Read Nocte Naga Hibru 10 Bible Online

Hibru 10 - Nocte Naga bible

Hibru 10

¹Jews heh Niemarang pa alinlin pa dangmah; erepa khedi kowah hokmin alinlin asen ere moangba. Phumma Niemarang junko mãnthethin pa roantang roanjêngma rangpâ roakweih joapsoap wakeka. Eroh medang ako, aroh joapsoap junko Niemarang pumma Joban tânâng hokte mihnyan heh chenroh jiensên sietmin a?

²Phumma Niemarang junma Joban nâng soam atôte mihnyan heh thinpapwah linlin sâsietchoan danglahma ko, thinnâng pap ahotu dangminwah, ngale chentô joapsoap pemin jek retu minwah.

³Erohwah, rangpâ roakweih depdep joapsoap junko mihnyan hehnâng thinpap pa tonga jôba ngama jetthuk eka.

⁴Chenrãngma ngako, mân le kien heima chenthumin pap tasâsiet mah.

⁵Erohwah, chenthu Krista are hahtokkhoh ko katrãng ngatko, atema Joban nâng ngatwah: “Nangma soam aroak le joapsoap pa hunmoh, rohkomin nangma Ngarãng phoangpa khoakhemkoh ehang.

⁶Ngale nanga ngem angah heh ritphe lahma chaam khohko wennâng thhek lahma soamtô komin rinmemoh ngale pap sâsietrãng ngem angah ritphe lahma joapsoap komin rinmemoh.

⁷Ephumma Ngama ngatwah, ‘O joban nanghung junko moatrãngma, Nga etongang, Eroh jôba Nga junma Niemarang titab nâng raangeka.’ ”

⁸Khebengko atema ngatwah, “Nanga Niemarang junma soam aroak le joapsoap pemin hunmoh, ngale erehehnâng rinmemoh, erediko ngem angah ritphe lahma pap sâsietrãng chaam khohko wennâng thhek lahma soamtô pemin hunmoh.” Are chentô soam aroak le joapsoap pa Niemarang junkojô mehôan akomin atema arepa jabwah.

⁹Erediko atema ngatwah, “O Joban, nanghung junko moatrãng Nga etongang.” Ere junma Joban ma Niemarang apã junko soam aroak le joapsoap heh phe lahma, ere litko Krista litkepwah.

¹⁰Chenrãngma ngako, Joban ma chenni huneka erepa Jisu Krista ma moeka, ngale Jisu Krista ma ate phoangpa roantang roanjêng rãngma rekthe kohdi nãngwah chentô pap heh phangtang sâsiet ehi.

¹¹Chentô Jews soam aroakte hehma rangwo roakweih soam aroak eka, ngale thinma mãnthethin pa butbut joapsoap eka; rohkomin are joapsoap eka pumma chenthumin pap tasâsiet mah.

¹²Phumma Krista ma paprãng ditthe lolo ate roandông kohtahpa roantang roangjêng rãng lâletah, ngale erediko atea Joban dekchahko tongwãng eka.

¹³Ngale Joban ma ate ran heh ate daphâ khenko danek thinrãng mahôan hôankoh enâng bemeka.

¹⁴Ate roandôngpa ditthe kohlahma Krista ma papwah sâsiettah mihnyan heh roantang roangjêng rãng sâsiet eka.

¹⁵Ngale Asâthôanju memin nãngnâng thôkoh ehi. Khebengko atema ngaeka,

¹⁶“Ngama thin demnâng are toampa esam ang Teso ma ngaeka, ahokmin sanpoatko: Ngama Nga niemarang heh thinhung nâng ethienkoh ang ngale thin kheri nâng eraangkoh ang.”

¹⁷Ngale erediko atema ngaeka, “Ngama thinpap heh ngale thinma kaamchhih motah heh thonghun tumek.”

¹⁸Erohwah chenthu ere pap heh map mekoh tahko, pap sâsietrãng ngem ngah ritphe lahma joapsoap pa lemtumah.

¹⁹Ngalemruchha heh, erohwah, Jisu ritjunma nãngmin Nyahrang Asâthôan Theko lesoang thangma tawãnge.

²⁰Atema nãngrãng lemnyan laangkoh ehi, erepa khet tãngtin eka lîenko wângthin ahîn lemkhô laangkoh ehi - erepa ate phoang koh lahma laangkoh ehi.

