Read Nocte Naga Hibru 3 Bible Online

Hibru 3 - Nocte Naga bible

Hibru 3

¹Ngalemruchha Kristan mihnyan heh, Joban ma rooehèn heh! Nãngma thôeki putedâlem khohko Soam aroakte adongthôan dângrãng Joban ma chienkat era Jisu nâng thatthong hun tan en.

²Chenroh Mosa ma Joban humnâng senthemthem putedâlem lahma motah a, ererãngrãng atemin atenâng are moatlempa moatrãng rênte Joban nâng senthemthem putedâlem wah.

³Hum noma hum hôante mihnyan mînpa ajah rângthôeka. Ererãngrãng, Mosa noma Jisu mînpa ba ajah rângthômin.

⁴Chentô humpa henma komin hôan eka - rohkomin chentô hôante pa Joban.

⁵Joban humnâng Mosa haa rãngrãng danglahma putedâlem nâng asen danglahma moatwah, ngale Joban ma khediko jabthin ngin heh atema thôwah.

⁶Rohkomin Joban humko Krista ma Chha danglahma senthemthem putedâlem lahma moeka. Erohwah, nãngma chenni nâng khalihma putedâlem ekia ererãngma nãnghung dongdong, ngale senthemthem putedâlem lihma metong eko nãnga ate hum.

⁷Erohwah Asâthôanju ma ngaeka, “Thejâ nangma Joban roat metat oko,

⁸nãngte nãngwa heh dangtah rãngrãng nanghung nekchehsiet, thinma Joban lelatnâng danglahma thinhung eroh chehsietwah, ere jâko thinma hahran khonâng Joban hungtôan wah.

⁹Joban ma ngaeka, Enâng thinma Ngahung toan lahma thatsû thang, erepa Ngama rangpâ roakbelii ko chenni motek a erepa khelahma jômin thinma ngahung toanthang.

¹⁰Ngale erohwah Nga ere mihnyan heh demnâng rinkhah lekma ngatwah, ‘Thin a roantangma mothô khoanglepjû ngale Nga nginmin kepmah hang.’

¹¹Erohwah Nga ere mihnyan heh demnâng rinkhah lekma toamsêm wah: ‘Ngama thinnâng boanjek tôngrãng koh ekang theko thin chenthumin leta hûmin!’”

¹²Ngalemruchha heh, jetletma dangen, ahîn Joban tâwah lânngak chhoanroh hen hungmin nekchhih en ngale eretô leputedâlem nekdangen.

¹³Erenoma, nekhuwah henmemin papkaam moletma nehung nekchen chehjâ ekenma, rangwo roakweih wathema wathe nâng chohsûmîn en, chenrãngma ngako, Joban nyapraangma “Thejâ” ngaeka pa nãngma moatrãng ngaehi.

¹⁴Chenrãngma ngako, nãngma khebengwah putedâlemtih rãngrãng athôan kotuk rongtêngtêng medang eko, nãngkhu anga nga Krista demnâng aroamma etadange.

¹⁵Joban nyapraangma aroh ngaeka: “Nangma thejâ Joban roat metat oko, nãngte nãngwa heh dangtah rãngrãng nanghung nekchehsiet thinma Joban lelatnâng danglahma thinhung pa eroh chehsietwah.”

¹⁶Joban roatpa tat lahma Joban lelatnâng dângte mihnyan heh hen dângwah a? Ere mihnyan heh Mosa ma Igip wah loatsiettah mihnyan heh dângwah.

¹⁷Hendemnâng Joban rangpâ roakbelii rinkhah wah a? papkaam molahma hahran khonâng lepriitah mihnyan heh demnâng khahwah.

¹⁸Chenthu Joban ma, “Ngama thinnâng boanjek tôngrãng koh ekang hahko thin chenthumin leta hunmin” - ngama jablahma toamsem tahpa, atema henrãng jabwah a? erepa ate lelatnâng dângte mihnyan hehrãng sêmwah.

¹⁹Erohwah thin erehahko leta hûwãng thangma nãngma khe eki, chenrãngma ngako thinma putedâlem ho.