Read Nocte Naga Filimon 1 Bible Online

Filimon 1 - Nocte Naga bible

Filimon 1

¹Jisu Krista rãng phâtek nâng tôngte Pol ngale nãngnaa Timothi ngewah- Nilemruchha ngale nidemnâng aroamma moatte Filimon,

²ngale nang humwah khôante Asâthem hehnâng, ngale nang nya Afia, ngale nangdemko sipâhi rãngrãng johdângte Arkipus nâng raangeka:

³Nãng Wa Joban ngale nãng Teso Jisu Krista ma nenâng mînchenchaan chenkohhèn.

⁴Nganaa Filimon, Ngama rangsoam roakweih nangmin lepcheh lekma Nga Joban nâng dangkoh a rângnga ang.

⁵Chenrãngma ngako nangma chentô Joban mihnyan hehnâng hun achhâ eko le nangma Teso Jisu Krista nâng putedâlem eko heh Ngama chohtat ekang.

⁶Nga rangsoam pa nãngkhu aroamma putedâlemte danglihma nãng roandôngko Krista demnâng roamlihma chentô rangkep ekia ereheh lulitlit chenmam jet o ngama soam ekang.

⁷Ngama nyahrãng ahun naa, nang ngewah hun achet pumma Nganâng nyahrãng hungsenthuk ehang, ngale nyahrãng hungdongsiet ehang! Ngale nangma chentô Joban mihnyan hehmin hung lâsen thuktoh.

⁸Krista mînko Nga nangpho danglekma, Ngama nangnâng chenni moatrãng chien ekia erepa lesoang thangma moatrãng chien eki.

⁹Rohkomin Ngama nangnâng hun achet junko, roatsep ba reki. Are rosep ekipa Nga Pol Jisu Krista rãng moattat chhoante ma rosep eki, ngale athâng hehmin ate rãngma Nga phâtek nâng khhekrii ekang.

¹⁰Erohwah Ngama nangnâng Onisimus rãng rosep eki, atea Ngarãngma Jisu Krista mînko echha linlin rãngrãng lâdangtah; chenrãngma ngako Nga phâtek khennâng tôngpoatko Ju ngenâng ate rãngma nga a wa rãngrãng lâdangtek.

¹¹Poattheko atea nangrãngma akepli ledangtu dângwah, rohkomin ade phumma atea akepli lâdangtah nangrãng memin, ngale Ngarãng memin akepli lâdangtah.

¹²Ngama athângheh Ngahung pa ate demko danglekma nangtânâng ngakchien kat erâng.

¹³Nga nginkongsen rãngma phâtek nâng tôngpoatko, nang litko atema Nganâng chenchohsû hangma Ngademko thienhun dângwah.

¹⁴Rohkomin, Ngama nangnâng metkepkep chohsû hang ngama chienmih; erenoma, Nangdede hungsima chenchohsû hang ngama thonghun ekang. Erohwah nang hungsi ledang koko Ngama chenjô momek.

¹⁵Nang tâwah Onisimus poattherãng taangchhoan tahpa, nangma ate roantang roangjêng rãng jienngakkep rãngma taangchhoan wahmin tadanga.

¹⁶Ngale ade phumma atea haa lolo dangtumah, haa nomemin asen lâdangtah: ngale atea Krista mînko naa rãng lâdangtah. Ngama atenâng chentô hun ekanga! Ngale nangmemin atenâng erenoma ajah ehun o, nangma atenâng haa rãngrãngmin ehun o, ngale Teso mînko naa rãngrãngmin hun o!

¹⁷Erohwah, nangma Nganâng nang lemru ngama methonghun hangko, nangma Nganâng tãngroowah rãngrãng atemin tãngroo o.

¹⁸Atema nangrãng chenni akomin mechhih motahko, ba chenni akomin thãpê mepê thoko, ereheh Ngawah thahang.

¹⁹Arepa Ngadede dekma raang ekang: arepa, Nga Pol ma, engakthum e (Are rãngma Ngama nangnâng chêmthôkoh thin dangmah, nangdede roandông pa nangma Nganâng thãpê pêwah rãngrãng dangeka.)

²⁰Eroh-wah, Nganaa, Teso mînko nangma Ngarãng arepa mammo mêngkohhang; Krista mînko nangpho rãngrãng thonghun lohma, Nga khuhahthuk mênghang!

²¹Ngama putedâlem ekang, Ngama are sitipa nangnâng raang junko, Ngama chenrãngma rosep ekia erepa emo o - ngale Ngama ajet linlin Ngama chenrãngma rosep ekia ere nomemin nangma ajah emo o.

²²Ere demdemko, Ngarãng thewah thienla kohhang, chenrãngma ngako, Joban ma nekhu phangtang rangsoam pa tatlahma Ngamin nekhu tânâng engak huthukhang ngama putedâlem ekang.

²³Jisu Krista rãngma Ngademnâng phâtek nâng johkhhek ritte Ipafras memin nangnâng salem matkat eho,

²⁴ngale Nga demnâng roammoatte Mak, Aristekas, Dimas, ngale Luk memin matkat eho.

²⁵Teso Jisu Krista mînchenchaan nekhu anga nga demnâng chenjoh tonghèn.