²¹Erohwah nãngrãngma Soam Aroakte adongthôan pumma Joban humpa pêneka.

²²Erohwah nãnghung ma achhih thonghunki hehwah sâsietrii ngale nãng phoangpa josâma sâsoan wah rãngrãng danglihma hungsâ ngale senthemthem putedâlem lihma Joban tânâng namhûe.

²³Ngale nãngma thôeki dâlem ko rongtêngtêng putedâlem e, chenrãngma ngako, Joban toamsêm pa Joban ma emoa ngama putedâlem eki.

²⁴Erohwah wathema wathe nâng thonghunmîn e, ngale wathema wathe nâng chohsûmîn re e, erediko hun achet khesokmîn lihma asenli moe.

²⁵Wanwanthe mihhan heh jek eka rãngrãng nãngkhu chohmîn nekjek eki. Erenoma, wathema wathe nâng ajah jahba hungdong sietmîn e, chenrãngma ngako, nemajet, Teso ngakkat Rangwo pa lânam hûtha.

²⁶Chenrãngma ngako, nãngnâng toangtang pa jetthuk diko nãngma jetnung nungma pap metham moeko nãngma pap moeki pa chenrãngrãng soam aroak memin tasâsiet tumah.

²⁷Eroh junko, thinrãngma nyahrãng cheili khope rênjâ rangwopa loloba etongtua, ngale nyahrãng cheili wen pumma Joban lelatnâng dângte mihnyan heh ejemkham a!

²⁸Henma komin Mosa Niemarang pa lekep medang ako, wanii ba warem mihnyan hâkhi demnâng athe menga tahko lemînchen thangma ritphe rewah.

²⁹Eroh medang ako, Joban Chha lekepte mihnyan heh jãtanga chenroh dângmin a? ngale Joban ma thinpap heh sâsietrãng hei hongsiet ekapa thãjõ rãng kepte heh chenroh dângmin a? Ngale thinnâng mînchenchaan kohte Ju thãsete heh chenroh dângmin a? Thatthong hun tan en, thinma chentô chhih chêmchohmin a!

³⁰Nãngma ajet arepa henma ngatah a erepa, “Phuh pa Ngama elit ang, Ngama engakthum ang” ngale atema arohmin ngatwah, “Teso ma ate mihnyan heh achhih asen pa eren a.”

³¹Ahîn Joban deknâng chathok pa chentô cheili thôan dângmin a!

³²Thonghuntan en, amako nedemnâng chenroh dangtah a. Ere sanpoatko, Joban wenpa nekhoh nâng phiakkat diko, nema ajahthem chêmchei chohtet, rohkomin, nea ere chêmchei pumma tajienho.

³³Nea poattheko nok atang heh mathahko thãjõ lembe hôanjôan then, ngale ahan sanpoat nâng nemin nerãngrãng chêmte mihnyan heh demnâng johchêmrãng huntet.

³⁴Nema phâtek nâng khhekritte mihnyan hehnângmin mînchen letma chohsûtet, ngale chenthu ne chhahkhem heh nyenthenko, hung leke dangtet, chenrãngma ngako, nema roantang roangjêng rãng lechhihli, ngale newah nyenthen chhahkhem noma abâmbâm asenli chenni komin choheki ngama jet eken.

³⁵Erohwah nehung nekchha en, chenrãngma ngako, erepumma nenâng nyahrãng thãchaan khope pa ekephukoh hèn.

³⁶Joban hung junko jienmoatrãng ngale Joban ma toamsem tahpa tâchohrãng nea hungmôngmông dangletma tôngmin.

³⁷Chenrãngma ngako, Joban nyapraangma ngaeka, “Chuthe diko, hen katte a erepa ekara; ngale atea lelektong thangma ekara.

³⁸Rohkomin, Nga demnâng toangtang danglahma tôngte mihnyan heh, putedâlem nungma ehin ejowak a; phumma hen komin Nga tâwah mengak chhoan ako, Nga thin demnâng hung lesenmin.”

³⁹Nãnga Joban tâwah ngakchhoan lahma mahritte mihnyan heh dangmih. Erenoma, nãnga Joban nâng putedâlem lihma khopete mihnyan.