Read Nocte Naga Kolosien 1 Bible Online

Kolosien 1 - Nocte Naga bible

Kolosien 1

¹Joban hungsi junko Jisu Krista moattat chhoante Pol, ngale nãngnaa Timothi ngewah-

²Kolosien hahwah Joban nâng putedâlemte mihnyan, ngale Krista mînko toangtang lemruchha hehnâng raangeka: Nãng Wa Joban ma nekhu nâng ate mînchenchaan ngale mêmo chenkohhèn.

³Chenthu nima atenâng rangsoamko, roantangma nãng Teso Jisu Krista Wa Joban nâng dangkoh a rângngae.

⁴Chenrãngma ngako, nema Teso Jisu Krista nâng putedâlem eken le, nema chentô Joban nâng putedâlemte mihnyan hehnâng hun achhâ eken heh nima chohtattih.

⁵Chenthu toangtang nginkong, Nginkongsen pa netânâng khebengrãng benghûtha poatko, ere Nginkongsen pumma koheka dâlem nginpa nema chohtattet. Erohwah, nema erengin khohko dâlem eken, ngale hun achhâmîn eken, erepa nekhurãng rangkhethung nâng senthemthem thienkoh ehèn.

⁶Nginkongsen junko hahtokkhoh ma rangkep eka, ngale phangtangma khêmtat eka, ererãngrãng nekhu demnâng min dangeka, nema Joban mînchenchaan nginpa khebengrãng bengchohtattet jâma erepa linlin ngama jet eken.

⁷Nema Joban mînchenchaan pa nãngma nyahrãng ahun nãng lemru Krista haa, ngale nãngrãngma nyahrãng hungkoh lahma Krista moatlem moatte Ipafras ngewah chohhe eken.

⁸Joban Juma nenâng hun ehèn nginpa atema ninâng thôkohthi.

⁹Erohwah chenthu nima ne ngin chohtat tihwah roantangma rangsoam koheka. Ngale Joban ma ate hungkhen wah huneka heh nenâng chenjet thukhèn ngama rosep eki, erediko ate Juma nenâng chentô buthi mongthem heh chenkohhèn.

¹⁰Erediko ba Teso ma chenroh huneka eroh eta songtongen, ngale ate rinmeli etamo en. Ngale ne roandôngko rongrup moatlemsen heh etamo en, ngale nema Joban jetletma ejien songtongen.

¹¹Ate ngewah chaan pumma nemin chenchaan thukhèn, erohkoba nema rongruppa hungmông rinmông dangletma etadô en. Ngale khuhah nâhah dangletma dangkoh a ngama Wa Joban nâng ngatmin, Joban ma atenâng putedâlemte mihnyan hehrãngma ate wenphiak Hahsông theko thienkoh eka heh nenângmin tachohthuk ehèn.

¹³Atema rangnyek chaan kowah pepâng lahma atema nyahrãng ahun ate Chha Hahsông theko senthemthem sietwên ehi,

¹⁴ngale atema nãngkhu pesiet ehi, ngale ate junma nãngpap heh map choheki.

¹⁵Krista pa mitma lekhe Joban phoangrãngrãng. Ngale atea Joban khhepho Chha, chentô tem atiek tahheh wah atea adongthôan.

¹⁶Chenrãngma ngako ate junma Joban ma rangkhethung ngale hahtokkhoh wah chentôpa têm atiek wah, mitma lekheli ngale mitma kheli, erediko ju ngenâng chaan kepte, teso, pênte, ngale thôte jabte hehmin atema têm atiek wah. Joban ma hahtokkhoh phangtang ate junma ngale aterãng têm atiak wah.

¹⁷Krista pa chentô noma amama dângwah, ngale ate demnâng roamlahma jôba chentôpa mâmâ thethe chohwak eka.

¹⁸Atea Asâthem hehrãngma atedede phoang kowah khophang rãngrãng; phoangpa ate junma hin eka. Atea Joban khhepho Chha, ngale ritwah ngaksat eka, erohwah atelolo jôba chentô noma adongthôan.

¹⁹Chenrãngma ngako, Joban ma atedede hungsi ma ate Chha sekkhen nâng Joban chaanpa phangtang chentonga ngama hunwah.

²⁰Erohwah, Chha junma Joban ma hahtokkhoh phangtang ate tânâng ngaksiet hokrãng thonghun eka. Joban ma ate Chha hei junma nome thukeka ngale hahtokkhoh wah hehmin erediko rangkhethung wah hehmin chentôpa ate tânâng ngaksiet hûeka.

²¹Nema achhihli heh thonghun letma kaamchhih moatjunko sanpoat poatthe Joban demwah ataangnâng dângwah, ngale ate ran dangletma dângwah.

²²Rohkomin ade phumma, ate Chhama roandông kohlahma ritjunma, Joban ma nekhumin ate tânâng Sâpoangpoang, khinbaangbaang, ngale chenjô lethe thangma siethokrãng nea ate lemruchha rãng hôan ehèn.

²³Erohwah, nekhuma rongtêngtêng senthemthem putedâlem en. Ngale chenthu nema Nginkongsen chohtat letma dâlemtet a erekowah nekphõngtu en. Are Nginkongsen rãngma Nga Pol min haa rãngrãng dangekang - are Nginkongsen pa hahtokkhoh ko chentô nâng phoangthô koheka.

²⁴Ngale Nga nekhurãng chêmrit ko khuhah ekang, chenrãngma ngako Nga phoang nâng chêmrit junko Krista ma ate phoang Asâthem hehrãngma lelaang chêmrii bâthientah heh Ngama laangchêm ekang.

²⁵Ngale Joban ma Nga Asâthem heh haarãng dangthuk ehang, ngale atema are moatlempa nekhurãng chensen a ngama mothuk ehang. Are moatlempa ate nginkongsen pa lolo phoangthô moatlem.

²⁶Are patritli nginpa tewa rôanpa wah mihnyan hehnâng phangtang nâng lejetthuk thangma huhthienwah, rohkomin ade phumma erepa atenâng putedâlemte mihnyan hehnâng jetthuk eka.

²⁷Joban ma thonghun ekapa atenâng putedâlemte chentô mihnyan hehrãng atema thien kotah are nyahrãng patritli nginsen pa ate mihnyan hehnâng jetthukrãng huneka. Ngale ere nyahrãng patritli nginsen pa dangeka, ne sekkhen nâng Krista tongka ehèn, erohwah nekhumin Joban mîndôngko ejohroam en.

²⁸Erohwah nima Krista pa anga nganâng phoangthôkoh eki. Ngale nima chentô buthi mongthemsen heh keplihma chentô mihnyan hehnâng phoanghethô eki, erediko nima chentô mihnyan heh Krista demnâng aroamma Joban tânâng Junâng hungchit phannang rãngrãng siethokrãng moeki.

²⁹Are moatlempa tâmoatrãng, Krista ma chohkoh ehang achaanthôan chaanpa ngasek khenko moatjunko ngama ere chaanpa keplekma latrii moekang.