Read Nocte Naga Titas 1 Bible Online

Titas 1 - Nocte Naga bible

Titas 1

¹Joban haa ngale Jisu Krista moattat chhoante Pol ngewah raangeki. Nga Joban mihnyan heh putedâlem pa rôngsiet erediko nãng rangsoam niem pumma Joban toangtang ngin hethôeka heh thinnâng hethô rãng renlahma chienchhoan ehang,

²erepa roantang roanjêng roandông chohrãngma putedâlem eki. Are roantang roanjêng roandôngpa Joban ma rangbeng hahbeng thuma nãngnâng kohrãng toamsêm wah, ngale Joban ma mothô thômah,

³ngale sanpoat thangko arepa Joban ma ate nginkong demko loatsietkat era. Arepa phoangthô rãng Nganâng chienwah, ngale Ngama erepa nãng Pângte Joban ma chien junko phoangthô ekang.

⁴Titas, Ngama nangnâng raangeki, nanga Ngarãngma nãngkhuma aroamma putedâlem eki junko Ngachha linlin rãngrãng kepeki. Nãng Wa Joban ngale nãng Pângte Jisu Krista ma nangnâng mînchenchaan ngale mêmo chenkohho.

⁵Ngama nanga Kret nâng phethien eki, erohkoba nangma malaangmo moatlem heh eta laangmothien o, ngale chentô hahdaang hehnâng Asâthem heh khhepho phannang heh renthien o. Ngama nangnâng hethôtih heh thonghun o:

⁶khhepho phannang heh mihma chhihthôli nekchen dangeka; atea tangnyu wathelolo kepte dângmin, ngale ate chhuchha hehmin putedâlemte dângmin ngale ngem ngah rãngrãng ngin lekepte ledangmin.

⁷Chenrãngma ngako Asâthem heh khhepho phannang heh Joban moatlem moatte, erohwah, atea mihma chhihthôli chenmin aho dângmin. Atea ngam poapoa, erediko rinkhahla, khemmok chempa, ngun akem nâng nyahrãng chhahnyoakte min ledangmin.

⁸Atea mihnâng chohsok hunte, erediko chenrepa senlia ereko hunte dângmin. Atedede hung tâmông sietritte, toangtang, Asâ, ngale apun alemko dângte dângmin.

⁹Atenâng hethôeka nginkongsen kowah jabkhab heh senthemthem kepte dângmin. Eroh medang akoba ate memin mihhan hehnâng toangtangma hethô lahma thinhung eta dongsiet a, ngale toangtang lelatnâng dângte mihnyan hehnângmin thin a athe ngama eta khesok a.

¹⁰Chenrãngma ngako jahmõang mihnyan, Judiejem wah litdangtah heh Joban jabkhab lelatnâng danglahma, hota ngin thôlahma mihheh diapchhah eka.

¹¹Ere thinma ledangli nginmõang phoangthô eka heh jeksiet remin, chenrãngma ngako, thinma ledangli nginmõang heh hethô lahma chentô humte tangkâ heh hungke thukwak eka, ngale erepa rêsêli thôan, thinma ngunbi rãnglolo moeka.

¹²Arepa thindede Kret jat mihnyan mõng wathema toangtang jabwah, “Kret wah mihnyan heh roantangma mothô khoanglep, thin a wunngem chhih rãngrãng, ajõ ngale chenjô lemo thangma jokphhek chhah lolo jetwak eka.” Erohwah nangma thinnâng nyahrãng ritnga wak o, erohkoba thin putedâlem pa asen edanga

¹⁴ngale thinma Jews heh tewa nginchha hehmin lekeptu edanga, ngale toangtang jabkhab lelatnâng dângte mihnyan hehma chieneka moatlem heh lemotu ejekwak a.

¹⁵Hen mâmâ dede sâpoangpoang dangeka ereheh demnâng chentôpa asâ tuta; rohkomin henhen ngeksietrit reka, ngale lepute dâlemte a ereheh rãngma chenjô asâ aho, chenrãngma ngako, thinma thin kheri ngale hung arin heh ngeksiet eka.

¹⁶Ere hehma thin a Joban jette mihnyan ngama ngarii wakeka, rohkomin thin moatlem junko thinma Joban ngin kepmah. Thin a nyahrãng chinnyali ngale ngin lekepte, chenni moatlemsen moat akat rãngjô senmah.