Read Nocte Naga 1 Thisalonika 1 Bible Online

1 Thisalonika 1 - Nocte Naga bible

1 Thisalonika 1

¹Pol, Silas, ngale Timothi ngewah- Thisalonika wah Joban Wa ngale nãng Teso Jisu Krista nâng putedâlemte mihnyan ngale Asâthem hehnâng raangeka: Joban mînchenchaan ngale mêmo nekhu demnâng chentonghèn.

²Nima roantangma Joban nâng nekhu anga ngarãngma dangkoh a ngaeki, ngale nima rangsoam roakweih nekhu rângchhem hun a.

³Chenrãngma ngako nima nãng Wa Joban nâng rangsoamko, nekhuma putedâlem junko moeken heh, ngale nema hun achetmîn junko chaanrii letma moeken heh, ngale nema nãng Teso Jisu Krista nâng putedâlem letma tok anaa eken heh rângchhemhun e.

⁴Lemruchha heh, nima ajet Joban ma nekhu nâng hun ehèn, ngale atenâng putedâlemte mihnyan dângrãng ren ehèn.

⁵Chenrãngma ngako nima nenâng Nginkongsen pa jabkhab melolo ledang, ere toangtang nginpa senthemthem lepjet lihma Joban chaan ngale Asâthôanju demnâng kephû koheka. Ni nedemnâng dângpoatko chenroh dangtih a erepa nemajet; erepa nekhurãng sênrãngma moatwah.

⁶Nekhuma niwah ngale Teso wah he eken; ngale nekhu nyahrãngjô mechêm enkomin, nema nginkongsen pa Asâthôanju ngewah chaanchoh letma khuhah nâhah kep eken.

⁷Erohwah, nekhua Misidonia ngale Akaia wah chentô putedâlemte hehma newah heli dangeken.

⁸Chenrãngma ngako, Teso nginkongsen pa newah Misidonia ngale Akaia phangtang nâng lolo phoangchohtat chhoanthuk ledang, nema Joban nâng putedâlem ngin pemin chentô thenâng chohtat eka. Erohwah ere lêko nima chenjô ngatthin ahotu.

⁹Enâng wah mihnyan heh phangtangma ni netânâng hûthiko nema chenroh tãngroo thia erengin heh thôwak eka, ngale nema moangachaang nâng soamtô letma dangtet pa Joban tânâng hûletma chenroh ahîn Joban nâng soamtô eken a ereheh thôlahma tongwak eka

¹⁰ngale nema ate Chha rangkhethung wah ngakkat bemla eken heh thô rewak eka - ate Chhapa Jisu, Joban ma ritwah ngakhînsiet wah, ngale Jisu ma nãngkhu ahokmin Joban rinkhah kowah pesiet ehi.