Read Nocte Naga Hibru 2 Bible Online

Hibru 2 - Nocte Naga bible

Hibru 2

¹Erohwah nãngma chohtat eki toangtang nginpa rongtêngtêng keplihma tôngmin, eroh medang ekoba lekesietrii edange.

²Nãngte nãngwa hehnâng rangwah Joban ngintatte hehma thôkotah ngin heh toangtang dângwah, ngale henhen erengin junko ledang ngale erengin pa lekep dangtah a erehehma chêmchoh tah.

³Eroh medang ako, nãngma areto khope dongthôanpa lekep medang eko chenroh jienpemin a? Khebengko are khope pa Teso ma ate dedema bengloatthô kohwah, ngale henhenma ate ngin chohtattah a ereheh memin nãngnâng arepa toangtang ngama khesok ehi.

⁴Ere demdemko Joban ma thinnâng rongrup patritli ngale bâritli moatlem heh moko lahma ate hung junko thinnâng Asâthôanju hînhô heh kohlahma erepa toangtang ngama khesok eka.

⁵Joban ma rangwah ate ngintatte hehnâng ahokmin hahtokkhoh nyan pa pênthukmah - nãngma ere hahtokkhoh nyan junma thômîn eki.

⁶Erenoma, Joban nyapraang nâng aroh raanglahma tonga: “O Joban, nangma atô lânthonghun roh mihnyan nyuchha heh chennia; mihnyan nyuchha hehnâng, nangma aretô thonghun ekoa?

⁷Nangma thin a rangwah Joban ngintatte heh nomemin poatthe chharãng arin hôan eko; rohkomin nangma thinmîn dongsiet lohma khoakhem ekopa khophok rãngrãng phokthuk wakeko,

⁸ngale thinnâng chentôpa pênthuk eko.” Joban ma thinnâng chentôpa “Pênthuk eka” ngama ngaeka; erohwah thin khennâng ledangma chenjô aho. Eroh akomin, mihnyan nyuchha ma athângheh chentô khoko pênlahma nãngma khemih.

⁹Rohkomin nãngma Jisu a poatthe chharãng rangwah Joban ngintatte heh noma arin hôan lahma kheki, erohwah, Joban mînchenchaan junko atea anga ngarãng riieka. Ngale ate chêmrii lahma ritdi nãngma athângheh ate khoko ate choangpe ngale rânghong mînpoan pa khophok rãngrãng phokko lahma kheki.

¹⁰Chentô hôante Joban ngale Joban ma chentôpa aterãng jôba hôanwah. Ngale ere Joban pumma ajahthem mihnyan hehnâng ate mîndông demko johroamthuk rãngma, atema Jisu nâng chêmchohthuk lahma thinkho tâpêsiette rãng hôanwah, ngale ere moatlem moat chaanpa Joban nâng jôba tongeka. Chenrãngma ngako, thin khope lemkhôko Jisu ma senwên eka.

¹¹Atema chentô mihnyan nyuchha heh thinpap wah sâsiet eka, ngale ate erediko henhen atema sâsiettah a ere chentô hehrãng Wa pa mãnthe. Erohwah Jisu ma thinnâng Ngapho anaa ngama roorãng rêsêmah.

¹²Atema Joban nâng ngaeka, “Nangma chenni motoh a ereheh Ngama Nga mihnyan hehnâng thôkoh ang; Ngama nangnâng thinkhu mathahko erôe.”

¹³Atema ngaeka, “Ngama Joban nâng tok anaa ekang.” Ngale atema arohmin ngaeka, “Nga areko Joban ma kohthang chhuchha heh demko tongekang.”

¹⁴Phumma ate chhuchha ngama rooeka heh mihnyan nyuchha hei angem dâng phumma, Jisu min thin rãngrãng mihnyan nyuchha hei angem rãngrãng dângwah. Atema eroh moeka pa ate ritjunma mihnyan nâng pap mothuk lahma ritphete juchhih chaanpa chhihsiet rãng moatwah,

¹⁵ngale atema eroh molahma thin roandông dôngtangko arit rancheima haa rãngrãng dangtah heh wah pesiet wakeka.

¹⁶Chenrãngma ngako arepa nãngma senthemthem ajet atema rangwah Joban ngintatte hehnâng chohsok dangmah. Erenoma, atema Abraham chhuchha hehnâng ba chohsû eka.

¹⁷Erohwah, Joban nâng soamtô lemkhôko thinma nyahrãng putedâlemli ngale thinnâng nyahrãng mînchênte Soam aroakte dongthôan dângrãngma rongrup ngenâng atea ate mihnyan heh rãngrãng dangeka, ngale ere junko mihnyan nyuchha heh pappa mapkoh eka.

¹⁸Ngale ade phumma hungtôan ritte hehnâng atema tachohsûa, chenrãngma ngako, ate nângmin hungtôanwah ngale ate memin chêmchoh wah.