Read Nocte Naga Kolosien 2 Bible Online

Kolosien 2 - Nocte Naga bible

Kolosien 2

¹Ngama nekhurãng erediko Laodika wah mihnyan hehrãng ngale ahan Nganâng senthemthem lejette hehrãngma chentô chaanmo tek a ereheh nenâng thôkoh a.

²Ngama arepa thin hungdong rindong danglahma hun achetmîn chenrewak a ngama moekang, erohkoba thinma toangtangma jetlahma senthemthem eta putedâlem wak a. Eroh koba thinma Joban wah patritli nginpa eta jet a, ere patritli nginpa Krista ngin.

³Atea Joban hungkhen wah chentô buthi mongthem huhriem eka heh laangthin sâbi rãngrãng.

⁴Erohwah Ngama nenâng thôkoh eka, thinma chentôjô mesenthô akomin thinnâng nekmoksietrii en.

⁵Chenrãngma ngako, Nga nedemnâng phoangphoangma ahojô medang ang akomin, Nga Jupa ne demnângjû, ngale nekhu aroamma Krista nâng rongtêngtêng putedâlem letma khe phumma Nga rinroan ekang.

⁶Nekhuma Jisu Krista pa nekhu Teso ngama lâkeptet, eroh ate demnâng roamletma songtongen.

⁷Bãngrin luwakwak sut arãngrãng nema atenâng rongtêngtêng tok anaa letma tongen, ngale ne roandôngpa ate khohko hôan en, ngale nenâng hethôtah rãngrãng ne putedâlem nâng rongtêngtêng dangen. Ngale roantangma dangkoh a nga en.

⁸Erediko, jetletma dangen, ngale mihnyan nyuchha hung arinwah sekhota buthi mongthem heh junma henmemin haa rãngrãng nekchenkep ehèn, ereheh dangeka, mihnyan nyuchha ma hethô wah ngin, ngale are hahtokkhoh pênteju ngewah, ereheh Krista ngewah dangmah.

⁹Chenrãngma ngako, ate numnene dângjunko chentô Joban jat apat heh phangtang Krista sekkhenko tongka eka,

¹⁰ngale Krista demnâng aroamma dângjunko ne roandông komin chentôpa koh ehèn. Atea chentô Ju ngenâng pênte ngale thôajabte hehwah adongthôan.

¹¹Krista demnâng aroamma nemin khoankhen niem lâhôantet, erepa mihnyan nyuchha dekma hôaneka khoankhen niem pa dangmah, erepa Krista ma hôaneka khoankhen niem, erejunko sekkowah papmoat chaan wah pesiet ehèn.

¹²Chenrãngma ngako chenthu nema baptijem kepko, nea Krista demnâng johrit re eken, ngale baptijem kepko Krista ritwah ngaksatsiette Joban chaanko nema putedâlemdi nemin Krista demnâng johngaksat eken.

¹³Nemin sanpoat poattheko Junâng riiletma dângwah, chenrãngma ngako, erepa nepap ngale nea Joban Niemarang aho thangma Jews ledangte jat dângwah. Rohkomin, ade phumma Krista junma Joban ma roandông lâkephû kohthen. Joban ma nãngpap chentô heh map lâkohthi;

¹⁴ngale nãngma Joban ngin lekep thangma kaamchhih moatthã nãng lelatnâng chentô thãpê raangthien tahheh, erediko niemarang heh atema lâmahsiettah, ngale erepa atema bãngphak khoko sema lânamtektah.

¹⁵Ngale ere bãngphak khoko Krista ate dedema hahtokkhoh pênte ngale chaan ahang kepteju hehwah pesietrii eka; ngale atema jienlahma thin a hahtokkhoh phangtang nâng khhekritte rãngrãng hôan lahma khesok eka.

¹⁶Erohwah, nema jokphhek chhah eken junma, ba lihân pientông rangwo, ba Dânyan Lokuh Chhahwa erediko Pientông rangwo rãngma henmemin niemarang pa nekchen hôankoh ehèn.

¹⁷Are chentôpa khediko chenni dângwâng min a ere dâpha peba khesok eka; Krista ba alinlin pa.

¹⁸Athânkhe junko adong ngama thônghunritte, ngale ahôanma diapnumritte, erediko Joban ngintatte hehnâng soamtô rãng chiente hehnâng nekmokwânrii en. Chenrãngma ngako, ererãngrãng mihnyan heh thin hei angem hung arin junma thonghun lahma chhihsietrii eka

¹⁹ngale thinma Krista nâng putedâlem pa jek eka, Krista pa mihnyan phoang rãngma khophang rãngrãng, phumma thin phoangpa thin khophang ko lechoat thangma tongwak eka. Krista khenko jôba phoangpa asen ma tongeka, ngale chentô rokchî rãchî hehmin rongtêngtêng chohmîn eka, ngale Joban ma chenroh huneka eroh dongwãng eka.

²⁰Nea Krista demnâng lâjohriitet, ngale are hahtokkhoh pênteju hehwah lâpetet. Eroh medang enko, chenrãngma nea are hahtokkhoh mihnyan heh rãngrãng dangeken a? Nema arerãngrãng niemarang heh chenrãngma kep eken a

²¹“Areko neksem,” “Arepa nekphhek chhah,” “Areko neksahlo”?

²²Are chentô ngaeka pa rekthe mekep tihko chhihjâ thin sêmmak hehnâng ngaeka; ere niemarang heh mihnyan nyuchha ma hôanlahma hethôeka.

²³Are niemarang heh mihnyan nyuchha buthi mongthem junko hôanlahma Joban ngintatte hehnâng soamtô thukeka, ngale ahôanma numnene diapdâng wakeka, erediko thindede phoangko chêmsietrii rewak eka; rohkomin thinma phoangpa kaamchhih moatwah jeksiet wakmah.