Read Nocte Naga Filipien 4 Bible Online

Filipien 4 - Nocte Naga bible

Filipien 4

¹Ngalemruchha heh, erohwah, Ngama nenâng chentô huneka, ngale Ngama nekhu chentô khehun eka! Nekhuma Nga nyahrãng khuhah thuk eha, ngale nekhu junma Nga nyahrãng thhensân ekang! Ngama nyahrãng hun lemruchha heh, arohjô ne roandôngko Teso demnâng roamletma rongtêngtêng mamdangen.

²Iuodia ngale Sentiki, Ngama nechhe nâng Teso mînko nya anaa rãngrãng thonghunmîn letma mamsenmîn en ngama rosep eka.

³Ngale Nga demnâng toangtangma roammoatte, nangnâng min are dihiaknyu hehnâng mamchohsûo ngama rosep eki; chenrãngma ngako, thinmemin Ngademko nginkongsen pa johphoangthô thang, thin demko Klement min dângwah, ngale Ngademko roammoatte ahan hehmin dangwah, thinmîn hehmin ahîn titabko raanglahma tonga.

⁴Teso demnâng aroamma dangletma roantangma khuhah nâhahjû dangen. Ngama erepa ademin thethôkoh eka: khuhah nâhah dangen!

⁵Anga nganâng numnene dangletma khesok en. Teso sitsiak lângakka era.

⁶Chenni rãngmejô neksekmah en, nema chenni lemeken a erepa Joban wah rangsoam letma tha en, roantangma atenâng nehung khenwah dangkoh a ngaletma tha en.

⁷Ngale mihnyan nyuchha ma lelep thonghunli Joban wah mêmo pumma nehung nerin ngale ne kheri heh Jisu Krista demnâng asen ethienhèn.

⁸Ngalemruchha heh, athôanko, nehung nerin ko asenli ngale arôli heh thien en: ereheh dangeka, toangtang, asâli, apunli, ahunli, ngale kep aloatli heh.

⁹Nema Nga jabkhab ngale Nga moatlem kowah chenni chohhetha ererãngrãng mo en. Ngale erohkoba nãngnâng mêmo kohte Joban pa nekhu demnâng etonghèn.

¹⁰Ajahthem rangwo diko nema Nganâng thonghun letma ademin rekthe Ngarãng sekmah patrii letma khesokdi nga roandôngko Teso demnâng roam lekma nyahrãng khuhah nâhah dangekang. Arepa nema Nganâng chohsokpa jek eken ngat dangmek - nema Nganâng chohsokrãng sanpoat jôba lechoh dângwah.

¹¹Ngale nema nganâng lechohsû thangma thien junko ngat dangmek, chenrãngma ngako, Ngama chenni chei ekanga ere demko chenroh rinmêmê jientôngmin a erepa Ngama lâhetek.

¹²Chenthu Nganâng chenjô aho dângpoatko chenroh tôngmin a, ngale Nganâng ajah dângpoatko chenroh tôngmin a erepemin Ngama lâhetek. Ngama arepa jet junko chenriang nângmin, ba chenre sanpoat komin, Nga rêmrit komin, ba wokphoat komin, ba Nganâng ajah metong hangkomin ngale amãnchhajô metong hangkomin, Nga rinmeme ejien tongang.

¹³Jisu Krista ma Nganâng chaankoh junko chentô sanpoat roakweih Ngama asenli tamo ang.

¹⁴Rohkomin Ngama chêmchoh poatko nema Nganâng chohsû thepa asen dangeka.

¹⁵Filipien diakwah mihnyan heh nekhuma senthemthem jet en, amanâng Ngama Nginkongsen phoangthôkoh rãng Mesidonia diakwah loatchhoantek diko nekhu lolo jôba Nganâng chohsokte asâthem dângwah; ngale nekhuma lolo jôba Nganâng chohsokdi rangkep eken.

¹⁶Chenthu Nga Thisalonika nâng dângpoatko Ngama chenni lemekanga ereheh nekhuma depdep matkat letma chohsûtha.

¹⁷Erepa Ngama nekhuwah hînhô chohhun junko dangmek; rohkomin nekhuma koh amien junko rang chenkep en ngama huneka.

¹⁸Nema Nganâng rongrup kohtha heh Ngama phangtang lâchohtek - ngale Ngama lemekang nomemin ajah choh ekang! Ne ngewah hînhô heh Ipafoditus ma Nganâng katkohthang, erohwah Ngama chentô lemtek a ere chentôpa lâchohtek. Newah hînhô heh Joban nâng tummêngmêng soam aroakwah rãngrãng. Ererãngrãng soam aroakpa Joban ma kepeka ngale ererãngrãng heh demnâng Joban rinme eka.

¹⁹Ngale Jisu Krista junma atea techhu danglahma Nga Joban ma nekhu nâng nema chentô lemeken a ereheh phangtang ekohhèn.

²⁰Nãng Joban ngale nãng Wa mînpa roantang roangjêng rãng adong chendanga! Amen

²¹Krista mînko Joban nâng putedâlemte mihnyan anga nganâng salem koheka. Nga damwah putedâlemte mihnyan hehmemin thin salem nenâng matkat ehèn.

²²Joban nâng putedâlemte mihnyan anângwah chentôma salem matkat ehèn, ajahthem pejô Chofa hum kowah tôngte hehma matkat ehèn.

²³Teso Jisu Krista mînchenchaan nekhu chentô demnâng chentonghèn.