Read Nocte Naga 2 Thisalonika 1 Bible Online

2 Thisalonika 1 - Nocte Naga bible

2 Thisalonika 1

¹Pol, Silas, ngale Timothi ngewah - Thisalonika wah Joban Wa ngale nãng Teso Jisu Krista nâng putedâlemte mihnyan ngale Asâthem hehnâng raangeka:

²Nãng Wa Joban ngale Teso Jisu Krista ma mînchenchaan ngale mêmo chenkohhèn.

³Lemruchha heh, nekhurãng nima Joban nâng sanpoat roakweih dangkoh a ngaeki. Nima are dangkoh a ngaeki pa angat khônâng ngaeki, chenrãngma ngako, ne putedâlem pa nyahrãng dongeka, ngale nekhuma wathema wathe nâng hun achetmîn pemin nyahrãng dongeka.

⁴Erohwah nededema Joban nâng putedâlemte Asâthem hehnâng nekhu rângthôeka. Nekhuma ato chêmchoh komin lejek thangma tadô letma putedâlem eken heh rângthôeka.

⁵Are chentô heh junko Joban ma toangtangko ren eka ngama jetloeki, ngale ereheh junko nema Joban Hahsông pa tâchohmin. Ere Joban Hahsông pa tâchoh rãng jôba nekhu chêmrii eken.

⁶Joban ma chenpa toangtanga ere pejôba moeka: henhenma nekhu chêmthuk ehèn a ereheh nâng atema echêmthuk a,

⁷ngale henhenma chêmchoh eken a ereheh nâng atema chohsû lahma lechêmtu edangen, ngale nimin eroh edange. Atema arepa chenthu Teso Jisu rangkhethung wah ate ngintatte heh demnâng hôngkat jâko emoa,

⁸Joban lekepte, ngale nãng Teso Jisu Krista Nginkongsen ngin lekepte mihnyan hehnâng chêmthukrãng atea wendô demnâng ekara.

⁹Thin a Teso ngale ate achaanthôan chaan kowah rephe lahma roantang roangjêngrâng echêmwak a,

¹⁰Chenthu ate mihnyan Asâ ngale atenâng putedâlemte mihnyan hehwah rô ngale atenâng toak asân chohrãng katjâ Rangwo ko. Nekhumin ere mihnyan heh demnâng edangen, chenrãngma ngako, nima nenâng thôkohtah ngin heh nema kep eken.

¹¹Erohwah nima nerãng roantangma rangsoam koheka. Ngale Joban ma chenroh sôngrãng rothen a, eroh chenmam jiensong thukhèn ngama rosep eki. Ngale ne putedâlem junma moatlemsen moathun ekenpa ate chaanma chenmam tamo thukhèn.

¹²Eroh moat junko jôba nãng Teso Jisu Krista mînpa nekhu junma edonga, ngale nemînmin nãng Joban ngale nãng Teso Jisu Krista mînchenchaan junma edongen.