Read Nocte Naga 2 Timothi 1 Bible Online

2 Timothi 1 - Nocte Naga bible

2 Timothi 1

¹Joban hungsi junko Jisu Krista moattat chhoante rãng, ngale Joban ma toamsem tah roandôngpa Jisu Krista demnâng roamlihma chohmin ngama phoangthôkoh rãngma chienchhoan wah Pol ngewah raangeki-

²Ngama nyahrãng ahun chha Timothi nâng raangeki: Nãng Wa Joban ngale nãng Teso Jisu Krista ma nangnâng mînchenchaan, ahun, ngale mêmo chenkohho.

³Ngate Ngawa hehma soamtôtah Joban ko Ngamemin hungsâ rinsâma soamtô lekma dangkoh a ngaekang. Ngama nanga rangwo rangnyek Nga rangsoam roakweih thonghun lihma Joban nâng dangkoh a ngaekang.

⁴Ngama nang mitphi jâtohpa thonghun ekang, ngale Ngama nang nyahrãng chohkhe huneki, erohkoba Nga khuhah nâhah edangang.

⁵Ngama nang putedâlem sen pa thonghun ekang, nangwi Lois ngale nang nyong Inuic nimemin erohjô senthemthem putedâlem wah. Nang memin erohjô putedâlem eko ngama thonghun ekang.

⁶Erohwah Ngama nang khoko dekma sahlo lihma rangsoam kohko Joban ma nangnâng Ju ngenâng hînhô kohthôpa senthemthem thien o ngama ngakthõng thôkoh eki.

⁷Chenrãngma ngako, Joban ma nãngnâng kohehi Ju pumma nãng chephoat dangthuk mahhi; Erenoma, ate Ju pumma nãngnâng chaankoh ehi, ngale hun achet, erediko mâmâ dede tâdôrit chaankoh ehi.

⁸Erohwah, nãng Teso hâkhi dângrãng nekrêsê; ngale Krista rãngma phâtek nâng khhekritte Nganâng min nekrêsê hang. Erenoma, Nginkongsen rãngma chêmriiroh reo, eroh tâchêmrit rãng Joban ma nangnâng chaankoh eho.

⁹Atema nãngkhu pepâng lahma atedede mihnyan dângrãng rooehi, erepa nangma moatlemsen moatjunma dangmah, ate dedema hunlahma ate mînchenchaan junko pepâng ehi. Rangle Hahtokkhoh hôan mama are mînchenchaan pa atema Jisu Krista junma nãngnâng kohehi.

¹⁰Rohkomin are mînchenchaan pa nãng Pângte Jisu Krista kalahma khesok ehi. Atema arit chaanpa mahsiet eka ngale nginkongsen junma chenthumin leriitu roandông loatkhesok ehi.

¹¹Joban ma are Nginkongsen pa phoanghethô rãng ngale phoang thôkoh rãng moattat chhoante dangthuk ehang,

¹²ngale erejun kowah Ngama are chêmchei heh choh ekang. Rohkomin Nga athâng hehmin hung dongdong tongekang, chenrãngma ngako, Ngama hennâng tok anaa ekanga erepa Ngama jet ang, ngale atema Nganâng chenni sûare thuk ehanga erepa atema ere Rangwojâ pa mahûhûko senthemthem eta thien a ngama putedâlem ekang.

¹³Ngama toangtang jabkhab nangnâng hethôtih hehnâng rongtêngtêng lolohma tongo, ngale erejunko dango, erediko Jisu Krista demwah nãngkhu putedâlem le hun achet junko tongo.

¹⁴Nãngkhu khenwah sôngte Asâthôanju chaan junma nangnâng sûare thuktho asenli heh senthemthem thien o.

¹⁵Nangma ajet Asia diakwah chentô mihnyan hehma, ngale Phigelus ngale Hirmogenes hehma Nga thînphe ehang.

¹⁶Teso ma Onisiforus heh tangkâ nâng chenmînchen a, chenrãngma ngako, atema Nganâng melângdep chohsû thang. Ngale Nga phâtek nâng tôngpoat komin atea Nganâng rêsê mahthang.

¹⁷Rohkomin ate Rom nâng hokkhoam rienrien lemlienma Nga machoh chohkhe lemsûthang.

¹⁸Teso ma ate ngakkatjâ Rangwo ko Onisiforus nâng chenmînchen a! Ngale atema Ngarãng Ifisus nâng chentô mokoh thanga ereheh nangmemin senthemthem jet o.