Read Nocte Naga 1 Timothi 6 Bible Online

1 Timothi 6 - Nocte Naga bible

1 Timothi 6

¹Haa dângte hehmin mâmâ tângtewa nginkepkep ngale thinran cheichei dângmin, erohkoba henmemin nãng Joban mîn ngale nãngma hethôeki ngin heh lelatnâng lechhihjab edanga.

²Kristan tângtewa haa dângte heh mâmâ tângtewa nginlekep ledangmin, chenrãngma ngako thinmin thinpho anaa jôba. Erenoma, thinnâng ajahba sênkhoakhêm min, chenrãngma ngako, thinma mokoh eka hehmin putedâlemte ngale thinma hun achhâ wakeka. Are ngin heh nema metkep hethô en ngale phoangthôkoh en.

³Henhenma nãng Teso Jisu Krista ngin ngale nãng rangsoam niem pumma hethôeka ngin heh lekep thangma lihân niemarang amõang heh hethôeka

⁴erehehma chenmin lejet thangma ngam apoarit loloba rewak eka. Ngale atea Joban jabkhab junma chhiakmîn lahma mênmîn loloba thonghun lahma tongwak eka, ngale erejunko mihnâng mitchek, chhiakmîn, mihnâng dûmmek, ngale achhih ngenâng phoangkhâ,

⁵ngale kheri chhih erediko thinnâng toangtang pa aho dâng phumma roantangma achhiakmînli heh lolo hongsiet wakeka. Thinma rangsoam niem keppa techhu dângli ngama thonghun eka.

⁶Phumma nãng ngenâng chenni tongehia ere demko nãng rinme wokme medang eko, rangsoam niem pumma nãng linlin nyahrãng techhu edangthuk hi.

⁷Nãngma are hahtokkhoh ko chenni kephûtih a? Chenni min kephû mahtih! Ngale nãngma are hahtokkhoh kowah chenni tâkep chhoanmin a? Chenni min leta kepchhoan min!

⁸Erohwah, nãngnâng phhekchhah le khet akhu metong thiko, erepa nãngrãng lâletah.

⁹Rohkomin henhen techhu dânghun eka, ereheh achhih ngenâng jâriieka, ngale benâng mânritwah rãngrãng hung arin nâng rongrup achhihli heh thonghun eka pumma jâsiet lahma chhihsiet eka.

¹⁰Chenrãngma ngako, ngun nâng hun junko rongrup achhih heh hongeka. Khaka hehma ngun nâng nyahrãng hunlahma Joban nângmin putedâlem tumah, ngale thinhung arin hehmin rongrup achhihli heh thonghun lahma chhihjâ eka.

¹¹Rohkomin nanga Joban mihnyan, arerãngrãng chentô hehwah ataangnâng tongo. Toangtang, Joban rinmeli, putedâlem sen, hun achet, chentôpa mamtadô, ngale numnene dângrãngba latriio.

¹²Putedâlem ngenâng toatchhoan mînwah rãngrãng senthemthem dango, ngale nangdede rãngma roantang roanjêng roandông khope pa choh o; chenrãngma ngako nangma ajahthem mihnyan heh mathahko nang putedâlem pa rongtêngtêng putedâlem lohma khesokdi Joban ma are roantang roanjêng roandông khope pa chohrãngma rooeho.

¹³Ngama arepa chentô nâng roandông kohte Joban mathahko, ngale Pontas Pilat mathahko ate putedâlem pa rongtêngtêng khesokthukte Jisu Krista mathahko nangnâng chien eki

¹⁴nãng Teso Jisu Krista ngakkatjâ Rangwo pa mahong hongko Ngama nangnâng are ngin chien eki heh senthemthem keplohma tongo.

¹⁵Sanpoat pa methâng tahko Joban ma ate ngakkatjâ rangwopa ewothuk a. Joban lolo jôba rangkohte Joban, atelolo jôba Pângte Joban, Lowang kowahmin Lowangdong thôan, ngale Teso kowahmin Teso dongthôan.

¹⁶Ate lolo jôba chenthumin leriite; atea henmin letahû thin wenphiak tâko songeka. Henmemin ate mathat kheka; henmemin ate khemah. Ate lolo nâng jôba roantang roanjêngma toak asânmin ngale atenâng lolo jôba roantang roanjêng lechhihjâ chaantong eka! Amen.

¹⁷Are hahtokkhoh roandông kowah ngun akem ngale chhahkhem ngenâng techhu dângte hehnâng lengamrii rãng thôkoh, ngale thin ngun akem le chhû alû hehnâng nekchen dâlem wakeka, rohkomin nyahrãng chhahme danglahma nãngnâng khuhah nâhah tongrãng chentôpa chohkohte Joban nânglolo chen dâlem wak a.

¹⁸Moatlem sen moatrãngma thôkoh, moatlemsen ngenâng techhu rãngrãng chendangwak a, erediko chhahme ngale mihhan heh demnâng phenphen sensen chenkep wak a.

¹⁹Eroh memo akoba thinma khediwah thin roandông rãng lesekmah tuli eta khôanthien wak a. Ngale erohkoba thinma alinlin toangtang roandôngpa eta choh a.

²⁰Timothi, nangnâng Joban ma chenni sokare rãng chienthô erepa senthemthem sûareo. Sek ho ngale aba ata ngin heh nekphoang chhiakmîn, ererãngrãng ngin heh phoangchiak mînko khaka hehma “Jet ajien” reki ngama thonghun eka.

²¹Chenrãngma ngako, khaka hehma lâjet lâjientih ngama thonghun lahma thinma Joban nâng putedâlem pa mahjâ eka. Joban mînchenchaan nekhu chentô demnâng chentonghèn.