Read Nocte Naga Titas 3 Bible Online

Titas 3 - Nocte Naga bible

Titas 3

¹Mihnyan hehnâng thôkoh o, thin pênte le thôte jabte heh nginkepkep chendangwak a, ngale rongrup ngema asenli tuta chenmowak a.

²Ngale hen lelat nângjô nginchhih heh lephoang jab ajarãng thôkoh, rohkomin anga nga demnâng mêmoma lemruchha rãngrãng tuta chendangwak a, ngale roantangma anga nganâng numnene danglahma chenkhesokwak a.

³Chenrãngma ngako nãngkhumin poattheko aba, nginlekep, ngale athe dângwah. Ngale nãng hungma rongrup achhih ngale hei angem nâng rinmehun pumma haarãng kepwah. Nãngkhu roandôngpa mihnâng mitchek phetwân lihma dângwah; mihma nãngnâng chhihchoh ngale nãngma thinnâng chhihchoh relihma dângwah.

⁴Phumma chenthu Joban nãng Pângte ma mînchen ngale hun achet pa hôngdiko,

⁵atema nãngkhu pêpângwah. Rohkomin erepa nãngkhu dedema chenni akomin kaamsenmoat junko dangmah, erepa atedede ngewah mînchenchaan junma pepâng ehi, ngale Asâthôanju junma nãngkhu sâsiet lahma anyan rãng ngakchhathuk lahma roandông nyan kohehi.

⁶Nãng Pângte Jisu Krista junma Joban ma nãngkhu khohnâng Asâthôanju mênchoang kohkat ehi,

⁷erohwah ate mînchenchaan junma nãngkhu Joban demnâng toangtang dangeki, ngale nãngma dâlemtih roantang roanjêng roandôngpa choheki.

⁸Arepa toangtang ngin. Nekhuma are nginpa senthemthem chenjet en ngama hun ekang, erohkoba henhenma Joban nâng putedâlem eken a erehehma ne roandôngko moatlemsen moletma etongen, ngale erepa anga ngarãngma asenli ngale alemli.

⁹Rohko-min aba ata rãngrãng phoang chhiakmîn, te awi heh roandông ngin thômîn, mên ahietmîn ngin, ngale Niemarang hehrãngma mênmîn hehwah ajekre en. Are chentôpa sekhota ngin.

¹⁰Mihphoang phansiette mihnyan hehnâng depniitô ritnga letma thien en, eredikomin erohjô memowak ako thin demnâng chenjô nekroam en.

¹¹Nangma ajet arerãngrãng mihnyan heh mihnyan chhih, ngale thinpap pumma thin a achhih ngama khesok eka.

¹²Chenthu Ngama nangtânâng Artimas le Tikikas mechien katthangko, nanga Ngatânâng Nikopolis nâng chohmîn kahang, chenrãngma ngako, Nga rangpâ pâtangma enâng tôngrãng thonghun ekang.

¹³Zinas atea okil, ngale Apolo niinângmin thin loatchhoan poatko chohsû en, ngale thinma chenni lemeka ereheh phangtang chohkoh en.

¹⁴Nãng mihnyan hehma sanpoat roakweih moatlemsen molihma tôngmin, erohkoba nãngma chenni lem ekia ere chentôpa etachohkep e; thinma chenjô lemo thangma nekchen tongeka.

¹⁵Ngademwah heh chentôma salem matkat eho. Putedâlem nâng wanthe dângte nãng lemruchha hehnâng ni ngewah salem thôkoh. Joban wah mînchenchaan nekhu chentô demnâng chentonghèn.