Read Nocte Naga Kolosien 4 Bible Online

Kolosien 4 - Nocte Naga bible

Kolosien 4

¹Tângte heh ne haaheh demnâng asen ngale toangtang dangen, nekhôan nekjôan waken. Thonghun en nerãng rangkhethung nâng ne Tângte min tonga.

²Roantang rangsoam letma tongen, ngale rangsoam poatko jetletma soam en, ngale Joban nâng dangkoh a nga en.

³Ngale nirãngmin rangsoam kohhi, erohkoba Joban ma ninâng ate nginkongsen ngale Krista patritli nginkongpa phoangthô kohrãng sanpoat senpa ekohhi. Ngale ere rãng jôba Ngama athângheh phâtek nâng tongekang.

⁴Erohwah, Ngama chenroh thôthin a erepa senthemthem chenjien thôkoh angma rangsoam kohha, erohkoba mihnyan hehma senthemthem ejien jet a.

⁵Joban nâng lepute dâlemte mihnyan heh mitsokko jetletma dangen, ngale sanpoat roakweih thinnâng Joban nginpa senthemthem thôkoh en.

⁶Roantangma ne jabkhab hehmin tiemtete ngale nyoaktatli chendanga, ngale nema anga nganâng chenroh asen ma dânthâng min a erepa jet en.

⁷Nãngma nyahrãng ahun nãng lemru Tikikas, atea Teso moatlem nâng nyahrãng hungkoh lahma moatte ngale nãng rãngrãngjô atemin Teso haa, atema nekhu nâng Ngangin heh ethôkoh hèn.

⁸Erohwah atema nekhu nâng nia anâng chenroh tongekia erengin heh thôko lahma nekhu anga nga khu chenhah thukhèn ngama netânâng chienkat erâng.

⁹Ate demko Onisimas min johchienkat erâng, Onisimas pa nirãngma nyahrãng ahun lemruchhasen ngale nyahrãng hungkoh lahma putedâlemte, ngale atea nekhu demwah jôba. Thinma anâng chenni dangeka ereheh phangtang ethôkoh hèn.

¹⁰Ngademko phâtek nâng tôngte Aristekas memin nenâng salem matkat ehèn, ngale Barnabas pho anaa Mak memin salem matkat ehèn. (Mak netânâng mewãng rako ate senthemthem tãngroo en ngama nenâng thôkotah.)

¹¹Josua, ngale atenâng Justus ngamemin rângroo a, ate memin salem matkat ehèn. Are warem pejôba Jews jatwah putedâlemte danglahma Nga demnâng Joban Hahsông rãngma johmowak ehang, ngale thinma nganâng nyahrãng chohsûwak ehang.

¹²Jisu Krista haa ngale nekhu lemrujô Ipafras memin nenâng salem matkat ehèn. Atema roantangma nekhurãng nyahrãng rangsoam kohjû, ngale Joban ma nekhu rongtengtengjû, erediko hungchit phannang Kristansen, ngale Joban hungsi junkojû chendangen ngama soamkoh ehèn.

¹³Ngadedema ajet, atema nekhurãng, ngale Laodika wah mihnyan hehrãng, erediko Hirapolis wah mihnyan hehrãngma nyahrãng chaanrii lahma mokoh ehèn.

¹⁴Nãngma nyahrãng ahun doktor, ngale Dimas memin salem matkat ehèn.

¹⁵Laodika wah putedâlemte mihnyan hehnâng, ngale Nymfa erediko ate hum wah khôanhokte Asâthem hehnângmin ni ngewah salem thôkoh en.

¹⁶Nema are sitipa weih diko, Laodika wah Asâthem hehnângmin metkep loatweih koh en. Erediko Laodika wah putedâlemte hehma nenâng matwênthen siti pemin weihkoh en.

¹⁷Ngale Arkipas nâng, “Teso moatlem mothuk thopa senthemthem lângmo onga, ngama thôkoh en.”

¹⁸Ngadede dekma are sitipa raang ekang: Pol ngewah salem Nga a phâtek nâng janru nâng khhekrii ekangpa neklek pheha! Joban mînchenchaan nekhu demnâng chentonghèn.