Read Nocte Naga 1 Thisalonika 3 Bible Online

1 Thisalonika 3 - Nocte Naga bible

1 Thisalonika 3

¹Athôanko, nima letadôtu dângwah. Erohwah, ni lolo Athen hahnâng tôngkatwah

²ngale nidemnâng Joban rãngma Jisu Krista Nginkongsen pa phoangthô moatlem johmoatte nãngnaa Timothi netânâng chienwênwah. Atema nekhu nâng chaan johkoh lahma nekhu putedâlem chendong siethèn ngama chienwên erii,

³erohkoba are chêmchei chohthuk junko nekhu henmin Joban tâwah lengakchhoan edangen. Nekhu dede memin ajet arerãngrãng chêmchei chohthuk ehi pemin nãngma Joban hunsi junko choheki.

⁴Chenrãngma ngako chenthu ni netânâng dângpoatko nãngnâng aroh echêmthuk hi ngama thôkotah; ngale nema senthemthem ajet, nima chenroh thôkotah a ererãngrãng jôba dangeka.

⁵Erohwah Ngama Timothi chienwên erâng. Ngama leta bemtu thangma, ne putedâlem pa chenroh dangeken a ngama jetrãng netânâng chienwên erâng. Juchhihma nekhu nâng chêmsiet junko nima motih moatlem heh mahto nâng madanglah o ngama patrii lekma chienwên erâng!

⁶Phumma Timothi athângheh lângak katha, ngale atema nekhu putedâlemsen ngale hun achhâmîn letma tongeken ngin heh lâthô kohthi. Ngale nema ninâng roantang asen ngema thonghun ehi ngin heh, erediko chenroh nima nekhu khehun eka ererãngrãng nekhu memin nikhe hunehi ngama thôkohthi.

⁷Lemruchha heh, nima chêmchoh roakweih min nekhu nâng thonghun lahma hung rângdonge. Nekhu putedâlem pumma nihung dongsiet ehi,

⁸chenrãngma ngako, Teso demnâng roamletma ne putedâlem nâng rongtêngtêng dângjunko ni ahînma dangeki.

⁹Ade phumma nima nejunma nãng Joban nâng dangkoh a tangae. Nekhu junma nia ate tâko khuhah nâhah tâchoh dângdi atenâng dangkoh a ngaeki.

¹⁰Nihung nirin phangtang kohlihma rangwo rangnyek nekhu demnâng chenta chohmîn a, ngale ne putedâlem dôngsiet rãng lemeken heh chenmam tachohkoh a ngama rosep eki.

¹¹Nãng Wa Joban ngale nãng Teso Jisu Krista ma nekhu tânâng tâchohmîn hokrãng lem chenmam laangkohhi!

¹²Teso ma nekhu dede chenhunmîn thukhèn, ngale nima nenâng chentô huneka ererãngrãng chentô mihnyan heh hun achetmîn pemin chendonga.

¹³Atema nehung aroh chendongsiet hèn, ngale chenthu nãng Teso Jisu Krista atenâng putedâlemte heh demnâng ngakkat jâko, nemin nãng Wa Joban tâko senthemthem ngale Sâpoangpoang chendangen.