantangma mo ehèn, ngale ate nginkepkep dangletma ate rinmeli moatlem chenmo en ngama Joban ma chohsû ehèn.

¹⁴Chentô moatlem pa lesileni ngale lechhiakmîn ma mo en,

¹⁵eroh medang enkoba nea Joban chhuchha rãngrãng chenni achhihjô aho sâpoangpoang edangen, chenrãngma ngako nea hahtokkhoh chhih kowah papi mihnyan heh demnâng songtong eken. Rangkhopa merit ma chhumphiak rãngrãng thinkhu chhangko nema phiak en,

¹⁶nema thinnâng roandông khope choh nginkongpa chohkoh eken. Nema eroh memo enko, nejunma Krista ngakkatjâ rangwo ko Nga eta rângthôrii ang, chenrãngma ngako, erepumma Ngama latrii lekma motek heh mahto nâng dangmah ngama ekhesok a.

¹⁷Ne putedâlem junko ne roandôngpa Joban nâng koh eken demko, Nga roandông hei pemin joapsoap rãng rangtêmmin kohwah rãngrãng nedemnâng ejoh danga. Eroh medang ako, Nga rin eroan ang ngale erepa nekhu anga nga demnâng ejohroan a.

¹⁸Ererãngrãngjô, nekhumin rinroan en, ngale Nga demnâng johroanha.

¹⁹Arepa Teso hungsi medang ako, Ngama netânâng Timothi sitsiak eta chiekkatrâng ngama thonghun ekang, erohkoba nekhu nginkong heh chohtat lekma Ngahung edongang.

²⁰Ngama hun ekang rãngrãng thonghun lahma nerãng sekmah patritte Timothi rãngrãng ahan henjô aho.

²¹Ahan hehma mâmâ dede rãng sekmah patrii eka, Jisu Krista moatlem rãngma henjô sekmahmah.

²²Rohkomin Timothi pa chen rãngrãng mihnyan a erepa nededema senthemthem jet en, ngale nginkongsen phoangthôko Timothi chenii wa achha rãngrãng danglihma aroam roamma moeki.

²³Nga khohnâng chenni hokmin a erepa Ngama mejet tekko sitsiak netânâng ate echienkatrâng.

²⁴Ngale Ngama Teso nâng putedâlem ekang, Ngadede min netânâng sitsiak ekarâng ngama.

²⁵Nãngnaa Ipafoditus pa netânâng ngakchienkat pa alemli ngama thonghun ekang, atea Nga demnâng johmoatte dângwah, ngale Nga demko sipâhi rãngrãng danglahma johmoatwah. Nema atea Nganâng chohsok rãngma chienwênwah.

²⁶Atema nekhu anga nga khe nyahrãng hun ehèn, ngale nekhuma atea akhun ngama tatphumma atea nyahrãng hungchhih eka.

²⁷Linlinjô atea akhun rewah, ngale riinemwah peka. Rohkomin Joban ma atenâng nyahrãng mînchen eka, ngale atenâng lolo ledang Nganângmin mînchen ehang, ngale nyahrãng hungchhih thin adong kowah pesiet ehang.

²⁸Erohwah Ngama ate netânâng chienkat pa nyahrãng hun ekang, erohkoba nema ate chohkhe letma khuhah nâhah engak dangen, ngale Ngadede hungchhih hehmin ejek a.

²⁹Erohwah, Teso nâng putedâlemte rãngrãng ate khuhah nâhah tãngroo en. Ngale ate rãngrãng mihnyan heh chentô nâng eroh hun achhâ en,

³⁰chenrãngma ngako, Krista moatlem rãngma ate roandông kohlahma moatwah, ngale riinem wahmin lâpetah. Erepa nekhuma Nganâng leta chohsuli pa atema chohsû thang.