Read Nocte Naga Filipien 3 Bible Online

Filipien 3 - Nocte Naga bible

Filipien 3

¹Ngalemruchha heh, athôanko, Teso demnâng roamletma khuhah nâhah dangen. Ngama khemako nenâng raangtah ngin heh ademin nekhu nâng wîenthe depraangrãng nga jõriimek, chenrãngma ngako Ngama eroh methe depraang ako erepa nekhu rãngma asen edanga.

²Kaamchhih moatte mihnyan hehwah jetletma tongen, thin a hu rãngrãng, thinma phoangnâng khen niem pa hôanmin jôba ngama ngawak eka.

³Linlin khoankhen niem hôante pa thin dangmah, nimaba hôaneki, chenrãngma ngako, nima Joban nâng ate Ju junma soamtô eki, ngale Jisu Krista demnâng roamlihma niroandôngko khuhah nâhah danglihma tongeki. Nima rangkhoh khoannâng khenlihma niemhôan ko putedâlem mih.

⁴Ererãngrãng ko Ngama ba tâputedâlem min dangwah. Phumma nekhuwah henma akomin ererãngrãng rangkhoh khoankhen niemhôan nâng meputedâlem enko, Ngama jãtanga nenoma ajah tâputedâlem thin tonga.

⁵Nga jâeset jâko khoankhen niem pa hôanwah. Ngale Nga achhat mejû Isrial mihnyan, Benjamin jatwah chhatwah, ngale Hibru hei linlin wah chhatwah. Jews heh Niemarang jun komin Nga Farasi,

⁶ngale Ngama asâthem hehnâng nyahrãng nyoak chêmthuk wah. Niemarang kep junma mihnyan pa Joban demnâng toangtang jiendângli dângnomeko, Nganâng chenjô achhih aho dângwah.

⁷Rohkomin areheh poattheko Ngarãng nyahrãng alemli thôan ngama thonghuntek heh, ade phumma Ngama Krista mînko achhih ngama phe ekang.

⁸Ereheh lolo ledang; chentô noma adongthôan Nga Teso Jisu Krista jetrãngma chentôpa achhih ngama phe ekang. Erediko ate junma Ngama chentôpa phe ekang; ngale Ngama Krista tâchohrãng chentôpa setru kaja tôko thonghun ekang

⁹ngale ate demnâng senthemthem johroam ekang. Ngale Ngama Niemarang kep junko Nga toangtang dangmek. Ngama athângheh Jisu Krista nâng putedâlem junko toangtang dangekang, erepa Joban ma putedâlem junko koheka.

¹⁰Ngama Jisu Krista ngale ate ritwah ngakhinwâng chaanpa loloba chohjet hun ekang, erediko ate chêmtah rãngrãng chêm lekma ate rãngrãng rithun ekang,

¹¹eroh medang angkoba Ngamin ritwah engakhin ang ngama dâlem ekang.

¹²Ngama thonghun ekang theko lâhû wãngtek, ba Joban ma huneka rãngrãng lâdangtek ngama thonghunmek. Rohkomin eretheko hokwângrãng latrii ekang, chenrãngma ngako, Nga Krista ma aterãng lâkepthang.

¹³Ngalemruchha heh, linlinko ngama lâchohtek ngama thonghunmek; rohkomin Ngama wanthe moatlem moekangpa, Nga tokdi kowah heh lekphe lekma, Ngama wah heh leploat rãngba thonghun ekang.

¹⁴Erohwah Ngama thonghun ekang thepa chohrãng tintin chhoanwãng ekang, erepa Jisu Krista junma Joban ma rangkho wah roandông chohrãng rooehang.

¹⁵Nãngkhu anga nga Junâng hungchit phannang rãngrãng dângte hehma aroh mãntheko tuta mamthông hunmin. Rohkomin nekhuwah henma akomin mâmâ methong hun enko, erepa Joban ma epunsiet hèn.

¹⁶Erepa chenrohjô medang akomin, nãngkhu anga nga athuwah rãngrãng mãnthe tuta mamdang lihma amanâng wãnge.

¹⁷Ngalemruchha heh, Ngangin heletma Nga rãngrãng tuta dangen. Nima nenâng khesoktah rãngrãng songtongte mihnyan heh rãngrãng dangen.

¹⁸Ngama are nginpa nenâng amakomin ajahthem thôkotah, ngale athâng hehmin Ngama mitphi jâlekma thengak thôkoh eka: Chenrãngma ngako, melâng mihnyan hehma thin roandôngko Jisu Krista bãngphak khoko ritpa thinran rãngrãng hôan eka.

¹⁹Thin a chenthumin lemutte pap wendô nâng ekhamrii kawak a, chenrãngma ngako, thinrãngma joban pejô thin hei angem ma hun ekapa kepeka. Thinrãngma chenre pa rêsêlia erepa rângthôeka, ngale are hahtokkhoh wah sêmmak heh rãnglolo thonghun lahma tongwak eka.

²⁰Rohkomin nãngkhua rangkhethung nâng tôngte mihnyan, ngale nãngma nãng Teso ngale nãng Pângte Jisu Krista rangkhethung wah katpa nyahrãng bemlaeki.

²¹Atema nãng mihnyan hei angem phoangpa atedede phoang rãngrãng elitsiet a, ngale ere chaanpa keplahma atema chentôpa epên a.