Read Nocte Naga Hibru 13 Bible Online

Hibru 13 - Nocte Naga bible

Hibru 13

¹Kristan pho anaa rãngrãng wathema wathe nâng hun achhâmîn letma tongen.

²Nehum nâng mihwun heh lejekthuk nekdangen. Chenrãngma ngako mihnyan hehma eroh jekthukwah rangkhethung wah Joban ngintatte min lâjek thuktah.

³Nema phâtek nâng khhekritte mihnyan hehnângmin thin demnâng johkhhekrit wah rãngrãng thonghun en. Ngale chêmchete hehnâng nemin thin demnâng johchêmwah rãngrãng thonghun en.

⁴Anga ngama nemnyansiet pa sâpoangpoang danglihma sietmin, ngale tangnyu tangwanii wathema wathe nâng toangtang tuta dângmin. Janchhô paangmih poatko kaamchhih moatte le mihdihiak dela tungnâng kaamchhih moatte hehnâng Joban ma achhih ngatmin.

⁵Ne roandôngko ngun akem nâng hangbalin nek hun en, ngale nenâng chenni tonghèn a ere demko rinme letma tongen. Chenrãngma ngako Joban ma ngaeka, “Ngama chenthumin thinphemah; ngale Ngama chenthumin lekphemah.”

⁶Erohwah, nãngkhuma hungdongdong danglihma jab e, “Teso pa Nganâng chohsokte, erohwah Nga cheitumek. Ngale Nganâng henma chenni taretu hanga?”

⁷Amawah nenâng Joban nginkong thôkohte khhepho phannang heh thonghuntan en. Thin chenroh songtong lahma riitah a ereheh ngakthonghun tan en, ngale thin putedâlem rãngrãng dangen.

⁸Jisu Krista pa mejâ, thejâ, ngale roantang roangjêng rãng mãnthe.

⁹Jatrup ledangli ngin ariet heh tatletma toangtang lemkhô kowah nekke khoam en. Jokphhek chhah niemarang heh keplihma tôngnoma Joban ngewah mînchenchaan chohlihma tôngpeba asen; henhenma phhekchhah niemarang heh keplahma tongeka ereheh nângmin ere niemarang pumma chenjô chohsûmah.

¹⁰Jews heh rangsoam thin kowah moatte soam aroakte hehma chaamkhoh kowah joapsoap eka heh chenjô leta phhekchhah min.

¹¹Jews heh soam aroakte adongthôan hehma nyahrãng Asâthôan Theko ngem angah hei keplahma paprãng joapsoap hokwah; rohkomin thinma ngemsekpa hahdaang wah panthong liennâng rokthhekwah.

¹²Erohwah mihnyan nyuchha heh pappa ate heima sâsietrãng Jisu min hahdaang wah panthong liennâng ritwah.

¹³Erohwah, nãngmin hahdaang wah panthong liennâng chhoanlihma atema rêsêchoh ekako johdange.

¹⁴Chenrãngma ngako are hahtokkhoh ko nãngrãng roantang roanjêng sôngthin hahdaang aho; nãngma khedi kowah ahokmin hahdaang peba bemlaeki.

¹⁵Erohwah, Jisu junma Joban nâng nãngma roantang arô ngema joapsoap e, ngale nãngma atenâng soam aroak kohhokwah rãngrãng nãng thunma atea Teso ngama loatjab eki.

¹⁶Kaamsen moatrãng neklekphe en ngale wathema wathe nâng chohsokmîn min neklekphe en, chenrãngma ngako, ereheh jôba Joban rinmeli joapsoap.

¹⁷Ne khhepho phannang heh nginkep en ngale thinma chien ehèn junko dangen. Thinma leboantong thangma ne Ju amoang heh sûare ehèn, chenrãngma ngako, thinmemin thin moatlem thãpa Joban nâng khesokmin. Nema thin ngin mekep enko, thinma thin moatlem pa khuhah nâhah emowak a; eroh ledang kako, thinma hungkeke emoa, ngale nenângmin chenthujô leta chohsûmin.

¹⁸Nirãng roantang rangsoam kohhi. Nihung nirin linlin danglihma asâ, chenrãngma ngako, nima sanpoat roakweih kaamsen moat tuta huneki.

¹⁹Ngale Nga nekhu tânâng Joban ma sitsiak chenmam ngakchienkat hang ngama rangwah mamsoam kohha ngama rosep eka.

²⁰Joban ma nãng Teso Jisu Krista ritwah ngakhinsiettah, ngale ate hei junma atea Saaksokte Adongthôan dangeka, ngale erejunma roantang roangjêng rãng toamsem eka. Ate hung junko moatrãng mêmo kohte Joban ma chentô asenli heh chenchoh kohhi, ngale Jisu Krista junma atema nãngnângmin ate hungsênli moatlem moatrãng chenmam hôanhi. Erediko Krista mîn roantang roangjêng rãng chendonga! Amen.

²²Ngalemruchha heh, Ngama nehung dôngthukrãng rîn akhah ngin thôkoh ekako nehung môngsiet letma mamjettat en ngama rosep eka; chenrãngma ngako Ngama nenâng are sitiraang ekapa nyahrãng alo nyong dangmah.

²³Ngama nenâng nãngnaa Timothi phâtek wah lâlaangtah ngama thôkoh huneka. Ngale ate sitsiak meka rako, Nga nedemnâng chohmîn katko atemin Nga demnâng ejohsiet katrâng.

²⁴Niwah salem pa ne lemsênte khhepho phannang, ngale chentô Joban mihnyan hehnângmin thôkoh en. Itali diakwah Joban nâng putedâlemte hehma thin salem matkat ehèn.

²⁵Joban mînchenchaan nekhu anga nga demnâng chentonghèn.